Tē paraparau nei tātou nō te Mesia
’Aita i tāere roa nō te tāmata fa’ahou ā nō te piti o te taime
Tē ora nei te ta’ata pāpa’i i Virginia, Marite.
’Ua parau te metua tāne i tāna tamāhine, hō’ē o tā’u mau pīahi fifi ri’i, « ’Aita i tāere roa nō ’oe ’ia manuïa ». Tē hōro’a mai nei te Fatu ia tātou i taua ato’a parau poro’i nei.
Fa’ahōho’ara’a nā Kelley McMorris
E piahi ’o Sandra nō tā’u piha ha’api’ira’a reo peretāne ’aravihi a’e. E rave rahi hepetoma te ha’api’ira’a i te ha’amatara’a, ’aita ’oia i rave hō’ē ’ohipa ’aore rā hō’ē ōpuara’a ’ohipa i fa’auehia iāna. ’Ua nevaneva noa ’oia i ni’a i tāna ’amura’a mā’a. ’Ua ha’avarevare mai ’oia i te tumu nō tōna ’orera’a ’e fa’aoti i te mau mea i fa’auehia iāna, ’e ’aita ’oia i fa’a’ite i te huru hi’ora’a ’e i te huru ’ohipa tītauhia nō te manuïa i roto i taua ha’api’ira’a pa’ari ra.
’Ua fa’aoti a’era māua tōna tauturu ha’api’ira’a e fa’atupu i te hō’ē ’āmuira’a ’e ’o Sandra, tōna metua tāne, ’e te tahi atu o tōna mau ’orometua, nō te hi’o ē, e aha te ’avei’a e ti’a iāna ’ia rave : e fa’aea ānei i teie piha ha’api’ira’a ’aravihi a’e, ’e e rave ho’i i te piha ha’api’ira’a mātarohia ? Te uira’a faufa’a roa a’e i roto i tō mātou ferurira’a maori rā, e ’itehia ānei ia mātou te hō’ē rāve’a nō te tauturu ia Sandra ’ia manuïa ?
Nō tō’u ’ite ē, ’ua hōro’ahia ia Sandra e rave rahi taime ’ia manuïa ’oia, terā rā, ’ua mā’iti ’oia ’eiaha e manuïa, ’ua haere au i roto i te reira rurura’a ma te mana’o paruparu. I roto iā’u iho, ’ua hina’aro vau ’ia vaiiho ’oia i tā’u piha ha’api’ira’a, e’ita ïa vau e ha’ape’ape’a fa’ahou nōna. ’Ua feruri au ē, ’ua ’imi au i te mau rāve’a ato’a, ’e ’ua tāere roa.
I roto i te rurura’a, ’ua fa’a’ite mai te huru o Sandra ē, ’aita ato’a ’oia i pāpū ē, e manuïa ānei ’oia. ’Ua hi’o noa ’oia i te ’amura’a mā’a ’a fa’ati’a noa ai au i tōna manuïa ’ore i roto i te piha ha’api’ira’a peretāne. I te ha’apāpūra’a mai tōna ’orometua ’ā’amu ē, ’aita ato’a ’o Sandra i manuïa i roto i tāna piha ha’api’ira’a, ’ua ha’eha’a fa’ahou a’era tōna tino i roto i tōna pārahira’a, ’e ’ua ti’a iā’u ’ia ’ite i te roimata i te tahera’a.
Ma te ’ā’au aroha, ’ua fa’ata’a atura vau iāna ’e i tōna metua tāne ē, mai te mea e hina’aro ’o Sandra ’ia manuïa i roto i teie mau ha’api’ira’a pa’ari, tītauhia iāna ’ia tāui i teie huru tei tu’u hōhonu iāna i roto i teie ’āpo’o ’e e riro ïa ’ei ’ohipa fifi roa.
Hō’ē parau poro’i nō roto mai i tōna Metua
I muri iho ’ua fāriu atura te tauturu ha’api’ira’a i ni’a i te metua o Sandra, e ta’ata teie ’aita i haere ātea roa i te ha’api’ira’a, ’e ’aita ’oia i ta’a roa i te fa’anahora’a o te ha’api’ira’a. ’Ua ui atura te tauturu ha’api’ira’a iāna ē, e uira’a ānei tāna nō te mau ’orometua ha’api’i. ’Ua parau maira ’oia ē, ’aita, ’e ’ua ha’amāuruuru maira ia mātou nō te mau mea tā mātou i rave nō Sandra. I muri iho ’ua parau ’oia ē, tē vai ra te tahi mea tāna e parau i tāna tamāhine.
’Ua taiā ri’i to’u ’ā’au. ’Ua ti’a na vau i roto i te tahi mau ’āmuira’a metua ’e ’orometua ha’api’i, i reira vau i te ’itera’a i te mau metua i te parau-fa’ahapa-ra’a i tā rātou mau tamari’i i mua i te mau ’orometua ha’api’i ’e te mau tauturu ha’api’ira’a, ma te fa’ahapa ia rātou nō tō rātou hupehupe, tō rātou ha’apa’o ’ore ’e tō rātou ’ana’anatae ’ore. ’Ua fa’aineine au nō te fa’aro’o fa’ahou i te reira.
Terā rā, ’ua māere au i te mea tā’u i fa’aro’o. ’Ua fāriu a’era te metua tāne ha’eha’a o Sandra i ni’a i tāna tamāhine 16 matahiti tei teimaha roa i te ha’amā ’ē te tātarahapa ’e nā ’ō atura i ni’a iho iāna ē, « ’Aita i tāere roa. ’Aita i tāere roa nō ’oe ’ia manuïa. ’Aita roa atu i tāere roa ».
’Ua haere au i rāpae i taua putuputura’a ra ma te ’oa’oa nō te here tāna i fa’a’ite, ma te māna’ona’o ato’a rā ē, ’aita roa ’oia e ’ite ra i te fifi nō tāna tamāhine ’ia ūpo’oti’a i teie taime. Mai te huru ra ē, ’aita roa atu e rāve’a. I muri a’e ’ua tae mai te parau fa’a’ite ē, ’ua fa’aoti ’oia e fa’aru’e i tāna ha’api’ira’a ’ā’amu ’eiaha rā tā’u ha’api’ira’a reo peretāne.
’A ri’a i taua mahanā ra, ’a tūturi ai au i raro nō te pure, ma te feruri i tō’u iho mau hapehape, ’e ma te ani i tō’u Metua i te Ao ra ’ia fa’a’ore mai i tō’u hape, ’ua ’ite a’era vau i te mau mea e rave rahi ’o te ti’a iā’u ’ia ’apo mai nā roto mai i te metua tāne o Sandra. I te tahi mau taime i roto i tō’u orara’a, ’ua tupu ato’a te tapitapi ’e te mana’o pāpū ’ore, ’e ’ua feruri au, e ti’a ānei ’aore rā e tano ānei ’ia fāna’o vau i te tāmata fa’ahou ā nō te piti o te taime. I roto i taua mau taime ra, mai te metua tāne o Sandra, e mā’iti te Fatu ’eiaha ’e fa’ahapa mai iā’u, e tāmarū mai rā ma te parau : « ’Aita i tāere roa, ’e ta’u tamāhine. ’Aita i tāere roa ».
Te parau poro’i o te ’evanelia
E aha te pinepinera’a tō tātou ti’aturira’a i te poro’i a te ’enemi ē, ’aita e rāve’a fa’ahou ā ? E mea ta’a ’ē rā tā te mau peropheta e parau mai nei ia tātou. Tē parau ra Isaïa ē : « ’A ho’i ai ’oia ia Iehova, ’e nāna ’oia e aroha mai ; e ho’i i tō tātou Atua, tē rahi ra ho’i iāna te fa’a’ore i te hara » (Isaïa 55:7). ’Ua fa’a’ite ato’a mai Moromona i tōna ’itera’a : « ’Ia tātarahapa rā rātou ’a tītau ai ’ia fa’a’orehia te hara ma te mana’o pāpū, ’ua fa’a’orehia ïa te hara » (Moroni 6:8). Te ’oa’oa o te ’evanelia, ’oia ho’i ’aita i tāere roa. Inaha ’ia ’imi pinepine ana’e tātou i te fa’a’orera’a hara, e ti’a ïa ia tātou ’ia ha’amata ’āpī fa’ahou ā nā roto i te tāra’ehara a te Fatu.
Nō tōna hina’aro ’ia ha’amata fa’ahou ā, ’ua rave ’o Sandra i te mau tāuira’a pāpū noa atu ē, e mea marū noa. ’Aita i ’ōhie te tāuira’a—’ua tītauhia iāna ’ia tauto’o noa i te mau mahana ato’a nō te upo’oti’a i ni’a i tāna mau peu ’ino—terā rā, ’ua ’ite ’oia i te maita’i o tāna tauto’ora’a, ’ua mara’a tāna mau nūmera.
I roto i te hi’ora’a o te ’evanelia, e’ita e tai’ohia te māorora’a o tō tātou ravera’a i te hape ’e ’aore rā te hōhonu tō tātou ’ōra’a i tō tātou ’āpo’o. E ha’avā rā te Fatu i tō tātou orara’a ’ia au i te ’avei’a e ravehia e tātou, mai te aha te huru tō tātou tātarahapara’a, e mai te aha te huru tō tātou ti’aturi i ni’a i te tāra’ehara a te Fatu.
I roto i tō’u hāro’aro’ara’a, ’ua fē’a’a vau i te ti’ara’a o Sandra ’ia upo’oti’a i ni’a iho i tāna mau hape i muta’a iho ra. ’Āre’a tō tātou Metua maita’i hope, e’ita roa e mo’e tōna ti’aturi i ni’a i te ti’ara’a o tāna mau tamari’i ’ia fa’atupu i te fa’aorara’a nā roto i te maita’i-roa-ra’a i roto i te Mesia. ’Aita e hi’ora’a ē, e aha te āteara’a tātou ; e ’imi tāmau noa ’oia i te hō’ē. Tē tāparu mai nei te Fatu ia tātou ’eiaha e ’ōvere fa’ahou mai te ta’ata ’e’ē i roto i te hara, e ’imi rā iāna ma te ti’aturi ’e e ’oa’oa i te mau ha’amaita’ira’a o tōna tāra’ehara hope’a ’ore. ’Oia ïa, ’aita i tāere roa.