Kabatan-onan

Pilia ang Paghinulsol

Mipasabut si Presidente Monson nga ang “atong responsibilidad mao ang pagbarug gikan sa pagkaigo-igo lang ngadto sa pagkabanggiitan, gikan sa kapakyasan ngadto sa kalampusan. Ang atong buluhaton mao nga mahimong pinakamaayo sa atong kaugalingon.” Daghang mga tawo nga ipahinungod ang Enero sa paghimo og mga tumong ug mga resolusyon sa pagpalambo: sa pagpahiyom pa, pagkaon og mas makapahimsog, o pagkat-on og bag-ong kahanas. Samtang kini nga mga tumong makatabang kaninyo nga mausab alang sa mas maayo, ang labing maayo nga paagi mao ang paghinulsol.

Bisan ang paghinulsol mahimong lisud, kini usa ka gasa! Kon kita mosalig ni Jesukristo pinaagi sa paghinulsol sa atong mga sala, molambo ug mouswag kita. Miingon si Presidente Monson, “Ang mahinungdanong bahin sa plano [sa kaluwasan] mao ang atong Manluluwas, si Jesukristo. Kon wala ang Iyang maulaong sakripisyo, ang tanan mawala.” Pinaagi sa paghinulsol, malimpyohan kamo sa inyong mga sala ug mouswag aron mahimong mas sama Kaniya.

Paghunahuna og butang nga mahimong nakapugong ninyo nga mahimong sama sa Manluluwas. Ang inyo ba nga pinulongan? Giunsa ninyo pagtagad ang inyong mga higala o pamilya? Human maghunahuna unsay inyong mapalambo, pag-ampo ngadto sa Langitnong Amahan ug ipadayag ang inyong tinguha nga mag-usab. Hinumdumi nga pinaagi sa gahum sa Iyang Pag-ula, si Jesukristo makatabang ninyo nga mabuntog ang inyong kahuyang. Sama sa gitudlo ni Presidente Monson, “Ang gasa sa paghinulsol, nga gihatag sa atong Manluluwas, kini makahimo nato sa pag-usab sa atong kinabuhi.”