Ang Katingad-an Nakong Silingan
Ang tagsulat nagpuyo sa Victoria, Australia.
Diha ko sa punto sa akong kinabuhi nga magul-anon kaayo, apan ang pagkuyog sa akong silingan ngadto sa simbahan nakapausab sa tanan.
Paghulagway pinaagi ni Rafael Mayani
Pipila ka tuig ang milabay nagmagul-anon ko tungod kay gibati nako nga walay usa nga kasultihan. Ang akong pamilya tua sa layo ug wala koy mga higala, mao nga dili na nako matugkad ang ideya nga magpakabuhi pa.
Nagpuyo ko uban sa akong tiya ug tiyo, ug ang bugtong butang nga ilang gisulti nako nga dili buhaton mao ang pagpakigsulti sa silingan. Miingon sila nga siya katingad-an, ug maghimo-himo sila og istorya bahin kaniya aron sa paghadlok kanako.
Bisan pa niana, usa ka Sabado siya ug duha ka babaye nga tin-edyer nga akong kaedad mihangyo sa akong tabang sa paghimo og koral. Miuyon ko ug mitrabaho.
Human makaobserbar niini nga mga babaye, nakaamgo ko nga buotan sila, mao nga nagsugod ko sa pagpakig-istorya nila, nga misangpot sa panag-istorya bahin sa Ang Simbahan ni Jesukristo sa mga Santos sa Ulahing mga Adlaw. Duna koy daghan kaayong mga pangutana, nga ilang natubag. Naintriga ko. Ang akong silingan miimbitar nako nga mouban kaniya ngadto sa simbahan pagkasunod adlaw aron makita kon unsa kini. Diha ko sa punto sa akong kinabuhi nga magul-anon kaayo, mao nga sa akong hunahuna walay mawala nako.
Naglakaw pasulod sa pultahan pagkasunod buntag, gibati nako diha-diha ang kalinaw nga wala nako masabti, apan nasayud ko nga kini ang simbahan nga kinahanglan nga anaa ako. Gipaila-ila ko ngadto sa mga misyonaryo nianang buntaga, ug nakita nako sa unsa nga paagi sila nasayud nga ang Simbahan tinuod.
Nagsugod ko sa pagpaminaw sa lain-laing mga leksyon gikan sa mga misyonaryo. Dili nako mahangyo ang Langitnong Amahan sa pagpadala nako niadtong duha ka mahigugmaon, mapinanggaon, ug espiritwal nga mga misyonaryo sa mas nindot nga panahon. Pinaagi sa ilang tabang nakaangkon ko sa kahibalo nga anaa kanila bahin sa ebanghelyo.
Human makapaminaw nila kon sa unsa nga paagi nga ang ilang kahibalo sa Langitnong Amahan nakatabang nila sa mga pagsulay, gibati nako nga kinahanglan kong mag-ampo aron mahibaloan kon ang ilang gisulti tinuod ba. Human mag-ampo, gibati nako ang hilabihan nga kalipay, kalinaw, ug kakalma sa akong kaugalingon. Nasayud ko nga nakadawat ko og tubag nianang gabhiona pinaagi sa Espiritu Santo.
Nakabaton niini nga kahibalo, dali nga milambo ang akong pagpamatuod. Sukad nga miapil sa Simbahan niadtong 2013, nakita gayud nako ang mga panalangin nga gihatag nako tungod sa pagkahibalo sa atong Langitnong Amahan. Mapasalamaton ko niadtong mga misyonaryo ug sa akong silingan nga miimbitar nako sa pagduol ngadto ni Kristo.