Football, Ma-Dominggo, ug Espirituhanong Pagkahagba
Alang ni Will, ang pagpili nga dili modula og football ma-Dominggo nagpasabut nga dili modula sa usa sa labing maayong mga team.
Sa bata pa ko, ang akong mga higala ug ako magdula sa gitawag og “Jump or Dive” [Lukso o Sawom] Kasagaran, ang tanan nimong kinahanglan mao ang lawom nga pool o linaw ug kanang kaluksuan, sama sa diving board. Sa pagdula, molukso ka gikan sa diving board. Sa samang higayon, dunay mosinggit, “lukso,” nga nagpasabut nga kinahanglan nga unang motugdon sa tubig mao ang imong tiil, o “sawom,” nagpasabut nga kinahanglan nga ang unang motugdon sa tubig mao ang kamot, sa pagsawom.
Kon ikaw maglihok kon naa pa sa hangin, sa kasagaran mosangpot kini nga ang imong mga kamot ug mga tiil naglihok sa bisan asang direksyon o makaingon sa sakit kaayo nga pagkahagba sa tubig.
Ang kinabuhi dili kinahanglan nga sama sa dula nga “Jump o Dive” Makahimo ka og daghang mga desisyon og mas sayo-sayo ug makalikay sa espirituhanong belly flops. Ang propeta sa Daang Tugon nga si Josue wala ba moingon, “Pili sa dili pa kini ulahi.” Miingon siya, “Magpili kamo niining adlawa kon kinsa ang inyong alagaron” (Josue 24:15; emphasis gidugang).
Si Will W., 14, gikan sa San Francisco, California, USA, tingali wala mohimo og daghang espirituhanong belly flops tungod kay nagtuo siya sa paghimo og mga pagpili sa dili pa ang katapusang minuto.
“Kon ikaw mohimo og pagpili sa pagbuhat o dili pagbuhat sa dili pa kini moabut, mas sayon kini himoon,” miingon siya. “Ingnon ta nga miadto ka sa usa ka party ug dunay mitunol nimo og ilimnon. Kon ikaw kinahanglang mopili dihang tungura sa pagdawat niini o dili, tingali ikaw matintal sa pagdawat niini. Apan kon ikaw dugay nang nakahukom sa pag-ingon og dili kon si bisan kinsa mohatag nimo og mainom, mas makasiguro ka sa imong kaugalingon. Wala na gani panahon nga matintal ka pa. Moingon ka og dili tungod kay dugay ka nang nakahukom.”
Ang 2018 nga tema sa Mutual nag-ingon, “Pagkat-on kanako, ug paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako” (D&P 19:23) Alang ni Will, ang kalinaw nagpasabut nga mobati nga masaligon samtang mopili siya sa matarung ug dili mabalaka sa negatibo nga mga komentaryo gikan sa uban. Kana nga kalinaw miabut ngadto ni Will gikan sa paghimo og desisyon sa pagpaminaw—ug pagsunod sa mga pulong—ni Jesukristo sa sayo pa.
“Usahay ang mga bata magpabadlong nako unsay akong buhaton o dili, apan wala kaayo ni makadisturbo nako tungod kay dugay nakong nakahukom nga ingon ana ako magpakabuhi,” miingon siya.
Usa sa butang nga dugay nang nahukman ni Will ug sa iyang pamilya mao ang pagbalaan sa adlaw nga Igpapahulay. Medyo lisud kana og gamay sa dihang si Will nakasulod sa nag-unang football team. Apan, sama ni Nephi, ang iyang pamilya nasayud nga “ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7).
Alang ni Will, ang football mao ang labing importante sa iyang kinabuhi. Ang iyang mama miingon, “Ang tanan niyang gibuhat may kalabutan sa football tungod kay ganahan kaayo siya niini. Mao kini ang iyang pasyon ug maayo kaayo siya niini.”
Mao nga sa dihang giimbitar si Will sa pag-apil sa labing malampuson nga mga team sa ilang dapit, giganahan siya. Ang bugtong problema: ang team modula kasagaran sa ilang mga dula sa ma-Dominggo. Kadaghanan sa mga team dili modawat og player nga mopalta sa kada Dominggo nga dula. Ang pagpili nga dili modula sa ma-Dominggo nagpasabut nga mawala ang iyang lugar sa team.
Apan si Will dugay nang nakahimo niana nga desisyon. Iyang ibalaan ang adlaw nga Igpapahulay.
Si Will ug ang iyang pamilya nag-ampo ug misulti sa Langitnong Amahan sa ilang tinguha sa pagtuman sa Iyang mga sugo ug nangayo sa Iyang tabang. Dayon si Will ug ang iyang inahan nakigsulti sa mga coach sa team bahin sa ilang mga pagtuo. Sa ilang kasurprisa, ang mga coach gusto nga si Will naa gihapon sa team bisan og dili siya makadula sa ma-Dominggo!
“Nasayud ko nga kon motahud ko sa Igpapahulay mapanalanginan ko,” miingon si Will. “Dili tingali ko makadula og daghang mga dula sama sa uban, apan nakita nako ang mga panalangin, sama nga ang mga dula sa Dominggo kalit lang nausab ngadto sa laing adlaw. Naghunahuna usab ko nga mas makadula ko og maayo kay duna koy adlaw sa pahulay.”
Mas maanindot pa. Sa wala madugay nahibaloan ni Will nga usa sa iyang kauban sa team miyembro usab sa Simbahan. Paglabay sa pipila ka bulan sa pagdula, ang laing batan-on misunod sa ehemplo ni Will ug mihunong usab sa pagdula sa Dominggo.
Kon ikaw mobati nga ikaw wala makadawat sa mga panalangin sa pagkamasulundon, tingali tungod kay dili nimo makita ang tanan nga giandam sa Langitnong Amahan kanimo. Ang paghukom sa pagpaminaw sa mga pulong ni Kristo ug sa pagserbisyo sa Ginoo mao ang sakto nga desisyon kanunay, mao nga buhata kini karon!
“Nangamuyo ako kaninyo sa paghimo og determinasyon dinhi mismo, karon mismo, nga dili mosimang gikan sa dalan nga padulong ngadto sa atong tumong: kinabuhing dayon uban sa atong Amahan sa Langit,” miingon si Presidente Thomas S. Monson (“Ang Tulo ka K sa Pagpili,” Liahona, Nob. 2010, 68).
Ayaw himoa ang inyong kinabuhi nga usa ka dula sa “Jump o Dive.” Ayaw irisgo ang espirituhanon o bisan unsa nga laing matang sa belly flops. Paghimo og desisyon karon sa pagsunod ni Jesukristo ug tagamtama ang kalinaw nga Iyang gidala sa inyong kinabuhi.