Usa ka Tubag alang ni Lucia
Ang tagsulat nagpuyo sa California, USA.
Naglibug si Lucia unsay gisulti sa iyang magtutudlo. Kinsay makatabang?
“Nahigugma ko’s kasulatan, Ug sa pagbasa ko, Gibati kong ania ang Espiritu—nagmatuod nga tinuod” (Songbook sa mga Bata, 66).
Gipahiran ni Lucia ang iyang luha. Dili siya gusto nga ang ubang mga bata makakita. Mibiya siya sa eskwelahan ug mipauli.
Nagpuyo si Lucia sa gamay, matahum nga isla. Siya lamang ang bugtong miyembro sa Simbahan sa eskwelahan. Ang tanan pareha ra og simbahan. Sungugon nila si Lucia ug dili makigdula niya tungod kay siya lahi.
Dili lang kana ang problema. Usahay ang mga magtutudlo mobaliwala ni Lucia kon mopataas siya sa iyang kamot.
“Apan karon mao ang pinakagrabe!” Naghunahuna si Lucia. Mipatid siya og batong gagmay diha sa dalan. Atol sa klase, ang magtutudlo nagbasa og pipila ka mga bersikulo sa Biblia nga wala masabti ni Lucia. Mora og giingon nga ang Langitnong Amahan, si Jesus, ug ang Espiritu Santo usa ra ka tawo. Dayon ang magtutudlo miingon nga dunay pipila ka simbahan nga wala motuo unsay gitudlo sa Biblia. Diretso siyang mitan-aw ni Lucia. Ang tanan sa klase mikatawa.
Naglibug si Lucia. Dili ba nga bulag man ang Langitnong Amahan, si Jesus, ug ang Espiritu Santo? Unsay nahitabo?
Sa kalit dunay siyay malipayon nga hunahuna. Makapangutana siya sa mga misyonaryo! Moadto sila sa balangay ni Lucia kada adlaw. “Nasayud sila unsaon sa pagtabang!” naghunahuna siya.
Sa dihang nakauli na si Lucia, nakita niya sila si Sister Brown ug Sister Ruiz. Nagtabang sila sa pagbomba og tubig ngadto sa tangke sa atop.
Nangutana dayon si Lucia. “Ngano nga ang Biblia miingon nga ang Langitnong Amahan ug si Jesus usa ra nga tawo?”
Mipahiyom si Sister Brown. “Nindot kana nga pangutana. Pagkahuman sa paniudto mangita ta og mga kasulatan nga makatabang.”
Wala ganahi mokaon si Lucia sa lamian nga ropa vieja stew nga giluto ni Mama. Ang iyang gusto mao ang tubag!
Nahuman na gyud ang paniudto. Si Lucia ug ang mga misyonaryo miabli sa ilang mga kasulatan. Gibasa nila ang panan-awon ni Joseph Smith. Dayon gibasa nila ang bunyag ni Jesus. Ang duha ka mga kasulatan nagpakita nga ang Langitnong Amahan, si Jesus, ug ang Espiritu Santo bulag.
“Kon mao nganong kadtong laing mga kasulatan nag-ingon nga usa ra sila?” pangutana ni Lucia.
Gisugdan pagpakli ni Sister Brown ang mga pahina. “Basahon nato ang Juan 17. Diha niana si Jesus nag-ampo ngadto sa Langitnong Amahan bahin sa Iyang mga Apostoles.”
Nagpuli-puli sila sa pagbasa. Sa mga kasulatan, nag-ampo si Jesus nga ang Iyang mga Apostoles “magkahiusa” sama nga Siya ug ang Langitnong Amahan usa. Nakaihap si Lucia og tulo ka managlahi nga higayon nga gisulti Niya kini.
“Ang mga Apostoles dili mahimong usa ka tawo,” miingon si Sister Ruiz. “Apan sila mahimong usa sa ilang pagtuo ug paglihok. Mao kana kon sa unsa nga paagi ang Langitnong Amahan, si Jesus, ug ang Espiritu Santo usa ra.”
Nagsugod sa pagbati og kainit si Lucia. Nasayud siya mao kadto ang Espiritu Santo. Nagsulti kaniya ang Espiritu Santo nga unsay gisulti ni Sister Ruiz tinuod.
Ang Langitng Amahan ug si Jesus dili usa ra nga tawo. Apan Sila usa ra sa unsay Ilang gisulti ug gibuhat. Ug nasayud si Lucia nga Silang duha nahigugma kaniya.