Fakahangatonu

Ko e hā e ʻaonga ʻo ʻetau tauʻatāina ke filí kapau ʻoku ʻafioʻi ʻe he ʻOtuá e fili kotoa pē te tau faí?

Kuo lauisenituli e fifili e kakaí ki he fehuʻi ko ʻení. Ko e founga ʻo ʻetau tali iá ʻoku makatuʻunga ʻi ha ongo tefitoʻi moʻoni ʻe ua kuo fakahā mai:

ʻOku tokaimaʻananga ʻe he ʻOtuá e meʻa kotoa. ʻOku ʻikai haʻisia e vakai ʻa e ʻOtuá ia ki he taimí (vakai, T&F 38:2). ʻIkai ngata ai, naʻá Ne maʻu ha aʻusia taʻefakangatangata mo kitautolu kimuʻa pea tau toki omi ki he māmaní, pea ʻokú Ne ʻafioʻi lelei ange ai ʻetau ngaahi fakahehemá mo hotau ʻulungaangá takitaha ʻo laka ange ʻiate kitautolu.

ʻOku tau maʻu ʻa e tauʻatāina ke filí. Ko ha kakai ʻatamai poto kitautolu, ko e fānau ʻa e ʻOtua, ʻoku ʻofa ʻiate kitautolu pea kuó ne fokotuʻu ha palani ʻokú ne fakaʻatā ai ke tau hoko ʻo hangē ko Iá—kapau te tau fili ke talangofua kiate Ia (vakai, T&F 93:27–32; ʻĒpalahame 3:21–25). ʻOku ʻuhinga ʻa e tauʻatāina ke filí ko ʻetau lava ʻo ngāue ʻiate kitautolu pē kae ʻikai ke fakakounaʻi (vakai, 2 Nīfai 2:14, 16, 27).

Ko e maheni ko ia ʻa e ʻOtuá mo hotau ʻulungāngá pea mo ʻEne tomuʻa ʻiloʻi ʻetau ngaahi fili ʻoku ʻikai ke ne fakatupu ai ke tau fai ʻa e ngaahi fili ko iá. Koeʻuhí ʻokú Ne ʻafioʻi kitautolu pea koeʻuhí ko ʻetau maʻu ʻa e tauʻatāina ke filí, ʻokú Ne fakaafeʻi ai mo fakakolekole kitautolu—kae ʻikai fakamālohiʻi kitautolu—ke tau fai lelei mo tui kia Sīsū Kalaisi (vakai, Molonai 7:16–17).