Te noa’ara’a te fa’atura iāna iho nā roto i te fa’arava’ira’a iāna iho

José Alberto Navas (mai tei fa’ati’ahia ia Miriam Sweeney)

San José (Costa Rica)

’Ua fa’aipoipohia vau, ’e e toru tamari’i tā’u, ’e ’aita tā’u e ’ohipa. Nō te ’ereraa vau i te ’ohipa ’ua feruri au ē ’aita e rāve’a fa’ahou. ’Ua ha’ape’ape’a vau nō te pārurura’a o tō’u ’utuāfare, ’e ’ua fa’aea vau i te ti’aturi iā’u iho.

’Ua fa’aitoito mai tā’u vahine ’o Carla ’ia haere i roto i te hō’ē pupu fa’arava’ira’a iāna iho. E mea ha’amā nā’u ’ia fa’a’ite ē ’aita tā’u e ’ohipa, terā rā, ’ua fa’aitoito mai ’oia iā’u ’ia tomo i roto i te hō’ē pupu ’ia ti’a iā’u ’ia aupuru i tō māua ’utuāfare.

’Ua fāri’i au e tāmata ma te ’ōti’ati’a. ’Iā’u i haere i roto i te pupu, ’ua ’ite a’era vau ē, e nehenehe tō’u ’aravihi i te reo peretāne e riro ’ei ’ohipa faufa’a i roto i te parau nō te ’ohipa. ’Ua ha’api’i au i te reo peretāne i roto i tā’u misiōni, terā rā, ’ua ’ite noa vau i te paraparau nō ni’a i te ha’apa’ora’a fa’aro’o. ’Ua fa’aō vau iā’u i roto i te piha ha’api’ira’a reo peretāne hōro’ahia e te ’Ēkālesia nō te ’apo mai i te tahi atu ā mau ta’o. I tō’u ho’ira’a i te fare i te hō’ē mahana i muri a’e i te ha’api’ira’a reo peretāne, ’ua hōro’a maira ’o Carla i te niuniu iā’u ra.

« ’O vai teie ? » ’Ua ani atu vau.

« ’Aita vau i ’ite », tāna ïa parau. « Tē paraparau nei rātou nā roto i te reo peretāne ».

E ti’a fa’atere rave ’ohipa teie nō te hō’ē taiete ’ohipa rahi roa a’e i Costa Rica, ’o tē ani mai nei ’ia uiui iā’u. ’Ua māere roa vau, terā rā, ’ua tere maita’i te uiuira’a. Ē maoro a’era, ’ua ha’api’i au ē, nā Carla i fa’anaho i te uiuira’a.

’Ua roa’a taua ’ohipa ra iā’u, ha’amana’o a’era vau i te tauturu a te pupu fa’arava’ira’a iāna iho iā’u. ’Ua feruri ihora vau nāhea i te fa’a’ohipa maita’i a’e i te mea tā’u i ’apo mai. ’Ua ha’amata vau i te ’imi i te hō’ē ’ohipa maita’i a’e ’e ’ua roa’a mai. I muri iho ’ua ha’a vau nō te ha’amata i tā’u iho taiete patura’a fare.

I hea pa’i tō’u ’utuāfare ’āhiri ’aita te ha’amatara’a tā mātou i fāri’i nā roto mai i teie fa’anahora’a fa’arava’ira’a iāna iho. ’Ua ha’api’i au ’ia fa’aha’eha’a ’e ’ia ani i te Fatu i te tauturu. ’Ua ha’api’i ato’a vau i te fāri’i i te feiā e hina’aro e tauturu mai iā’u ’ia ha’amaita’i i tō’u orara’a. ’Ua fāri’i mātou i te mau ha’amaita’ira’a e rave rahi. ’Ua noa’a iā’u i teienei te fa’atura iā’u iho, ’e e nehenehe tā’u e ha’amaita’i i tō’u ’utuāfare nā roto i te moni e noa’a mai iā’u . ’Ua ’ite au ē, e ha’amaita’i mai te Vārua ia tātou ’ia fa’aha’eha’a ana’e tātou.