Mensahe sa Unang Kapangulohan
Ang Gasa sa Paghinulsol
Ni Presidente Thomas S. Monson
Detalye gikan sa Beside Still Waters, ni Simon Dewey
“Ang atong responsibilidad mao ang pagbarug gikan sa pagkaigo-igo lang ngadto sa pagkabanggiitan, gikan sa kapakyasan ngadto sa kalampusan,” mitudlo si Presidente Thomas S. Monson. “Ang atong tahas mao ang mahimong pinakamaayo sa atong kaugalingon. Usa sa labing mahinungdanong gasa sa Dios ngari kanato mao ang kalipay nga mosulay pag-usab, kay walay kapakyasan nga maoy katapusan.”1
Sa kasagaran atong ilambigit ang pag-abut sa bag-ong tuig uban sa mga resolusyon ug mga tumong. Mosaad kita nga mouswag, mousab, mosulay pag-usab. Tingali ang labing importante nga paagi nga kita makasulay pag-usab mao ang paghimo unsay gitawag ni Presidente Monson nga “ang gasa sa paghinulsol.”2
Sa mosunod nga kinutlo gikan sa iyang mga pagtulun-an sukad nahimo siyang Presidente sa Simbahan, si Presidente Monson mitambag nato nga “dihogi sa inula nga dugo ni Kristo nga kami mahimo nga makadawat sa kapasayloan sa among mga sala, ug ang among mga kasingkasing mahimo nga putli.”3
Ang Milagro sa Kapasayloan
“Kitang tanan nakahimo og sayop nga mga pagpili. Kon wala pa nato makorihii kana nga mga pagpili, mopasalig ako kaninyo nga adunay paagi sa pagbuhat sa ingon. Ang proseso gitawag og paghinulsol. Nangamuyo ako kaninyo sa pagkorihir sa inyong mga sayop. Ang atong Manluluwas namatay aron sa paghatag kaninyo ug kanako nianang balaan nga gasa. Bisan tuod ang dalan dili sayon, ang saad tinuod: ‘Bisan pa ang inyong mga sala mapula, sila pagapution ingon sa nieve.’ [Isaias 1:18]. ‘Ug Ako, ang Ginoo, dili na mahinumdom kanila.’ [D&P 58:42]. Ayaw ibutang sa risgo ang inyong kinabuhing dayon. Kon nakasala kamo, ang ingon ka dali sa pagsugod ninyo sa pagbalik, ingon usab ka dali nga inyong makaplagan ang nindot nga kalinaw ug kalipay nga moabut uban sa milagro sa pagpasaylo.”4
Balik sa Dalan
“Bisan og importante nga kita mopili sa malaamong paagi, dunay mga higayon nga kita makahimo og dili maayong mga pagpili. Ang gasa sa paghinulsol, nga gihatag sa atong Manluluwas, makahatag nato og higayon sa pagkorihir sa atong kahimtang, aron kita mobalik sa dalan nga modala nato ngadto sa celestial nga himaya nga atong gitinguha.”5
Ang Paagi sa Pagbalik
“Kon aduna kaninyoy napandol sa iyang panaw, mosaad ko kaninyo nga dunay paagi sa pagbalik. Ang proseso gitawag og paghinulsol. Bisan tuod ang dalan lisud, ang inyong mahangturong kaluwasan magdepende niini. Unsa man ang mas angay pa sa inyong mga paningkamot? Mangamuyo ko kaninyo sa pagdeterminar dinhi ug karon sa paghimo sa gikinahanglang mga lakang aron hingpit nga maghinulsol. Kon mas sayo ninyo kining buhaton, mas sayo ninyong masinati ang pakigdait ug kalinaw ug pagsalig nga gipamulong ni Isaias [tan-awa sa Isaias 1:18].”6
Mahimo nga Mausab ang mga Tawo
“Atong hinumduman nga mahimo nga mausab ang mga tawo. Mahimo nilang talikdan ang ngil-ad nga mga kinaiya. Makahinulsol sila sa mga kalapasan. Makahupot sila nga takus sa priesthood. Ug makaserbisyo nga makugihon sa Ginoo.”7
Malimpyo Nausab
“Kon adunay bisan unsa nga dili tarung sa inyong kinabuhi, kamo adunay paagi sa pagbuntog niini. Hunonga ang bisan unsa nga dili matarung. Pakigsulti sa inyong bishop. Bisan unsa ang problema, masulbad kini pinaagi sa tukmang paghinulsol. Kamo mamahimong limpyo pag-usab.”8
Ang Importante nga Tahas sa Manluluwas
“Ang mahinungdanong bahin sa plano [sa kaluwasan] mao ang atong Manluluwas, si Jesukristo. Kon wala ang Iyang maulaong sakripisyo, ang tanan mawala. Hinoon, dili igo, ang magtuo lamang Kaniya ug sa Iyang misyon. Kinahanglan kitang molihok ug magkat-on, mangita ug mag-ampo, maghinulsol ug molambo. Kinahanglan kitang masayud sa mga balaod sa Dios ug mosunod niini. Kinahanglan kitang makadawat sa Iyang makaluwas nga mga ordinansa. Pinaagi lamang sa pagbuhat nga kita makaangkon sa tinuod, nga mahangturon nga kalipay.”9