Ongoongo Fakalotofonuá
Tui ha Mēmipa Siasi ʻi Fisi ʻOku Hoko Maʻu Pē e Angaʻofá ko e Founga Lelei Tahá
Kimuí ni mai lolotonga hano ʻutu ʻe ʻApi Tuitupou ʻene lolí ʻi ha pausa mo maʻu ha kiʻi inu mokomoko, naʻe fakafetaulaki ange ha tangataʻeiki mātuʻotuʻa naʻá ne fua ha tangai ʻe tolu ne hangē ha fua ʻo ha ngoue mo ha meʻakai.
Naʻe fakamatala e tangataʻeikí ko ha houa ʻeni ʻe ono ʻene tali pasí peá ne kole ange leva, “ʻOkú ke pehē te ke lava ʻo ʻave au; ʻe tokoni lahi ʻaupito ia.”
“Ne māfana hoku lotó he taimi ne kole mai ai ʻe he tangataʻeiki tuʻapiko ko ʻení, sote hina lelei mo ha senitolo maʻa ke u tokoni angé. Naʻe pehē ʻe ʻApi, “ne u ʻilo kuo pau ke u tokoniʻi ia.”
ʻI heʻena fononga fakataha atú, naʻe ʻilo ʻe ʻApi ʻoku taʻu 79 e tangataʻeikí mei ha kiʻi kolo ko Naitasili.
ʻI hono ʻeke ange e feituʻu ʻe tuku ia ki aí, ne kiʻi fakalongolongo taimi siʻi pea lea mai leva e tangataʻeikí, “ʻOku teʻeki ke u sio ki hoku ʻofefiné ʻi ha taʻu ʻe ua; ʻokú ne pehē ko ha tangata faingataʻa au. Koeʻuhí ko ʻema ngaahi fetōkehekeheʻakí, naʻá ne pehē ai ke nofo mamaʻo meiate au.”
“Kuó u holo, ka ʻoku ou loto ke u sio kiate ia mo hoku makapuná. ʻOku ou fakaʻamu pē te ma lava ʻo fakaleleiʻi ʻema ngaahi fetōkehekeheʻakí mo sītuʻa mei ai kimuʻa peá u toki mālōloó.”
Ne fononga atu ʻa ʻApi mo ʻene pāsesé ki he ʻapi hono ʻofefiné. ʻI heʻena aʻu atú, ne toe veiveiua hono kaungāmeʻa foʻoú mo “toe fehuʻia” ʻene feinga ke fakaleleiʻi ha vā fetuʻutaki kuo maumau.
ʻI ha kiʻi lea fakalotolahi, mo ha palōmesi ke tali kiate ia kapau he ʻikai ola lelei ʻene feingá, ne toʻo ʻe he tangataʻeikí ʻene ngaahi tangaí pea hifo mei he lolí.
Ne manatuʻi ʻe ʻApi, “naʻá ne toʻo hake ha paʻanga ʻe $5 mo talamai koe meʻa pē ia ʻokú ne maʻú mo fakatauange pē ʻoku feʻunga ki he fakamole ʻo ʻena fonongá.”
Ne tali ange ʻe ʻApi, “Kua ni leqa mata—ʻOku ou fiefia ke tokoni.”
ʻI heʻena kei tuʻu ʻi tuʻá, ne lele mai e ʻofefine ʻo e tangataʻeikí mei he falé ʻo fāʻofua ʻi hono kiá. Ne mole ʻa e lotomamahí, ʻitá mo e ngaahi taʻefemahinoʻakí ʻi heʻenau loʻimataʻia kotoá.
Ne pehē ʻe ʻApi, “ʻOku fuonounou e moʻuí ke fakamoveteveteʻi ʻe he ʻitá, mamahí, mo e loto tēngihiá hotau ngaahi fāmilí.” “ʻOua naʻa tuku ke tō ʻa e laʻaá ʻi ha taʻefemahinoʻaki.”