Ongoongo Fakalotofonuá
Ako ʻe he kau finemuí ʻa e moʻui fakafalala pē kiate kitá
ʻOku maʻu ʻe he fāmili ʻo Tekilati mo ʻOfa Fisiʻitaliá ha palepale tauhiʻanga moa lelei ʻi hona ʻapí ʻi Haʻakame, Tonga. ʻI Sepitema ʻo e 2017, ne ngāue kotoa e fāmilí ke langa ha palepale tauhiʻanga moa ʻaki ha uaea ne foaki ʻe he Tafaʻaki Tokoni ʻa e Siasí.
Ne tā mai ha ʻakau mei he vaó ko ha ngaahi fuʻu pou. Ne fusi leva e uaeá pea tuki faʻo ki he ngaahi fuʻu poú. Ne langa ha matapā huʻanga mo ha ngaahi puha fakatōʻanga fuaʻimoa.
Naʻe tauhi ʻe he fāmilí e fanga moa ne ʻomi ʻe he Vaʻa ʻa Nuʻu Sila ki he Fanga Monumanú, ʻo maʻu ai ha motuʻa moa ʻe hongofulu mā valu mo ha moa taʻane ʻe tolu. ʻOku fakatō ʻe he moa takitaha he taimí ni ha fuaʻimoa ʻe taha he ʻaho kotoa pē, pea ua he taimi ʻe niʻihi. Kuo kau ʻeni e fuaʻimoá he maʻu meʻatokoni ʻa e fāmilí.
ʻOku ʻi ai ha fānau ʻe toko ono ʻa Teki mo ʻOfa. ʻOku hokohoko atu hono ako ʻe hona fāmilí e mahuʻinga ʻo e ngāué ʻi heʻenau tauhi e palepalé, fafanga mo fakainu e fanga moá, mo tufi e fuaʻimoá. ʻOku ʻave leva ʻe he fānaú e fuaʻimoá ki ha kiʻi falekoloa Tonga ʻi he koló, ofi pē ki honau ʻapí ke fakatau atu. ʻOku fakaʻaongaʻi e sēniti ʻoku maʻu mei hono fakatau ʻo e fuaʻimoá, ke kumi ʻaki e nāunau ako mo e teunga ako ʻo e fānaú.
Ko e moʻui fakafalala pē kiate kitá ko ha tefitoʻi moʻoni mahuʻinga ia ʻi he ongoongoleleí. Fakatatau ki he Lds.org, ko e taumuʻa ʻo e malava ʻo fakafalala fakalaumālie mo fakatuʻasino pē kiate kitá ke fakalakalaka ange mo lava ʻo tauhi ki he ʻEikí pea tokangaekina mo e niʻihi kehé (vakai, Sione 15:8).