Ko Ha Fakamoʻoni Ngingila

Mālō e lelei! Ko hoku hingoá ko Setefano! ʻOku ou feinga ke fakaulo atu ʻeku māmá ʻaki hono vahevahe ʻeku fakamoʻoní.

Ko ha Motu Fakaʻofoʻofa

ʻOku ou nofo ʻi Suli Langikā. Ko ha motu fakaʻofoʻofa ʻoku ofi ki he faka-Tonga ʻo ʻInitiá. ʻOku ʻi ai hamau vaotātā fakatalopiki, tahi lanu pulū, pea mo ha ngaahi fale fakakuongamuʻa kuo maumau. ʻOku ou ʻofa ʻi hoku fonuá!

Ngaahi Kaungāmeʻa mei he Feituʻu Kotoa Pē

ʻOku ʻi hoku ʻapiakó hā fānau mei ha ngaahi fonua kehekehe. Ko ha niʻihi ko e kau Kalisitiane, Mosilemi, Hinitū pe Puta. ʻOku mau angalelei mo anga fakakaumeʻa kātoa.

1 . Ko ha Fakaafe Fakailifia

Naʻe fakahoko ai ha fakataha makehe ʻa e fānau ako Kalisitiané, ʻi ha ʻaho ʻe taha. Naʻe fakaafeʻi kimautolu ke mau vahevahe ʻemau ngaahi fakamoʻoní. Ne lōngonoa e lokí. Naʻe ʻikai ha taha ia ʻe ʻalu hake ki he funga siteisí. Ne fuʻu ilifia e taha kotoa! ʻOku ou mātuʻaki mā, pea ne u ongoʻi pehē pē foki.

2. “ʻAlu, ʻAlu”

Pea neu ongoʻi ha māfana ʻokú ne kāpui au, mo ongoʻi hono talamai ʻe he Laumālie Māʻoniʻoní, “ʻAlu, ʻalu.” Naʻá ku fai ha kiʻi lotu nounou ʻi hoku lotó. Ne u lue tailiili lahi pē ki he siteisí.

3. Ko e Vahevahe ʻo ʻEku Fakamoʻoní

Naʻá ku fakahā ki hoku kaungāakó ʻoku ʻofa ʻa e Tamai Hēvaní ʻiate kitautolu mo finangalo ke tau fetuʻutakimaʻu pē mo Ia. Naʻá ku vahevahe ʻeku ngaahi aʻusia fekauʻaki mo e lotú. Ne u fakahā ange ʻoku ou ʻiloʻi ʻoku fanongo maʻu pē ʻa e Tamai Hēvaní kiate au mo fie tokoni mai. Naʻá ku fiefia ʻi heʻeku loto-toʻa ke vahevahe ʻeku fakamoʻoní. Ne u ongoʻi ʻo hangē ha maama ngingila ʻi ha loki lōngonoá.

4. ʻAlu ʻo Fakahoko Ia

Ko e talanoa fakafolofola ʻoku ou manako ai ʻi he Tohi ʻa Molomoná, ko e talanoa ko ia ʻoku pehē ai ʻe Nīfai te ne ʻalu ʻo fai ʻa e meʻa ʻoku fekau ʻe he ʻEikí. ʻOku ou fakaʻamu te u loto-toʻa maʻu pē ke fai e meʻa ʻoku finangalo ʻe he Tamai Hēvaní ke u faí.