2017
O Le Valaauina o Uluai Aposetolo o le Toefuataiga
October 2017

O Le Valaauina o Uluai Aposetolo o le Toefuataiga

I le aso 8 o Aperila, 1835, sa talosaga atu ai Iosefa Samita ia uso Polika ma Iosefa Iaga e pepese mai ia te ia. Ona maua ai lea e le Perofeta se faaaliga e faapea, ua oo i le taimi mo le valaauina o le Au Aposetolo e Toasefululua.1

Sa talosaga atu Iosefa Samita ia Polika Iaga e auina atu se faaaliga e faapea, o le a tauaofia se konafesi i le Aso Toonai na sosoo ai. Sa ia tau atu ia Polika o le a avea o ia ma se tasi o le Toasefululua.2

I le ono aso mulimuli ane, sa faapotopotoina ai le Au Paia. Na saunoa Iosefa Samita, o se tasi o faamoemoega autu o le fonotaga sa mo Molimau e Toatolu o le Tusi a Mamona o—Oliva Kaotui, Tavita Uitimera, ma Matini Harisi—“e filifilia ni tamalii se toasefululua mai le ekalesia e avea ma Aposetolo.”3 Na muamua maua e Oliva ma Tavita lena tofiga ia Iuni 1829, ae e ui ina sa laua “fesili atu i le Alii e ala i le anapogi ma le tatalo” e faailoa mai le Toasefululua, peitai sa lei talafeagai ai i lena taimi.4 Na saunoa Iosefa, o lenei la ua oo mai le taimi.

O le Toasefululua (i le faasologa na fofoga atu ai i le fonotaga) o Lyman Johnson, 23 tausaga; Polika Iaga, 33; Heber C. Kimball, 33; Orson Hyde, 30; David W. Patten, 35; Luke Johnson, 27; William E. McLellin, 29; John F. Boynton, 23; Orson Pratt, 23; William Smith, 23; Thomas B. Marsh, 34; ma Parley P. Pratt, 27. O i latou uma sa auauna atu muamua i ni misiona. E toavalu sa malaga faatasi atu ma Iosefa Samita i le vaega o le Tolauapiga a Siona i le taumafanafana na muamua atu.5

Ina ua maea lo latou tofiga, sa faapea loa ona faauuina ia Aposetolo taitoatasi.6 Sa faatumulia faamanuiaga o o latou faauuga i folafolaga o le manuia i le faafaifeautalai. Sa manatua mulimuli ane e Heber C. Kimball, sa “valoia [i faamanuiaga] le tele o mea o le a tutupu, e faapea, e tatau ona tatou maua le mana e faamalolo ai mai, e tuliesea ai tiapolo, faatutu mai e ua oti, faapupula e tauaso, … aveese ai mauga, ma o mea uma e tatau ona faalagolago ia i tatou e ala i le suafa o Iesu Keriso.”7

Sa faamamafa atu foi e Oliva Kaotui ia faafitauli o le a latou fetaiai: “Ia saunia i taimi uma e fai se osigataulaga [sic] o o outou soifua, pe a manaomia ai e le Atua i le agai i luma ma le atinaeina o lona faamoemoega.” Sa uunaia e Oliva le Au Aposetolo e saili le malamalama patino e uiga ia Iesu Keriso ina ia mafai ona latou molimau atu ma le mautinoa e uiga i Lona i ai: “Ia aua nei uma le taumafai seia oo ina outou vaai faafesagai ma le Atua.”8

Sa amata atu ia Me o le 1835, ona amatalia e le Au Aposetolo nisi o misiona talai mo le Ekalesia, ma sa faamanuiaina e la latou taitaiga lautele le toatele o tagata taitasi.

Faamatalaga

  1. Tagai i le History, 1838–1856 (Manuscript History of the Church), volume B-1 [1 September 1834–2 November 1838],” addenda, note A, page 1, josephsmithpapers.org.

  2. Tagai i le Joseph Young, History of the Organization of the Seventies (1878), 1.

  3. “Minutes, Discourses, and Blessings, 14–15 February 1835,” i le Joseph Smith Papers, Documents, Volume 4: April 1834–September 1835, 224–28.

  4. “Minutes and Blessings, 21 February 1835,” i le Joseph Smith Papers, Documents, Volume 4: April 1834–September 1835, 242, 243.

  5. O le toafa sa lei avea ma vaega o le tolauapiga o David W. Patten, Thomas B. Marsh, William E. McLellin, ma John F. Boynton.

  6. E na o le toaiva o le Toasefululua sa auai i le fonotaga i le aso 14 o Fepuari, 1835. Sa faauuina Parley P. Pratt i le aso 21 o Fepuari, 1835, ae o Thomas B. Marsh ma Orson Pratt sa faauuina faatasi i le aso 26 o Aperila, 1835.

  7. “Extracts from H. C. Kimball’s Journal,” Times and Seasons, Ape. 15, 1845, 868.

  8. “Minutes and Blessings, 21 February 1835,” i le Joseph Smith Papers, Documents, Volume 4: April 1834–September 1835, 244.