Hangtud sa Sunod Natong Panagkita
Ang Katuyoan sa Paglalang
Gikan sa “Celestial Marriages and Eternal Families,” Ensign, Mayo 1980, 15–18. Ang spelling ug punctuation gi-standardize.
Matag usa nato makahimo sa atong panimalay nga usa ka langit dinhi sa yuta.
Atong hunahunaon … ang katuyoan sa paglalang sa yuta. Ang mga kasulatan miklaro nga kini … mao ang paghatag og usa ka dapit alang sa anak nga mga lalaki ug anak nga mga babaye sa Dios sa pagpuyo sa pagkamortal ug pamatud-an ang ilang kaugalingon nga takus, pinaagi sa pagsunod sa mga sugo, aron makabalik sa presensya sa Dios diin sila nagagikan.
Human sa Paglalang sa yuta, “Miingon ang Dios, Buhaton nato ang tawo sumala sa atong dagway, ingon sa kasama nato. …
“Ug gibuhat sa Dios ang tawo sa iyang kaugalingong dagway, sa dagway sa Dios gibuhat niya sila; lalaki ug babaye iyang gibuhat sila.
“Ug gipanalanginan sila sa Dios, ug miingon ang Dios kanila, Sumanay, ug dumaghan kamo, ug pun-on ninyo ang yuta, ug magagahum kamo niini” (Genesis 1:26–28).
Sa dihang ang Dios milalang sa babaye ug gidala ngadto sa lalaki, mingon siya:
“Tungod niini ang lalaki magabiya sa iyang amahan ug sa iyang inahan, ug moipon siya sa iyang asawa: ug sila mahimong usa ka unod” (Genesis 2:24).
Oo, ang kaminyoon gi-orden sa Dios, ug human nianang unang pagpasabut sa bana ug asawa, atong makita ang pagbalik-balik sa mga kasulatan isip ebidensya nga ang mga lalaki ug mga babaye nahimong mga bana ug mga asawa diha sa mga seremonya sa kaminyoon human sa mga kasaulogan sa kasal. … Wala kita moanhi aron lamang sa “kaon, inom, ug paglipay” (2 Nephi 28:7). …
Importante nga atong masabtan, sama sa atong nakat-unan gikan sa mga kasulatan, nga ang Dios mahangturon, nga ang Iyang mga nilalang mahangturon, ug nga Iyang mga kamatuoran mahangturon. Busa, sa dihang Iyang gihatag si Eva ngadto ni Adan diha sa kaminyoon, kana nga panag-usa mahangturon. …
… Kon ang mga ginikanan nakasabut sa katuyoan sa ilang pagpakatawo, nga sila literal nga espiritwal nga mga anak sa ilang Amahan sa Langit ug nga sila adunay responsibilidad sa paghatag og mortal nga mga lawas alang sa uban, nan magmaya sila sa milagro sa pagkahimugso samtang sila makaamgo nga sila kauban sa Dios sa paglalang sa matag bata nga moabut niana nga panimalay. …
Nasayud ko nga pinaagi sa ebanghelyo ni Jesukristo ug pinaagi sa pagsunod sa mga sugo sa Dios ug sa mga pakigsaad nga atong gihimo uban Kaniya, matag usa kanato makahimo sa atong panimalay nga usa ka langit dinhi sa yuta samtang nangandam kita sa atong kaugalingon ug sa atong mga anak sa pagbalik ngadto sa atong Langitnong Amahan.