Tun-i ang mga Pulong sa Manluluwas

Ni Presidente Russell M. Nelson

Presidente sa Korum sa Napulog Duha ka mga Apostoles

Gikan sa usa ka artikulo lds.org/blog.

Dili lamang nga karon ako adunay mas dako nga pagpamatuod sa Ginoo ug sa Manluluwas, nga si Jesukristo, apan duna usab akoy kumpirmasyon sa akong kompleto nga kombiksyon nga ang sistema ni Joseph Smith sa paghubad sa Basahon ni Mormon usa ka gasa gikan sa Dios.

Atol sa Enero 2017 nga tibuok kalibutan nga debosyonal alang sa mga young adult, akong gihagit kadtong nanan-aw sa pagpadako sa ilang pagpamatuod sa Manluluwas pinaagi sa paggahin og panahon matag semana sa:

Pagtuon sa tanan nga gisulti ug gibuhat ni Jesus sumala sa narekord sa Daang Tugon.
Pagtuon sa Iyang balaod sumala sa narekord sa Bag-ong Tugon.
Pagtuon sa Iyang doktrina sumala sa narekord sa Basahon ni Mormon.
Pagtuon sa Iyang mga pulong sumala sa narekord sa Doktrina ug mga Pakigsaad.

Gisaaran nako kadtong naminaw nga kon buhaton nila nga makat-on sa tanan nilang mahimo bahin ni Jesukristo, ang ilang gugma alang Kaniya, ug alang sa mga balaod sa Dios, molambo lapas pa sa ilang gihunahuna karon.

Unsay wala nako hisguti atol niini nga pakigpulong mao nga nasayud ko nga kini nga saad tinuod tungod kay ako anaa sa tunga-tunga sa pagkompleto usab niining maong assignment sa akong kaugalingon sa unang higayon.

Niadtong Disyembre 1, 2016, nakabaton ko og bag-ong mga kasulatan ug mipadayon sa pagsugod sa samang assignment nga akong ihatag unya ngadto sa mga young adult inig Enero. Sa dihang nahuman nako ang akong assignment paglabay sa unom ka semana, nakakita ug nakamarka ko og labaw sa 2,200 ka kinutlo gikan sa upat ka mga basahon sa kasulatan.¹

Alang nako, ang pagtuman niini nga assignment makadasig!

Ang butang nga akong nakaplagan nga makahatag og pagsabut mao nga ang Manluluwas nagsulti nato bahin sa Iyang Kaugalinon niining nagkalain-laing mga panahon—Daang Tugon, Bag-ong Tugon, ang panahon sa Pagpahiuli, ug sa atong panahon. Sa tanang mga basahon sa kasulatan, ang istorya pareha ug ang Nag-istorya pareha ra.

President Nelson studying the scriptures

Akong gigahin ang kadaghanan sa akong 93 ka tuig sa pagkat-on mahitungod sa Manluluwas, apan talagsa ra ang mga higayon nga daghan kog nakat-unan sama niining unom ka semana nga tagal sa pagtuon. Gani, daghan kaayo kog nakat-unan bahin Kaniya tungod niini nga pagtuon nga akong giplano nga ipakigbahin ang daghan niini sa laing umaabut nga mga pakigpulong nga karon akong giandaman.²

Sa pagsugod niini nga assignment, wala ko magpaabut nga kini nga pagtuon makatabang nako sa pagdawat og bag-ong pagpamatuod sa kabalaan sa buhat ni Joseph Smith—apan nakahatag kini! Ang mga pagpadayag nga narekord ni Joseph Smith ug ang mga pagpasabut nga makita sa Biblia talagsaong nagkapareha. Makatabang alang nako nga makita kini sa akong pagtuon.

Posible nga wala nay panahon si Joseph Smith sa pagtandi ug pag-cross-reference sa Biblia sa paspas niyang paghubad sa Basahon ni Mormon—apan nia ang tanan!

Mao nga dili lamang nga nakaangkon ko karon og mas dako nga pagpamatuod sa Ginoo ug sa Manluluwas, nga si Jesukristo, apan nakaangkon usab ako og kumpirmasyon sa akong kompleto nga kombiksyon nga ang sistema ni Joseph Smith sa paghubad sa Basahon ni Mormon usa ka gasa gikan sa Dios.

Karon, nakaamgo ko nga pipila kaninyo tingali naghunahuna sa inyong kaugalingon nga dili tingali ninyo makompleto ang assignment sama niini.

Nasayud ko unsay inyong gibati. Naghunahuna usab ko sa samang butang sa akong kaugalingon—nga walay paagi nga makabaton og panahon sa pagbuhat niining tanan. Kinahanglan nga akong pahinumduman ang akong kaugalingon nga ang komentaryo sama niini dili komentaryo nga resulta sa pagtuo. Ang komentaryo nga resulta sa pagtuo ingon ani “Nasayud ko nga wala koy panahon alang niini, apan mangita ko og panahon alang niini. Ug tumanon nako kini unsay panahon nga naa nako.”

Matag usa nato nga modawat niini nga hagit makahuman sa atong kaugalingong gitakda nga panahon. Alang nako, ang kalipay niini magagikan sa paghuman niini sulod sa unom ka semana. Kining hilabihan nga pagtuon sa mubo kaayo nga panahon nakatugot nako sa pagpasalamat sa matang sa pagkompleto sa mga pagkat-on nga makita sa Daang Tugon, sa Basahon ni Mormon, sa Bag-ong Tugon, ug sa Doktrina ug mga Pakigsaad.

Kamong kinsa mibati nga wala moy panahon, kon mohimo og sakripisyo, kamo pagagantihan ug magpasalamat kamo pag-ayo sa kausaban sa panglantaw, sa nadugang nga kahibalo, ug dugang gilawmon sa inyong pagkakabig. Nasayud ko nga kini tinuod tungod kay nakita nako ang samang ganti sa akong kaugalingong kinabuhi.

Sa nahisgutan na nako sa debosyonal, sa umaabut nga adlaw, inyong ipresentar ang inyong kaugalingon sa atubangan sa Manluluwas. Dili kamo makatingog ngadto sa punto nga kamo makahilak nga maanaa sa Iyang balaang presensya. Manlimbasug kamo sa pagpangita og mga pulong sa pagpasalamat Kaniya tungod sa pagbayad sa inyong mga sala, sa pagpasaylo ninyo sa bisan unsa nga pagkadili mabination ngadto sa uban, sa pag-ayo ninyo gikan sa mga kasakit ug pagkadili makiangayon niining kinabuhia.

Pasalamatan ninyo Siya tungod sa paglig-on ninyo sa pagbuhat sa imposible, sa paghimo sa inyong mga kahuyang ngadto sa mga kalig-on, ug sa paghimong posible nga makapuyo kamo uban Niya ug sa inyong pamilya sa kahangturan. Ang Iyang pagkatawo, Iyang Pag-ula, ug Iyang mga hiyas mahimong personal ug tinuod nganha ninyo.

Apan dili kinahanglang maghulat mo hangtud nianang panahona. Pilia nga mahimong usa sa Iyang tinuod nga mga disipulo karon. Mahimong usa kinsa tinuod nga nahigugma Kaniya, kinsa tinuod nga gustong moserbisyo ug mangulo sama sa Iyang gibuhat. Ako mosaad ninyo nga kon kamo magtuon sa Iyang mga pulong, ang inyong abilidad nga mas mahisama Kaniya modako. Nasayud ko nga tinuod kini.