Sa Unsa nga Paagi nga ang Institute Nakatabang Ninyo nga Makat-on sa Ebanghelyo
Sulayi kining tulo ka paagi aron kamo makapahimulos pag-ayo sa inyong mga klase sa institute of religion.
“Ang kalibutan karon mas mahagiton kay sa … katuigan nga milabay,” miingon si Elder M. Russell Ballard sa Korum sa Napulog Duha ka mga Apostoles. “Mas daghan ang makalinga sa atong mga batan-on gikan sa ilang mga pagpangandam alang sa misyon ug sa umaabut nga malipayong kinabuhi.” Karon, kay sa kaniadto sukad, kinahanglan kitang makat-on “unsaon nga mahibalo nga maminaw ug motuman sa mga pag-aghat sa Balaang Espiritu.”1
Aron matabangan kamo nga mahimong mas espirituhanong sensitibo, ang Simbahan mihatag sa institutes of religion. Ang institute makahatag ninyo og personal nga makahuluganong mga kasinatian uban sa pulong sa Dios.”2
Kon motambong mo sa institute, makapili mo gikan sa daghan kaayong mga klase. Ang mga magtutudlo nga nakasabut sa mga panginahanglan ug sa mga pangutana sa mga young adult motabang ninyo nga makat-on gikan sa mga kasulatan ug sa mga pagtulun-an sa mga propeta sa ulahing mga adlaw.
Usa ka bag-ong kausaban sa institute karon naghatag ninyo og oportunidad sa paggamit sa (1) mga study journal sa kurso, (2) mga pangutana sa kurso, ug (3) personal nga mga proyekto sa pagkat-on sa pagpalambo sa inyong pagkat-on ug pagpalig-on sa inyong pagtuo kang Jesukristo. Kining tulo ka opsyon sa pagtuon makatabang ninyo nga mahimong personal ang inyong pagtuon sa ebanghelyo ug personal nga makat-on sa unsang paagi ang Espiritu molihok diha ninyo.
Mga Study Journal sa Kurso
Si Elder Richard G. Scott (1928–2015) sa Korum sa Napulog Duha ka mga Apostoles mirekomendar sa pagsulat sa espirituhanong mga impresyon diha sa journal: “Isulat sa luwas nga lugar ang importanting mga butang nga inyong nakat-unan gikan sa Espiritu. Inyong makita nga kon isulat ninyo ang bililhong mga impresyon, sa kasagaran mangabut ang daghan pa.”3
Ang mga estudyante mogamit og journal (sa papel man o sa Gospel Library app) diha sa klase o sa balay sa pagsulat sa mga impresyon samtang sila magtuon sa mga kasulatan. Si Jayme Dhennz, usa ka estudyante sa institute sa Pilipinas, nakakita sa benepisyo sa paghimo og study journal: “Kinahanglan gyud nakong isulat ang mga tudling ug mga mensahe gikan sa mga kasulatan o mga pakigpulong sa mga propeta tungod kay mipalapad kini sa akong pagkat-on sa ebanghelyo.”
Ang mga estudyante ni Brother Seiichi Takahashi sa Nagoya, Japan, ganahan nga mag-journal tungod kay nakahimo kini “sa proseso sa pagkat-on nga natural nga mahitabo” ug nakatabang sa mga estudyante nga moabut sa klase nga mas andam nga makat-on ug moapil.
Si Taisia Bartolomeo sa habagatang Italy miingon, “Pinaagi sa pagsulat unsay akong nakat-unan, mas sayon nakong mahinumduman ang mga konsepto kon gikinahanglan kini nako.” Ang iyang classmate, nga si Mariaterasa Santoro, midugang, “Ang akong journal maoy butang nga akong kapangitaan sa paghinumdom og piho nga esprituhanong konsepto o personal nga pagpadayag.”
Mga Pangutana sa Kurso
Ang mga pangutana nga gihatag sa sinugdanan sa kurso makahatag sa mga estudyante og mga hilisgutan nga pamalandungan ug tun-an sa tibuok kurso. Sa katapusan, ang mga estudyante mosumiter sa ilang personal, gigiyahan sa Espiritu nga mga tubag ngadto sa ilang mga magtutudlo.
Si Ilaria Bellomo, usa ka estudyante sa habagatan sa Italy, mipasabut, “Ang mga pangutana nakapamalandong nako sa akong kinabuhi ug sa tinuod nga unsay akong natun-an sa institute nakatabang nako nga mas makaila ni Jesukristo.”
Si Jinseop Jeong, usa ka estudyante sa institute sa Korea, miingon, “Ang mga pangutana nakatabang nako nga maghunahuna pag-ayo ug pagribyu unsay akong nakat-unan. Usa kadto ka importante nga panahon sa pagribyu, pagpamalandong, ug pagsagop unsay akong nakat-unan.”
Ang espirituhanong pagtubo sa mga estudyante maklaro pinaagi sa ilang mga tubag. Si Sister Seonsim Kang, usa ka magtutudlo sa institute sa stake sa Korea, miingon, “Usa ka nindot nga kasinatian alang nako nga makabasa ug makat-on sa mga pagpamatuod ug mga hunahuna sa mga estudyante.”
Personal nga mga Proyekto sa Pagkat-on
Daghang mga estudyante sa institute mainampoong mipili sa pagbuhat og makahuluganong proyekto. Depende sa ilang mga interes, ang mga estudyante sa tibuok kalibutan nakahimo og gospel-related art, music, videos, ug social media posts. Kini nga mga proyekto nagdapit sa mga estudyante sa paggamit sa mga butang nga ilang nakat-unan diha sa klase. Pananglit, usa ka estudyante mipili nga magdibuho og litrato sa Manluluwas nga iuban sa kurso nga “Jesus Christ and the Everlasting Gospel.” [Si Jesukristo ug ang Walay Katapusan nga Ebanghelyo.]
Usa ka estudyante nga nagtambong sa “Eternal Family” [Mahangturong Pamilya] nga kurso mihimo og proyekto sa templo ug family history nga “natapos sa usa ka temple trip uban sa akong lola ug duol nga mga sakop sa pamilya diin nakompleto namo ang labaw sa 40 ka mga temple sealing nga naandam na sa tibuok semester. Nakapasuod kini sa among pamilya.”
Samtang si Cenia Avila Organis, usa ka estudyante sa institute sa Bicol, Philippines, mipasabut, ang paghimo og proyekto sa personal nga pagkat-on “makahatag og pagkapleksibol,” naghatag sa mga estudyante sa kagawasan sa pagkat-on sa pulong sa Dios ug mobati sa Espiritu gamit ang ilang kaugalingong mga talento.
Mas Taas nga mga Resulta
Ang paggamit niining mga pamaagi sa pagkat-on makapalambo sa inyong pagtuon sa ebanghelyo ug makapalig-on sa inyong pagpamatuod. Pinaagi sa pagtuon og maayo sa ebanghelyo pinaagi sa mga kurso sa institute, mas masabtan ninyo unsaon sa paggamit sa pulong sa Dios sa inyong kaugalingong kinabuhi ug unsaon sa pagpanalangin sa mga kinabuhi sa uban.