Parau poro’i nā te mau tuahine hāhaere
Tauahi ma te here i te feiā tei fa’aātea
’A tuatāpapa nā roto i te pure i teie mātēria ma te ’imi i te heheura’a ’ia ’ite e aha te fa’a’ite atu. Nāhea te ta’a-maita’i-ra’a i te fā o te Sōtaiete Tauturu e fa’aineine i te mau tamāhine a te Atua nō te mau ha’amaita’ira’a ’o te ora mure ’ore ?
« Te parau mau ’oia ho’i, ’aita e ’utuāfare maita’i hope roa… », te parau ïa a te peresideni Dieter F. Uchtdorf, tauturu piti i roto i te Peresidenira’a Mātāmua. « Noa atu e aha te mau fifi tā tō ’outou ’utuāfare e fa’aruru ra, noa atu e aha tā ’outou e tītauhia ’ia rave nō te fa’atītī’aifaro i te reira, te ’ōmuara’a ’e te hope’ara’a o te rāve’a, ’o te aroha ïa, te here mau o te Mesia ».1
Nō te feiā ’aita e ha’apa’o pāpū nei i te ’evanelia, ’ua parau ’o Linda K. Burton, peresideni rahi tahito nō te Sōtaiete Tauturu : « ’Ua here te Metua i te Ao ra i tāna mau tamari’i pā’āto’a… Noa atu tei hea rātou—tei ni’a iho ānei i te ’ē’a ’e ’aore rā ’aita—tē hina’aro nei ’oia ’ia ho’i mai rātou ».2
« Noa atu tō [tā ’outou mau tamari’i] ha’apa’o ’ore… ’ia paraparau ’outou ia rātou, ’eiaha e parau nā roto i te riri, ’eiaha ’outou e parau tama’i nā roto i te vārua fa’autu’a ’ino ra », te ha’api’ira’a ïa a te peresideni Joseph F. Smith (1838-1918). « ’A paraparau ia rātou ma te marū ».3
’Ua fa’ahiti fa’ahou ’o Elder Brent H. Nielson nō te Hitu ’Ahuru, i te ha’api’ira’a a te Fa’aora i te feiā e 10 moni tā rātou, ’e ’ua mo’e hō’ē : « [’Imi] i te reira ’ia itehia mai. ’Ia riro rā tei mo’e ’ei tamaiti ’e ’ei tamāhine nā outou, ’ei taea’e ’e ’ei tuahine nō ’outou… ’a hope noa atu tei roa’a ia tātou ’ia rave, ’ia here atu tātou i terā ta’ata ma tō tātou ’ā’au ato’a…
« ’Ia ti’a ia ’outou ’e iā’u ato’a nei ’ia fāri’i i te heheura’a nō te ’ite nāhea i te rave maita’i i te feiā ’ati a’e ia tātou ’o tei mo’e, e mai te peu e tītauhia, ’ia roa’a ato’a mai te fa’a’oroma’i ’e te here o tō tātou Metua i te Ra’i ’e ’o tāna Tamaiti Iesu Mesia, ’a here, ’a hi’o ’e ’a tīa’i ai tātou i te tamari’i pūhura ».4
’Ua parau te peresideni Henry B. Eyring, tauturu mātāmua i roto i te Peresidenira’a Mātāmua : « ’Ua pure au ma te fa’aro’o ’ia ’imi ’e ’ia putapū te hō’ē ta’ata tā’u i here i te mana nō te tāra’ehara. ’Ua pure au ma te fa’aro’o ’ia tae mai te mau ta’ata melahi nō te tauturu ia rātou, ’e ’ua haere mai rātou.
« ’Ua fa’anaho te Atua i te mau rāve’a nō te fa’aora i tāna mau tamari’i tāta’itahi ».5
Te tahi atu mau pāpa’ira’a mo’a ’e mau ha’amāramaramara’a
Mataio 18:12 ; Alama 31:35 ; 3 Nephi 13:32 ; PH&PF 121:41-42
Fa’aro’o ’Utuāfare Tōtauturu