Nāhea te hō’ē a’ora’a nō te ’āmuira’a rahi e nehenehe e taui i tō ’oe orara’a

Nā Hadley Griggs

Tē ora nei te ta’ata pāpa’i i Utah (Marite).

E nehenehe mau ’oe e riro hau atu mai ia Iesu Mesia. Nā teie mau mauha’a e tauturu ia ’oe ’ia ’ite ē, nāhea.

Tē mana’o ra ’oe ē, tē iti ra tō ’oe pūai pae vārua ? Tē mana’o ra ’oe ē, e ti’a ia ’oe ’ia fa’a’ohipa te tahi ma’a arata’ira’a pae vārua ? ’Ia ’ite ’oe, e fāna’o tō ’oe, i te mea ē, e nehenehe te ’āmuira’a rahi e pāhono i te reira ! ’Ua parau ’o Elder Robert D. Hales nō te pupu nō te Tino ’Ahuru Ma Piti ’āpōsetolo : « Tē fafau nei au i te mau melo ’āpī o te ’Ēkālesia ē mai te mea e fa’aro’o ’oe [i te ’āmuira’a rahi], e ’ite outou i te Vārua i te tupu rahi i roto ia ’oe. E fa’a’ite te Fatu ia i te mea tāna e hina’aro ia ’oe ’ia rave nō tō ’oe orara’a ».¹

E e’ita te reira e hope i te hope’ara’a o te ’āmuira’a—e tāmau noa ā ’oe i te fāri’i i te Vārua nā roto i te tuatāpapara’a i te mau a’ora’a i muri a’e !

’Ua rau te huru tā te ’āmuira’a tauturura’a ia tātou. Penei a’e, te mea faufa’a a’e, e arata’i te reira ia tātou ’ia piri atu i te Fa’aora nā roto i te ha’api’ira’a ia tātou nāhea ’ia riro hau atu mai iāna ra. Te hō’ē rāve’a rahi nō te ’apo rahi a’e i te mau mea nō roto mai i te ’āmuira’a maori rā, te ha’apa’o-maita’i-ra’a ïa i te mau ha’api’ira’a nō ni’a i te huru Mesia—i roto ānei i te ha’apūrorora’a ’e ’aore rā, ’a tuatāpapa ai ’oe i te mau a’ora’a i muri a’e. ’Ia fa’aro’o ana’e ’oe ’e ’aore rā, ’ia tai’o ana’e ’oe ma te tahi huru o te Mesia i roto i te ferurira’a, e nehenehe te mau parau ’e te Vārua e tauturu ia ’oe ’ia ha’api’i mai nāhea ’ia rahi atu te rirora’a mai te Mesia.

E nehenehe tā ’oe e pāhono vitiviti i teie uiuira’a nō te hi’o ē, e aha te hō’ē huru ’e ’aore rā, e piti tā ’oe e hina’aro e rōtahi ’a tuatāpapa ai ’oe i te mau a’ora’a. (Nō te uiuira’a hōhonu atu ā, ’a hi’o i te New Era nō ’atopa 2016 ’e ’aore rā, te pene 6 o te ’A poro i tā’u ’evanelia.)

Nō nā iva huru tāta’itahi o te Mesia i raro nei, ’a rave mai i te fa’ahitira’a parau e au maita’i a’e i ni’a ia ’oe.

1. Faʼaroʼo :

   1. ’Aita vau i pāpū ē, ’o Iesu Mesia ānei tō’u Fa’aora.

   2. Tē ti’aturi nei au ia Iesu Mesia ’e tē fāri’i nei au iāna ’ei Fa’aora nō’u.

   3. Mea maita’i ē, ’o Iesu Mesia tō’u Fa’aora.

2. Ti’aturira’a :

   

   1. Tē vai nei te hau ’e te mana’o ’ana’anatae i roto iā’u nō te ananahi.

   2. E ri’ari’a rahi tō’u i te ananahi.

   3. E ’ere au i te mea tau’a roa i te ananahi—mai te mea ē, ’aita vau e feruri i te reira, e’ita ïa vau e ha’ape’ape’a nō te reira.

3. Te aroha ’e te here :

   1. Te tāmata nei au ’ia here i te tahi atu mau ta’ata, terā rā, tē vai ra iho ā te tahi mau ta’ata e fa’atupu noa i te riri i roto iā’u.

   2. ’Ua rahi roa tā’u ’ohipa i te tāmatara’a i te rave i te ’ohipa nō tō’u iho orara’a, ’aita atura tō’u e taime ’ia feruri i te tahi atu ta’ata.

   3. Tē hina’aro nei au i te ora maita’i mure ’ore ’e te ’oa’oa o te tahi atu mau ta’ata.

4. Vi’ivi’i ’ore :

   1. « Te vi’ivi’i-’ore i roto i te ferurira’a ’e te ravera’a. » E ’ere ïa i te mea ’ana’anatae roa !

   2. E ’ā’au mā ’e te vi’ivi’i ’ore tō’u.

   3. E mea fifi nō’u ia vai mā noa ’e te vi’ivi’i ’ore.

5. ’Ite :

   

   1. Nō te rahi te ’ohipa, ’aita e ti’a iā’u ’ia fa’ata’a i te taime nō te ’imi i te mau pāhonora’a i tā’u mau uira’a.

   2. ’Auē. ha’api’i ? I te tahi taime e mea ha’umani roa ’ia tāmata i te ha’api’i i te tahi mau mea.

   3. Tē ’imi tu’utu’u ’ore nei au ’ia hāro’aro’a i te parau mau ’e ’ia ’itehia te mau pāhonora’a i ta’u mau uira’a.

6. Faʼaʼoroma’i :

   1. E ti’a iā’u ’ia tīa’i i te mau mea ma te riri ’ore ’e ’aore rā ma te ’ino’ino ’ore.

   2. Tē mana’o nei au ē, e nehenehe tā’u e tīa’i, terā rā, e nehenehe au e riri.

   3. Te tīa’ira’a i te mau mea te mea ’ino roa a’e. Hina’aro vau i te mau mea ato’a i teienei.

7. Ha’eha’a :

   1. Hina’aro vau e ha’apāpū ē, nā’u iho e rave i te mau mea ato’a.

   2. Turu’i au i ni’a i te Fatu nō te tauturu.

   3. ’Ia rave au i te hō’ē mea, pinepine te mo’ehia iā’u ē, e nehenehe tā’u e ani i te Metua i te Ao ra i te tauturu.

8. Itoito, tu’utu’u ’ore :

   1. Tē ha’amau’a nei au i te tuha’a rahi o tō’u orara’a i roto i te māta’ita’ira’a i te ’āfata teata, te haerera’a nā muri iho i tō’u mau hoa, ’e te ’apera’a i te hōpoi’a !

   2. Pinepine au i te tāfifi nō te fa’atumu i ni’a iho i te mau mea faufa’a i roto i tō’u orara’a, terā rā, tē tāmata nei au.

   3. E ha’amau’a vau i tō’u taime ’e tō’u pūai i ni’a i te mau mea faufa’a roa a’e.

9. Ha’apa’o :

   1. E ha’apa’o vau ma te hina’aro mau i te a’o a tō’u feiā fa’atere ’e te mau metua.

   2. ’O vau iho tō’u fa’atere—pinepine au i te fifi i te fa’aro’o i te tahi atu ta’ata.

   3. E pe’e au i te a’o a tō’u mau ti’a fa’atere ’e tō’u mau metua, terā rā, i te tahi taime, e amuamu vau.

I teienei, ’a hi’o na i tā ’oe mau pāhonora’a. E aha te huru tā ’oe e hina’aro e raverave ? Nō te ha’api’i nāhea ’ia fa’ahotu i te reira, e nehenehe tā ’oe e rave mai hō’ē ’e ’aore rā e piti ’e ’ia ha’apa’o maita’i i te reira ’a fa’aro’o ai ’oe i te ’āmuira’a.

Mai te mea ē, ’ua pāhono ’oe ē, ’e mea maita’i ’oe i roto i te reira tāta’itahi, ’a tāmau noa ! E nehenehe ā tā ’oe e rave mai hō’ē ’e ’aore rā e piti tei ’itehia mai ia ’oe i roto i te uiuira’a ’e ’a fa’atumu i ni’a iho i te reira i roto i tā ’oe tuatāpapara’a i te ’āmuira’a. Noa atu te vāhi tei reira ’oe i roto i tō ’oe tere nō te riro mai mai te Mesia te huru, e nehenehe tā ’oe e fāriu atu i ni’a i te mau ha’api’ira’a a tō tātou mau ti’a fa’atere nō te tauturu ia ’oe i ni’a i tō ’oe ’ē’a.

Mai te mea ē, ’aita e ti’a ia ’oe ’ia mā’iti i te hō’ē huru i teienei, ’eiaha e ha’ape’ape’a ! E nehenehe noa tā ’oe e fa’aro’o i te ’āmuira’a ’e ’a hi’o ai ē, e aha te matara mai nō ’oe.

’Ia oti ’oe i te mā’iti i te huru tā ’oe e hina’aro ’ia rōtahi i ni’a iho, e hina’aro paha ’oe e pāpa’i i te reira, ’ia ineine ho’i ’oe nō te fāri’i i te heheura’a nō ni’a i te reira, ’a fa’aro’o noa ai ’oe i te ’āmuira’a ’e ’aore rā, ’a tuatāpapa ai ’oe i te mau a’ora’a i muri a’e. ’Ia fa’aro’o ana’e ’oe ’e ’ia tuatāpapa ho’i, ’a vaiiho i te Vārua ’ia arata’i ia ’oe i te tahi mau rāve’a ta’a ’ē e nehenehe ia ’oe ’ia ’ohipa i ni’a i terā huru. ’A hi’o i teie hi’ora’a i raro nei !

Nota

1. Robert D. Hales, « Te ’āmuira’a rahi : ha’apūaira’a i te fa’aro’o ’e te ’itera’a pāpū », Liahona, Novema 2013, 6.

Here e pae hoa ’āpī

I te fare ha’api’ira’a tē vai ra hō’ē pupu iti tamari’i tā te rahira’a o te tahi atu mau pīahi e parau nei ’o « verā mā » nō te mea e mea ta’a ’ē rātou. ’Aita vau i mātau i te paraparau ia rātou. ’Aita vau i hāmani ’ino ia rātou, ’aita ato’a rā vau i hāmani maita’i atu.

I tō’u fa’aro’ora’a i te peresideni Dieter F. Uchtdorf, tauturu piti i roto i te Peresidenira’a Mātāmua, i te hōro’ara’a i tāna a’ora’a « E noa’a te aroha i tei aroha ia vetahi ’ē ra » (’āmuira’a rahi nō ’ēperēra 2012), ’ua tāui te hō’ē mea. ’Ua parau ’oia ē, tē vai ra hō’ē mea e ti’a ia tātou ’ia rave ’ia ha’avā ana’e tātou : « ’A fa’aea ! » ’Ua tauturu tāna a’ora’a iā’u ’ia ’ite ē, ’eiaha e ha’avā i teie mau tamari’i i te fare ha’api’ira’a, e mono rā vau i tō’u mau mana’o ’e tō’u mau ferurira’a ’ī’ino i te « ’ā’au aroha rahi nō te Atua ’e tāna mau tamari’i ».

I taua monire ra ’a haere ai au i te fare ha’api’ira’a, ’aita vau i haere e fārerei i tō’u mau hoa mātarohia, ’ua haere rā vau i te vāhi tei reira terā pupu tā te pīahi i parau ’o « verā mā ». ’Ua ha’amata a’era mātou i te paraparau, ’e ’ua ’ite a’era vau ē, ’aita roa atu teie mau tamari’i i ta’a ’ē i te tahi mau pīahi. ’A haere noa ai au nā muri ia rātou, ’ua fa’atupu vau i te autā’atira’a ’e ’o rātou. ’Ua roa’a iā’u e pae hoa ’āpī.

’Ua ’ite a’era vau ē, e ’ere roa atu tō’u mau hoa ’āpī i te « verā mā »—nō te Atua ’ua riro noa rātou ’ei tamari’i nāna. Tē ’oa’oa rahi nei au i te ’itera’a hau atu nō ni’a i te here o te Atua nō tāna mau tamari’i.

Holly H., 19 matahiti, California (Marite)

Patu i te aroha i roto i te pupu ’upa’upa a te piha ha’api’ira’a

I roto i te ’āmuira’a rahi nō ’ātopa 2015, ’ua ’ana’anatae ta’a ’ē au i te hō’ē a’ora’a. ’Ua hōro’a ’o Elder Dale G. Renlund nō pupu nō te Tino ’Ahuru Ma Piti ’āpōsetolo i te hō’ē a’ora’a te upo’o parau ’o « Nā roto i te mata o te Atua ». ’Ua paraparau ’oia i te faufa’a i te hi’ora’a i te tahi atu mau ta’ata nā roto i te mata o te mau metua here. I tō’u fa’aro’ora’a i te reira, ’ua tae roa mai te mana’o ē, tītauhia iā’u ’ia fa’aitoito rahi atu ā nō te here i te ta’ata ’ati a’e iā’u.

I te hō’ē po’ipo’i i muri a’e i te ’āmuira’a, ’ua hi’ohi’o noa vau i te taime tano e fa’atupu i te ’oa’oa i roto i te hō’ē ta’ata. ’Ua haere au i tā’u piha pupu ’upa’upa ’e ’ua ’ite atu vau i te hō’ē tamaiti ’aita roa atu vau e ha’apa’o nei. E nehenehe tā’u e parau ē, tē vai ra hō’ē mea e ha’afifi ra iāna, nō reira, ’ua haere atu vau ’e ’ua ui atura iāna e aha tōna huru. E ’ere ’oia i te mea paraparau roa, nō reira ’ua ui atura vau iāna ē, e mea au ānei nāna te piha ha’api’ira’a ’upa’upa. ’Ua parau maira ’oia ē, ’aita ’oia i ’ite maita’i i te pehe ’e tē ha’ape’ape’a ra ’oia nō te ’āru’i ’upara’a. ’Ua pūpū atura vau ’ia hi’o māua i te reira, ’e ’ua ha’uti ’āmui māua i te pehe. E mea faʼahiahia ! I muri iho, ’ua ha’amata māua i te paraparau nō ni’a i tā māua mau mauha’a ’upa’upa. ’Ua hoa roa māua, ’e ’ua ’oa’oa mau vau i te mea ē, ’ua rave au i te taime nō te paraparau iāna.

Christa M., 12 matahiti, Texas (Marite)