Kamo, ang Kabatan-onan, ug ang Tema sa Mutual
Sa unsa nga paagi nga ang tema sa Mutual makahiusa kanato?
Matag tuig ang Kinatibuk-ang mga Kapangulohan sa Young Men ug Young Women modapit sa kabatan-onan sa pagtuon, pagkat-on, ug paggamit sa tema sa kasulatan nga giaprobahan sa Unang Kapangulohan. Ang pagkat-on ug pagsunod sa mga pagtulun-an sa tema sa Mutual makalig-on sa pagtuo ug pagmatuod ug makahiusa og mga korum, mga klase ug mga pamilya.
Ang 2018 nga Tema
Ang tema karong tuiga nagtudlo sa kabatan-onan unsaon sa pagpangita og kalinaw nga moabut gikan ni Jesukristo. Sa Doktrina ug mga Pakigsaad 19:23, ang Ginoo nagdapit, “Pagkat-on kanako, ug paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako.” Sa kalibutan nga mahimong mapuno sa walay kasiguroan ug kahadlok, usa kini ka gamhanan nga saad.
Kini nga kasulatan naghatag sa mga ginikanan, mga lider, mga mentor, ug mga magtutudlo og oportunidad sa pagtudlo sa mga sumbanan nga makapalig-on sa kabatan-onan niining mahagitong mga panahon.
Unsaon Nako sa Paggamit sa Tema?
Ang Kinatibuk-ang mga Kapangulohan sa Young Women ug Young Men midapit kanato sa pagsag-ulo sa kasulatan, pagtuon sa doktrina, ug paggamit sa mga baruganan sa atong mga kinabuhi. Bisan kining mga butanga mahimong himoon sa tagsa-tagsa, ang paghimo niini nga kamo tanan makatabang sa paghiusa ug paglig-on sa kabatan-onan ug sa ilang mga pamilya.
Adunay daghang mga oportunidad nga iapil sa tema ngadto sa mga kinabuhi sa atong kabatan-onan. Magamit kini sa family home evening, sa mga leksyon sa simbahan ug sa seminary, hilisgutan alang sa kabatan-onan sa mga pakigpulong sa sakrament miting, ug sa paghatag og focus alang sa mga kalihokan sa kabatan-onan, lakip sa pagkampo, mga komperensya sa kabatan-onan, hiniusang mga kalihokan, New Beginning, ug mga debosyonal.
Pipila ka mga Ideya sa Kalihokan
Ang mosunod mao ang pipila ka mga ideya sa pag-apil sa tema sa Mutual sa tibuok tuig. Alang sa dugang nga impormasyon, bisitaha ang youth.lds.org.
“Pagkat-on Kamo Gikan Kanako”
Ang pagkat-on bahin ni Jesukristo importante sa pagpangita og kalinaw diha Kaniya. Adunay kalinaw ug kasiguroan sa pagkahibalo nga unsa Siya nga matang, pagkat-on sa unsa nga paagi Siya nagpakabuhi, ug pagsabut unsay Iyang gihimo alang nato.
Sa dihang 14 anyos pa, si Presidente Spencer W. Kimball (1895–1985) gipangutana siya kon nabasa ba niya ang tibuok Biblia. “Nakabasa na ko og daghang mga libro nianang higayuna, kataw-anan nga mga basahon, ug dili seryoso nga mga libro, apan ang akong konsensya miingon nako, ‘Ikaw, Spencer Kimball, wala gyud ka mobasa sa balaan nga libro. Ngano?”1 Gikan niana nga punto, si Presidente Kimball nanaad nga “magbusog sa mga pulong ni Kristo” (2 Nephi 32:3).
-
Ikonsiderar ang paghangyo sa kabatan-onan nga magbaton og study notebook aron irekord unsay ilang nakat-unan bahin ni Jesukristo ug sa Iyang ebanghelyo.
-
Mahimo ninyong dapiton ang kabatan-onan nga mopasalig nga dawaton ang hagit ni Presidente Russell M. Nelson sa “pagpahinungod og porsyon sa [ilang] panahon matag semana sa pagtuon sa tanan nga gisulti ug gibuhat ni Jesus sigun sa narekord sa [mga kasulatan].”2 Sa klase o sa family home evening, makahangyo kamo nila sa pag-report sa unsay ilang nakat-unan ug giunsa nila paggamit kini sa ilang kaugalingong mga kinabuhi.
Mga Kapanguhaan
-
“Ang Buhi nga Kristo: Ang Pagpamatuod sa mga Apostoles,” Liahona, Abr. 2000, 2.
-
Russell M. Nelson, “Pagdawat sa Gahum ni Jesukristo diha sa Atong Kinabuhi,” Liahona, May 2017, 39–42.
-
David A. Bednar, “Usa ka Kristohanong Kinaiya,” Liahona, Oct. 2017, 50–53.
“Paminaw sa Akong mga Pulong”
Ang pagpaminaw sa mga pulong sa Manluluwas naglakip dili lamang sa pagdungog apan sa pagpatalinghug (o pagsunod). Tumang kalinaw ug kasiguroan moabut tungod sa kahibalo nga kita nagpakabuhi nga nahiuyon sa Iyang mga pagtulun-an.
Sa otso anyos pa siya, si Presidente Thomas S. Monson nakahukom nga maghimo og campfire uban sa iyang higala nga si Danny. Dihay usa lang ka problema—ang dapit nga gusto nilang gamiton tandugunon, ug daghang mga sagbut. Mao kadto nga ang batan-on nga si Presidente Monson dunay ideya: “Akong giingnan si Danny, ‘Ang atong gikinahanglan mao ang pagsunog niini nga mga sagbut. Magsunog lang ta og gamayng lingin diha sa mga sagbut!’ Miuyon siya, ug midagan ko ngadto sa among payag sa pagkuha og posporo. …
“… Nahinumdom ko nga naghunahuna nga ang kalayo mosunog lang sumala sa among gusto ug mapalong ra kini og iyaha.
“Akong gikadlit ang posporo ug misunog sa kasagbutan niadtong bulan sa Hunyo.” Nakaamgo sa wala madugay nga ang kalayo dili mapalong sa iyaha lang, ang batang mga lalaki nanagan aron mangayo og tabang, ug ang kalayo napalong human sa pipila ka oras nga pagkumbati.
“Si Danny ug ako nakat-on og daghang lisud apan importante nga mga leksyon nianang adlawa,” miingon si President Monson, “ang kaimportante sa pagkamasulundon.”3
-
Hangyoa ang kabatan-onan sa pagtuon sa pagkamasulundon sa kapitulo 6 sa Isangyaw ang Akong Ebanghelyo, lakip sa seksyon sa pagkamasulundon sa attribute activity sa katapusan sa kapitulo.
-
Hisguti ang mga butang nga makabalda nato sa pagpaminaw sa mga pulong sa Ginoo. Pananglit, makadapit mo sa kabatan-onan sa pagpuli sa 10 minutos nga pagtan-aw sa mga electronic device sa 10 minutos nga pagtuon sa kasulatan.
-
Kanunaya ang oportunidad sa pagpangutana sa kabatan-onan unsay ilang buhaton sa unsay ilang nakat-unan.
Mga Kapanguhaan
-
“Pagkamasulundon,” Isangyaw ang Akong Ebanghelyo: Usa ka Giya sa Misyonaryo nga Pangalagad (2004), 148.
-
Hadley Griggs, “Napulo ka Minutos sa kada Adlaw,” Liahona, Sept. 2017, 58–61.
-
Robert D. Hales, “Kon Nahigugma Kamo Kanako, Inyong Pagatumanon ang Akong mga Sugo,” Liahona, Mayo 2014, 35–38.
“Lakaw diha sa Kaaghup sa Akong Espiritu”
Ang pagkat-on ug pagpaminaw naghulagway unsay kinahanglan natong buhaton. Ang paglakaw diha sa kaaghup sa Iyang Espiritu mao ang paagi sa atong pagbuhat niini.
Ang pagkaaghup nagpasabut sa “paglahutay og kadaot ug walay pagkasuko,”4 butang nga nagkinahanglan og kalig-on ug pagpaubos. Niadtong 1838, si Thomas B. Marsh, ang unang Presidente sa Korum sa Napulog Duha ka mga Apostoles, mibiya sa Simbahan, tungod kini sa iyang kasuko nga ang mga lider sa Simbahan wala modapig sa iyang asawa sa panaglalis tungod sa gatas. Paglabay sa katuigan, naguol siya sa mga panalangin nga nawala ug mibalik ngadto sa Simbahan nga nag-ingon: “Gusto akong mahibalo kanunay sa unsang paagi nagsugod ang akong apostasiya [sic] ug ako nakaingon nga nawala ang Espiritu sa Ginoo sa akong kasingkasing. … “… gibati nako ang kasuko ug kalagot; ug ang Espiritu sa Ginoo nga wala na, sumala sa gisulti sa Kasulatan, nabutaan ko.”5
-
Ang kinabuhi sa Manluluwas dili sayon. Pangita og mga ehemplo sa mga kasulatan sa mga higayon sa dihang si Jesus nagpakita og kaaghup sa pag-atubang sa mga hagit. Hisguti kon sa unsa nga paagi nga atong magamit ang ehemplo sa Manluluwas sa mga sitwasyon nga atong giatubang karon.
-
Usa ka paagi nga mahimo kitang maaghup mao ang pagserbisyo sa uban. Ikonsiderar ang lain-laing mga buhat sa pagserbisyo nga mahimo sa kabatan-onan sa tagsa-tagsa o isip usa ka grupo.
Mga Kapanguhaan
-
Ulisses Soares, “Magmaaghup ug Magmapaubsanon sa Kasingkasing,” Liahona, Nob. 2013, 9–11.
-
Neal A. Maxwell, “Meekness—A Dimension of True Discipleship,” Ensign, Mar. 1983, 70–74.
“Ikaw Makabaton og Kalinaw ngari Kanako”
Ang kalinaw nagpasabut og laing mga butang ngadto sa laing mga tawo—laumi nga ang pagkaayo posible, sa tinuod dunay paagi sa malisud nga mga panahon, o kasiguroan nga kita anaa sa sakto nga dalan.
-
Pangita og mga istorya kon sa unsa nga paagi nga ang uban nakakita og kalinaw diha kang Kristo sa Mormon.org/easter ug sa mga pahina 60 ug 63 niini nga isyu. Nakakita ba kamo og kalinaw?
-
Ikonsiderar ang pagtan-aw sa 2017 Easter video, “Prinsipe sa Kalinaw,” sa Mormon.org/easter. Mahimo ninyong dapiton ang kabatan-onan sa pagpakigbahin sa video sa online uban sa pagpamatuod kon sa unsa nga paagi nakakita sila og kalinaw diha ni Kristo.
Mga Kapanguhaan
-
W. Christopher Waddell, “Usa ka Sumbanan alang sa Kalinaw,” Liahona, Mayo 2016, 90–93.
-
Elder Quentin L. Cook, “Personal nga Kalinaw: Ang Ganti sa Pagkamatarung,” Liahona, Mayo 2013, 32–36.