Mga Baruganan sa Visiting Teaching

Kontaka Siya Bisan Unsang Orasa, Bisan Asa, Sa Bisan Unsang Paagi

Ang visiting teaching kabahin sa pangalagad. Nangalagad si Jesus bisan unsang orasa ug bisan asa. Kita makabuhat sa ingon.

Ang “pangalagad” mao ang pagserbisyo, pag-atiman, o pagtabang nga makasalmot sa kahupayan o kalipay sa laing tawo. Ang visiting teaching mao ang mahitungod sa pagdiskobre og mga paagi sa pagpangalagad niadtong atong bisitahan. Nangalagad si Jesukristo ngadto sa tanan—bisan unsang orasa ug bisan asa. Gipakaon Niya ang 5,000, mihupay ni Maria ug Marta sa kamatayon sa ilang igsoong lalaki, ug mitudlo sa Iyang ebanghelyo ngadto sa babaye diha sa atabay. Gibuhat kini Niya tungod sa Iyang sinsero nga gugma.

Ang pagsunod sa Iyang ehemplo, isip mga visiting teacher makahibalo kita ug mahigugma sa matag sister nga atong bisitahan, maghinumdom nga ang gugma mao ang pundasyon sa tanan nga atong gibuhat. Kon mag-ampo kita alang sa inspirasyon aron masayud unsaon sa pagserbisyo ug pagtabang nga malig-on ang iyang pagtuo, “ang mga anghel dili mapugngan nga mahimo [natong] mga kauban.”¹

Gikan sa organisasyon sa Relief Society niadtong 1842 hangtud karon, ang pagpangalagad sa mga babaye nakapanalangin og mga kinabuhi. Pananglit, si Joan Johnson, 82 anyos nga biyuda, ug ang iyang visiting teaching kompanyon mitudlo sa ilang silingan kinsa 89 na ug dunay pneumonia. Nakita nila nga ang ilang silingan wala lang magkinahanglan nga mobisita sila kausa sa usa ka bulan, mao nga gisugdan nila sa pagsusi siya kada semana sa personal o pinaagi sa telepono.

Alang sa ubang mga visiting teacher, ang pagpadala og text o email nga mag-awhag tingali mao ang labing maayong butang nga buhaton alang sa usa ka sister niana nga bulan. Ang paghimo og personal nga relasyon ug pagpaminaw uban sa kinaiya sa gugma mao ang lintunganay sa visiting teaching. Ang moderno nga teknolohiya ug personal nga pagbisita makatabang nato sa pagbuhat niini bisan unsang orasa, bisan asa, ug daghang mga paagi.² Mao kana ang pangalagad sama sa gibuhat ni Jesus.

Hugot nga Pagtuo, Pamilya, Kahupayan

Mubo nga mga Sulat

1. Mga Pagtulun-an sa mga Presidente sa Simbahan: Joseph Smith (2007), 543.

2. Tan-awa sa Handbook 2: Administering the Church (2010), 9.5.1.

Pangalagad

Kay sa piho nga mensahe, matag bulan kini nga pahina mopagawas og lahi nga baruganan aron sa pagtabang nato sa pagpangalagad nga mas epektibo ngadto sa usag usa. Samtang mag-ampo kamo ug magtinguha og inspirasyon, makahibalo kamo sa espirituhanon nga mensahe ug moserbisyo sa panginahanglan sa matag sister.

Ikonsiderar Kini

Unsaon nato nga mahunong ang kabalaka kabahin sa “unsay maihap” alang sa visiting teaching ug imbis mo-focus unsay mga panginahanglan sa matag sister gikan sa iyang mga visiting teachers?