Pasigaa ang Inyong Kahayag
Ni Presidente Thomas S. Monson
Gikan sa “Be a Light to the World” (Brigham Young University devotional, Nob. 1, 2011), speeches.byu.edu.
Matag usa kanato mianhi sa yuta uban sa Kahayag ni Kristo. Responsibilidad nato sa pagpadayon sa pagpasiga sa atong kahayag aron makita ug sundon sa uban. Ang pipila sa epektibo kaayong mga paagi sa pagpadayon sa pagtuo nga atong gikinahanglan mao ang pagtuon sa mga kasulatan ug sa pag-ampo.
Kon padayunon ninyo ang kainit sa pagpamatuod nga magsiga, mahimo kamong usa ka signal light sa pagkamatarung aron makita sa tanan. Miingon ang Manluluwas, “Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit” (Mateo 5:16).
Ang atong mga oportunidad sa paghatag og kahayag walay kinutuban. Anaa kini sa atong palibut matag adlaw. Sa atong pagsunod sa ehemplo sa Manluluwas, mahimo kitang kahayag sa kinabuhi niadtong naglibut kanato—bisan sila atong kaugalingong mga sakop sa pamilya, atong mga higala, o hingpit nga estranghero.
Mahimo kitang usa ka kahayag ngadto sa kalibutan. Sama sa pagpasiga sa usa ka switch sa suga sa mangitngit nga kwarto mohatag kini sa kwarto sa kahayag, ang pagka-ehemplo sa pagkamatarung makatabang sa pagpahayag sa nagkangitngit nga kalibutan.
Akong mga higala, kita mahimo, sama sa gisulti ni Apostol Pablo, “alang sa magtutuo pagkinabuhi ingon nga panig-ingnan” (1 Timoteo 4:12). Kanunay kitang mailhan isip mga sumusunod ni Kristo ug mahimong “ingon nga kahayag sa kalibutan” (Mga Taga-Filipos 2:15).