Mai, pe’e mai—nō te autahu’ara’a a Melehizedeka ’e te Sōtaiete Tauturu

Ha’amata i te ’āva’e tēnuare 2018

Te fa’anahora’a ’āpī i te sābati nō te feiā pa’ari

First Presidency — E rave rahi matahiti tātou i te tuatāpapara’a i *Te Mau Ha’api’ira’a a te Mau Peresideni o te ’Ēkālesia*. I te matahiti 2018, e ha’amata tātou i te fa’a’ohipa i te mau a’ora’a i te ’āmuira’a rahi nō te rōtahi i tā tātou tuatāpapara’a i ni’a i te mau ha’api’ira’a a te mau peropheta ora, te mau ’āpōsetolo ’e te tahi atu feiā fa’atere o te ’Ēkālesia.

identify needs — Te mau taea’e hāhaere ’e te mau tuahine hāhaere

counsel together — Te mau purera’a i te sābati

Te fa’anahora’a ’āpī i te sābati

I te ’āva’e tēnuare 2018, e taui te mau purera’a i te sābati nō te mau pupu autahu’ara’a a Melehizedeka ’e te Sōtaiete Tauturu. I roto i teie mau tauira’a tē vai ra te mau mātēria e fa’a’ohipahia—e monohia te Mau Ha’api’ira’a a te Mau Peresideni o te ’Ēkālesia ’e e tūra’i-rahi-hia te parau nō te ’apora’a i te ha’api’ira’a mai roto mai i te ’āmuira’a rahi, te ’āpo’o-’āmui-ra’a ’e te tuatāpapara’a i te tahi mau tumu parau ta’a ’ē e mā’itihia e tō tātou feiā fa’atere rahi.

Te tauira’a rahi mau rā, ’o te huru ïa tā tātou fa’a’ohipara’a i teie mau mātēria nō te fa’atupu i te mau ’ōpuara’a mau o te mau purera’a i te sābati.

Te mau ’ōpuara’a o tā tātou mau purera’a

’Ua fa’anaho te Atua i tāna mau tamaiti ’e tāna mau tamāhine i fafauhia ’ei pupu autahu’ara’a ’e ’ei Sōtaiete Tauturu nō te tauturu i te fa’atupura’a i tāna ’ohipa. E ’ohipa mana rahi e tupu ’ia putuputu ana’e tātou i raro a’e i te fa’aterera’a a rātou tei mau i te mau tāviri o te autahu’ara’a. Nō reira, noa atu e mea faufa’a rahi ’ia ha’api’i i te ’evanelia, ’ua hau atu te mau purera’a autahu’ara’a ’e Sōtaiete Tauturu i te sābati i te piha ha’api’ira’a noa. E mau ’āpo’ora’a ’ohipa ato’a te reira i reira tātou e ha’api’i ’āmui ai mai roto mai i te mau a’ora’a i te ’āmuira’a rahi ’e e ’āpo’o ’āmui ai nō ni’a i te ’ohipa fa’aorara’a ’e e fa’anaho ai nō te fa’atupura’a i te reira ’ohipa. E tauturu te mau tauira’a nō 2018 i te fa’atupu i te reira mau ’ōpuara’a.

Mau uiraʼa ’e mau pāhonoraʼa

E aha teie tauira’a, e fa’anahora’a ha’api’ira’a ’āpī ānei—’aore rā e mea rahi atu ā ? Penei a’e e au noa te mau mātēria ’āpī i te fa’anahora’a ha’api’ira’a, terā rā, ’ua riro ato’a te reira ’ei tumu nō te fa’arahi i te ravera’a te mau pupu autahu’ara’a ’e te Sōtaiete Tauturu i te ’ohipa a te Atua ma te pāhono i te mau hina’aro ta’a ’ē o te mau ta’ata i reira. Maoti teie tauira’a e vai ai te hō’ē vāhi mātutura’a nō te fa’ata’a, nō te ’āparau ’e nō te pāhono i te reira mau hina’aro.

I ni’a i te aha tātou e rōtahi ai i roto i te mau purera’a i te sābati ? Ha’amata i te ’āva’e novema 2017, e ’itehia i roto i te mau ve’a nō te ’āmuira’a rahi, te Liahona ’e te Ensign, te mau mātēria e fa’a’ohipahia i roto i te mau purera’a autahu’ara’a a Melehizedeka ’e te Sōtaiete Tauturu i te sābati. E piti purera’a i roto i te ’āva’e e rōtahi atu i ni’a i te mau a’ora’a o te ’āmuira’a rahi, ’e e hōro’ahia i te feiā fa’atere ’e te mau ’orometua te mau mana’o nō te tauturu i te mau melo ’ia ’āparau ’e ’ia fa’a’ohipa i teie mau a’ora’a. E fa’a’ohipahia te mau sābati mātāmua nō te ’āpo’o ’āmui nō ni’a i te mau hina’aro o te mau ta’ata i reira ’e i te maha o te sābati e tuatāpapahia te hō’ē tumu parau i mā’itihia e tō tātou feiā fa’atere rahi. Hi’o i te fa’anahora’a nō te ’āva’e i ni’a i te tahi iho ’api.

E aha te aura’a nō te ’āpo’o-’āmui-ra’a nō ni’a i te mau hina’aro o te mau ta’ata i reira ? E riro te mau pupu autahu’ara’a a Melehizedeka, nā reira ato’a te Sōtaiete Tauturu i te « pārahi i roto i te ’āpo’ora’a » (D&C 107:89) i te sābati mātāmua o te ’āva’e. I raro a’e i te fa’aterera’a a te feiā fa’atere autahu’ara’a ’e Sōtaiete Tauturu, e ravehia te mau purera’a i te sābati mātāmua nō te fa’ata’a i te mau hina’aro ta’a ’ē o te mau ta’ata i reira ’e nō te ’āpo’o ’āmui nō ni’a i te rāve’a e pāhono i te reira. E nehenehe te mau tumu parau nō te mau ’āpo’ora’a i te sābati mātāmua e riro : nāhea i te ha’amaita’i i te paraparaura’a i rotopū i te mau melo o te ’utuāfare, nāhea i te tāvini i te huira’atira ’e nāhea i te a’o i te feiā ’āpī o te pāroita ’aore rā ’āma’a. I roto i te mau purera’a i muri mai, e hi’o te pupu peresibutero, te pupu tahu’a rahi ’aore rā te Sōtaiete Tauturu e aha te huru te ’ohipa i ravehia ’e e aha atu ā ïa e rave.

’Ua hōho’a ānei teie fa’anahora’a ha’api’ira’a i te Mai, pe’e mai nā te feiā ’āpī ? Noa atu ā e mea ta’a ’ē te mau tumu parau ’e te mau mātēria i roto i te Mai, pe’e mai—nō te autahu’ara’a a Melehizedeka ’e te Sōtaiete Tauturu ’e i roto i te Mai, pe’e mai nō te feiā ’āpī, ’ua tū’ati noa te huru hōro’ara’a i te ha’api’ira’a ’e te huru ’apora’a i te ha’api’ira’a. Nō te tahi atu mau ha’amāramaramara’a nō ni’a i te ’apora’a ’e te ha’apira’a i te ’evanelia, ’a hi’o Ha’api’ira’a mai tā te Fa’aora i ni’a i te teaching.lds.org.

E ’ere au i te ’orometua. Tītauhia ānei ’ia tāpa’o vau i tō’u i’oa nō te fāri’i i te Liahona ’aore rā te Ensign ? E rahi atu ā te ’āpī nō ’outou ’ia tai’o ’outou i te mau a’ora’a o te ’āmuira’a rahi ’e ’ia hōpoi mai i te reira i te mau purera’a i te sābati. E nehenehe e roa’a i ni’a i te mātini rorouira i te conference.lds.org ’e i roto i te vaira’a buka ’evanelia ’aore rā nā roto i te poro’ira’a i te Liahona ’aore rā te Ensign (hi’o store.lds.org).

’E mai te peu ’aita te ve’a nō te ’āmuira’a rahi i roto i tō’u reo ? ’Ua rau te reo e vai ra nō te mau a’ora’a i te ’āmuira’a rahi i ni’a i te conference.lds.org ’e te vaira’a buka ’evanelia, ’e e ’itehia te mau mātēria nō te fa’anahora’a ha’api’ira’a i te ComeFollowMe.lds.org. Mai te peu ’aita i fa’aineinehia te mau mātēria ’āpī o te fa’anahora’a ha’api’ira’a i roto i tō ’outou reo, i ni’a ānei i te natirara ’aore rā i roto i te ve’a, ’a hi’o ïa i Te mau arata’ira’a nō te fa’anahora’a ha’api’ira’a, 2018 nō te tahi atu ha’amāramaramara’a.

Ahea tātou e ha’amata ai i te tuatāpapa i te mau a’ora’a ’āpī o te ’āmuira’a rahi ? E ha’amata ’outou i te tuatāpapa i te mau a’ora’a o te ’āmuira’a rahi nō ’ātopa 2017 i te ’āva’e tēnuare 2018. I muri iho, nā tō ’outou feiā fa’atere e fa’aoti ahea e ha’amata ai i te fa’a’ohipa i te mau a’ora’a nō te ’āmuira’a i muri—i te ’āva’e mē ānei ’aore rā i te ava’e novema.

Nā vai e mā’iti i te mau a’ora’a o te ’āmuira’a rahi e tuatāpapa atu ? E ’āpo’o ’āmui tō ’outou iho feiā fa’atere nō te fa’aoti e aha te mau a’ora’a o te ’āmuira’a e pāhono maita’i i te mau hina’aro o tō ’outou pupu peresibutero, te pupu tahu’a rahi ’e te Sōtaiete Tauturu. E nehenehe ē, e mea ’ē te a’ora’a tā te pupu tahu’a rahi e tuatāpapa, e mea ’ē tā te pupu peresibutero ’e e mea ’ē ato’a tā te Sōtaiete Tauturu, i roto i te hō’ē pāroita ’aore rā ’āma’a, ’ei pāhonora’a i te mau hina’aro ta’a ’ē.

Tārena nō te sābati nō te autahu’ara’a a Melehizedeka ’e te Sōtaiete Tauturu

Ha’amata i te ’āva’e tēnuare 2018

	Tumu parau	Arata’ihia e
Sābati mātāmua	’Āpo’o ’āmui nō ni’a i te mau hina’aro o te mau ta’ata i reira	Te peresidenira’a ’aore rā te fa’aterera’a pupu
Te piti ’e te toru o te sābati	A’ora’a nō te ’āmuira’a rahi i ma’iri a’enei	Te peresidenira’a ’aore rā te fa’aterera’a pupu ’aore rā te hō’ē ’orometua tei pi’ihia
Te maha o te sābati	Tumu parau ta’a ’ē i mā’itihia e te feiā fa’atere rahi o te ’Ēkālesia	Te peresidenira’a ’aore rā te fa’aterera’a pupu ’aore rā te hō’ē ’orometua tei pi’ihia
Te pae o te sābati	Tumu parau i mā’itihia e te ’episekōpora’a	Te ’episekōpora’a ’aore rā te hō’ē ta’ata tei mā’itihia

E ’itehia te mau arata’ira’a nō teie mau purera’a i roto i te ve’a o te Liahona ’e te Ensign nō novema, i roto i te vaira’a buka ’evanelia ’e i te ComeFollowMe.lds.org.