Mga Tingog sa mga Santos sa Ulahing mga Adlaw
Ang Akong Pag-ampo Ibabaw sa Atup
Paghulagway pinaagi ni Carolyn Vibbert
Usa ka ulanon nga adlaw sa tinglarag, miadto ko sa akong lawting [attic] ug nakakita og nagtulo. Ang tubig mitulo sa tumoy sa lansang sa atup tunga-tunga sa duha ka sagunting. Mga tuig na ang milabay, daghan na kog giayo sa akong balay ug wala mahadlok sa paghimo og bag-ong mga proyekto. Apan niining higayuna nag-atubang ko og personal nga mga pakigbisog ug kulang og pagsalig. Wala nako batia nga duna koy emosyonal nga kalig-on sa pag-ayo sa nagtulo, bisan og nasayud ko nga kinahanglang ayuhon sa dili pa ang tingtugnaw.
Paglabay sa usa o duha ka semana, misaka ko sa akong atup nagdala og kutsilyo, galamiton para sa masilya, ug kahimanan sa pagtapak sa atop nga gibalahan og alketran. Sa akong hunahuna pangitaon lang nako ang gigikanan sa nagtulo ug tabunan kini og alketran. Apan wala koy ideya asa ang gigikanan. Nawad-an ko sa paglaum. Mihunong ko ug nag-ampo, nanghangyo sa Ginoo sa paggiya nako ngadto sa sakto nga dapit aron akong maayo ang nagtulo. Nagpaabut ko Niya nga mopakita nako sa dapit. Hinoon, usa ka pulong ang miabut sa akong hunahuna: susiha.
Dili kini mao ang tubag nga akong gusto, apan nagsugod ko sa pagpangita. Nangita ko og buslot. Giputol nako ang duha ka gagmay nga kahoy sa may buslot ug nakita ang tinubdan sa pagtulo. Gikuha nako ang daan, uga na nga alketran ug gibutangan og daghang bag-ong alketran. Gipulihan nako ang mga kahoy, ug walay usa ka oras nakompleto ang trabaho. Ang dili malipayon nakong mga pagbati nabayaw, ug mibati og nindot sa akong kaugalingon sa akong nabuhat sa pagsulbad sa problema. Sa sunod nga ulan, gitan-aw nako ang attic kon nagtulo pa ba ug nakita nga uga kini!
Naghunahuna ko ni Oliver Cowdery, kinsa wala “[mag]hunahuna gawas sa pagpangutana” (D&P 9:7). Sama kaniya, nagpaabut ko sa Ginoo nga mohatag lang og dali nga tubag sa akong pag-ampo nga walay paningkamot sa akong bahin. Ug naghunahuna ko bahin kon sa unsa nga paagi ang akong espiritu nabayaw sa dihang naningkamot ko sa akong kaugalingon sa “pagtuon niini” (D&P 9:8)—sa pagsusi. Nakat-unan nako nga ang Ginoo dili mohimo sa tanan alang kanato. Motabang ug mogiya Siya kanato, apan gipaabut usab nga kita mohimo unsay atong mahimo sa atong kaugalingon tungod kay makahatag kini og personal nga kalamboan.