Mau pāhonoraʼa a te feiā faʼatere o te ʼĒkālesia
Nāhea ’ia ’ite nō ’outou iho
Nō roto mai i te hō’ē fārereira’a i te Peresideni Henry B. Eyring ’e ’o Elder Jeffrey R. Holland.
E tō mātou mau hoa here taure’are’a, tō mātou hina’aro nō ’outou tāta’itahi maori rā, ’ia ’ite ’outou nō ’outou iho, ’eiaha nā ni’a i te tahi atu ta’ata ē, e Atua mau te Atua o te ra’i, ’ua ’ite ’oia ia ’outou, ’e ’ua pohe tāna Tamaiti nō te mau hara a tō te ao nei.
Tā mātou tīa’ira’a maori rā, ’ia roa’a te hō’ē ’itera’a pāpū ’āueue ’ore nō ’outou iho ē, ’ua fa’aho’i-fa’ahou-hia mai te ’evanelia a Iesu Mesia i ni’a i te fenua nei nō te taime hope’a. E mea ta’a ’ē mau te misiōni a Iosepha Semita, noa atu rā, ’ua riro tāna pure ha’eha’a ’ei hi’ora’a maita’i nō ’outou ’e nō’u. ’Ua haere Iosepha i roto i te uru rā’au nō te pure ma te fa’aro’o e pāhono mai te hō’ē Atua here i tāna pure ’e e tāmarū ho’i i tōna mana’o ’āno’ino’i. ’Ua roa’a iāna te reira ha’apāpūra’a nā roto i te tai’ora’a i te parau a te Atua ’e te fāri’ira’a i te hō’ē ’itera’a ē, e parau mau te reira. ’Ua pure ato’a Iosepha ma te hina’aro ’eiaha e fa’aro’o noa, e ha’apa’o ato’a rā noa atu te ’ohipa e tupu mai. ’Ua fafau ’oia ’ia rave i te mea tā te Atua e parau mai iāna.
I roto i taua huru vārua ra, tē hina’aro nei au e hōro’a atu i te hō’ē tītaura’a i te feiā ’āpī o te ’Ēkālesia. Teie te tītaura’a : ’a ’imi ’ia ’ite nō ’outou iho ē, e parau mau teie mau mea. E nehenehe tā ’outou e rave i te reira nā roto i te pe’era’a i te hi’ora’a o Iosepha Semita : tuatāpapa i te mau pāpa’ira’a mo’a, vaiiho i te parau ’ia paremo hōhonu i roto i tō ’outou ’ā’au, feruri i te reira nā ni’a iho noa, ’e i muri iho ’a ani i te Atua, ma te hina’aro pāpū ’ia fāri’i i tāna arata’ira’a—’oia mau, ’ia tupu tōna hina’aro.
Noa atu ē, e au teie tītaura’a mai te hō’ē anira’a ’ōhie, tē fafau atu nei au ē, e tītau-mau-hia te tauto’ora’a rahi. E’ita tā’u e nehenehe e fafau atu ia ’outou ē, e tae mai tā ’outou mau pāhonora’a i roto i te hō’ē noa mahana ’e ’aore rā, te hō’ē noa hepetoma, e nehenehe rā tā’u e fafau atu ē, e paraparau mai te Atua ia ’outou nā roto i tāna iho rāve’a ’e i tōna iho taime, ’ia ani ’outou ma te fa’aro’o. Mai te mea ē, e fāri’i ’outou ’e e ’ohipa ’outou i ni’a i teie anira’a, e ’ite ’outou ē, e ’ere te pāhonora’a ana’e te tae mai, e ha’amau ato’a rā ’outou i te hō’ē hōho’a nō te fāri’ira’a i te ’ite pae vārua ’o te ha’amaita’i ia ’outou nō te toe’a o tō ’outou orara’a.