Mga Hulagway sa Hugot nga Pagtuo
Amanda Jiri
Cape Town, South Africa
Sa dihang nahimong mahagiton ang pagkatin-edyer ni Amanda, mihunong siya sa pag-adto sa Simbahan nga nangita og bag-ong mga kasinatian. Human sa pipila ka tuig, gibati ni Amanda ang kahaw-ang. Ang pagpangita sa kalipay nagsugod sa usa ka importante nga pangutana.
Cody Bell, litratista
Ang akong pamilya nabunyagan niadtong 1993. Nagdiborsyo ang akong mga ginikanan paglabay sa pipila ka tuig, ug hinay-hinay ang akong mga igsoon wala na moadto sa Simbahan. Niadtong 1998, sa dihang diha ko sa ika-11 nga ang-ang sa pag-eskwela, mihunong usab ko sa pagtambong.
Gisaaran nako ang akong kaugalingon nga mangita ko og bag-ong mga butang ug laing simbahan. Nakadawat ko og daghang imbitasyon gikan sa mga higala sa pag-adto sa ilang mga simbahan, apan wala ko moadto kanunay. Wala ko moadto tungod kay gibati gihapon nako nga dunay koneksyon sa Simbahan. Tungod lang gyud sa dili maayong rason, nga nakapugong nako sa pag-adto. Dili ko makamata, o duna koy laing mga plano, o maghimo lang ko og pasumangil.
Dili ko aktibo sulod sa mga walo ka tuig. Atol niining panahona, nasagol ko sa dili maayong mga higala. Ang akong mama himatyon na. Nagmasulub-on ko. Gibati nako ang kahaw-ang. Nagsugod ko sa paghunahuna, “Kanus-a ako katapusan nga nalipay sa tinud-anay?”
Kon inyong tan-awon ang akong kinabuhi gikan sa gawas maghunahuna mo, “Naa niya ang labing nindot nga kinabuhi!” Gilibutan ang akong kaugalingon sa inila nga mga tawo ug nakita nga duna koy nindot nga kinabuhi. Apan gibati gihapon nako ang kahaw-ang ug dili kompleto
Dayon naghunahuna ko sa dihang diha ko sa Young Women. Akong naamgohan nga didto ang katapusan nga gibati nako ang tinuod nga kalipay. Nakahukom ko nga mobalik ngadto sa simbahan sa sunod nga Dominggo. Nahimamat nako ang branch president ug nagsugod sa akong panaw sa paghinulsol.
Sa wala madugay, gitawag ko nga motrabaho uban sa Young Women. Gisag-ulo namo ang tema sa Young Women, nahinumduman nako diha-diha! Karon, matag higayon nga akong sag-uluhon ang tema, makadawat ko og kumpirmasyon nga diha nga Simbahan ako mahisakop.