Ko e Ngaahi Lotu ʻa ha Faʻē Foʻou
Krystal Baker Chipman
ʻIuta, USA
Tā fakatātā ʻe Joshua Dennis
ʻI heʻeku hoko ko ha faʻē ki ha kiʻi tamasiʻi ʻatamai poto mo longomoʻuí, ʻoku ou ongoʻi he taimi ʻe niʻihi ko ʻeku moʻuí ko e fetongi taipa pē mo muimui ki he taimi fafangá.
Lolotonga ʻeku feinga ke u anga ki he tuʻunga fakaefaʻeé, naʻá ku fakatokangaʻi ʻa e ʻikai haku taimi ki heʻeku ngaahi fie maʻu fakalaumālié. Ne u faʻa angamaheni ʻaki haʻaku kiʻi mohe mālōlō pe faʻoaki ai haʻaku fō ke tā, kae ʻikai ke u lau ai e folofolá. Ne fakavaveʻi pē e lotú ʻo kole ki he Tamai Hēvaní ke mohe muʻa ʻeku kiʻi tamasiʻí pea ke ne mohe maʻu pe ko ha tokoni pē ke u lavaʻi ʻaki e toenga ʻo e ʻahó.
Fakafuofua ki he fā mahina nai ʻeku kiʻi tamasiʻí, naʻá ku fakatokangaʻi ʻa e kamata ke hōloa hoku laumālié. Ne kamata ke mōlia ʻa ʻeku holi ke fakamālohia ʻeku fakamoʻoní. Naʻá ku ongoʻi ne ʻikai ke u toe saiʻia ke nofo kakato ʻi he houa ʻe tolu ʻo e lotú, pea hangē e ngaahi fatongia kehe ʻi ʻapí mo e lotú ia ne ʻikai haku toe taimi pe ivi ki aí. Naʻá ku fie toe ongoʻi ʻa e maama ʻo e ongoongoleleí, ka naʻá ku helaʻia pea ʻikai ʻilo pe ko e fē te u kamata aí. ʻI ha pō ʻe taha naʻá ku lotu tāumaʻu ki ha tokoni.
ʻI he pongipongi hokó, naʻá ku feinga ke u ʻalu ki he lotú. ʻI he lolotonga ʻeku fanongo ki he lēsoni ʻa e Fineʻofá, naʻá ku sio ki ha pousitā ʻo e taumuʻa ʻo e Fineʻofá. Naʻá ku sio maʻu pē ki he pousitaá ʻi he Sāpate kotoa, ka ne teʻeki ai ke u tukulotoʻi ki muʻa hono pōpoakí. Naʻe pehē ai koe taumuʻa ʻo e Fineʻofá ke tokoni ki he kau fafiné ke “fakatupulaki ʻenau tuí mo e moʻui angatonu fakatāutahá, fakamālohia ʻo e ngaahi fāmilí mo e ʻapí, pea fekumi mo tokoni kiate kinautolu ʻoku faingataʻaʻiá.”
Naʻá ku toe lau ia. ʻI he taimi ko ʻení naʻe tokanga taha hoku ʻatamaí ki he “fakatupulaki e tuí mo e moʻui angatonu fakatāutahá.” Ne kamata ke toe mahino ange, kimuʻa peá u fakahoko hoku ngaahi uiuiʻi faka-Siasí mo fakahoko lelei ange ʻa e ngāue tokoni ki he niʻihi kehé, ʻoku fie maʻu ia ke u tokangaekina hoku tuʻunga moʻui lelei fakalaumālié. Naʻá ku kamata ia ʻaki ʻeku vaheʻi ha taimi makehe ʻi he ʻaho takitaha ki hono lau ʻo e folofolá. Naʻá ku feinga foki ke toe mohu fakakaukauange ʻi he taimi naʻá ku lotu aí.
ʻI he kamata ke u tanumaki ʻeku tuí mo ʻeku moʻui angatonu fakatāutahá pea kumi ki he fakahinohino mei he Tamai Hēvaní, naʻá ku ongoʻi ʻeku ʻofa ki he ongoongolelei ʻo Sīsū Kalaisí kuo toe fakafoki maí. Ne kamata ke toe mahuʻinga mālie ange ki heʻeku moʻuí ʻa e fakahoko e ngaahi uiuiʻí, ʻaʻahi ki hoku ngaahi tokoua ʻi he Fineʻofá pea mo e maʻu sākalamēnití ʻi he uike takitaha. Pea ko e ngaahi meʻa naʻá ku fakatokangaʻi ne ʻikai haku taimi mo e ivi ki aí, kuo kamata ʻeni ke hoko ia ko ha fakafiemālie mo ha mālohinga kiate au mo hoku fāmilí.