Ngaahi Founga ‘e Ono Ke Manatu Maʻu Pē ki he Fakamoʻuí

Fai ʻe ʻEletā Gerrit W. Gong

ʻO e Kōlomu ʻo e Kau ʻAposetolo ʻe Toko Hongofulu Mā Uá

Mei ha lea ʻi he konifelenisi lahi ʻo ʻEpeleli 2016.

ʻOku tau fuakava ʻi heʻetau maʻu e sākalamēniti he uike takitaha, ke manatu maʻu ai pē ki he Fakamoʻuí. ʻOku tau maʻu ha ngaahi potufolofola ʻe meimei 400 tupu nai kau ki he foʻi lea ko e manatu, pea ko ha ngaahi founga ʻeni ʻe ono ʻe lava ke tau manatu maʻu ai pē kiate Ia.

ʻUluakí, ʻe lava ke tau manatu maʻu pē kiate Ia ʻi heʻetau loto falala ki Heʻene ngaahi fuakavá, talaʻofá mo e fakapapaú.

Uá, ʻe lava ke tau manatu maʻu ai pē kiate Ia ʻi heʻetau fakahaaʻi ʻi he loto houngaʻia ʻa Hono toʻukupú ʻi heʻetau moʻuí.

Tolú, te tau lava ʻo manatu maʻu ai pē kiate Ia ʻi heʻetau falala ki he fakapapau mai ʻa e ʻEikí, “Ko ia ia kuó ne fakatomala mei heʻene ngaahi angahalá, oku fakamolemoleʻi ia, pea ko au ko e ʻEikí, ʻoku ʻikai te u toe manatu ki ai” (T&F 58:42).

Faá, ʻokú Ne fakaafeʻi kitautolu ke tau manatu ʻokú Ne talitali lelei maʻu pē kitautolu ki ʻapi.

Nimá, te tau lava ʻo manatu maʻu pē kiate Ia ʻi he Sāpaté ʻi he sākalamēnití. ʻI he fakaʻosinga ko ia ʻEne ngāue fakamatelié pea mo e kamataʻanga ʻEne ngāue ʻi Heʻene toetuʻú—fakatouʻosi—naʻe hanga ʻe heʻetau Fakamoʻuí ʻo toʻo ʻa e maá mo e vaí ʻo kole ke tau manatua ʻa Hono sinó mo e taʻataʻá.

ʻI he ouau ko ia ʻo e sākalamēnití, ʻoku tau fakamoʻoniʻi ki he ʻOtua ko e Tamaí ʻoku tau loto fiemālie ke toʻo kiate kitautolu ʻa e huafa ʻo Hono ʻAló pea manatu maʻu ai pē kiate Ia mo tauhi ʻEne ngaahi fekaú, ʻa ia kuó Ne tuku kiate kitautolú, ke ʻiate kitautolu maʻu ai pē Hono Laumālié (vakai, Molonai 4:3; 5:2; T&F 20:77, 79).

Fakaʻosí, ko hono onó, ʻoku fakaafeʻi kitautolu ʻe hotau Fakamoʻuí ke tau manatu maʻu ai pē kiate Ia ʻo hangē ko ʻEne manatu maʻu pē kiate kitautolú.

ʻOku folofola hotau Fakamoʻuí:

“ʻIo, te nau faʻa fakangaloʻi, ka ʻe ʻikai te u fakangaloʻi koe.

“Vakai, kuó u tohi tongi koe ʻi hoku ʻaofi nimá” (ʻĪsaia 49:15–16; vakai foki, 1 Nīfai 21:15–16).

ʻOkú Ne fakamoʻoni: “Ko au ia ʻa ia naʻe hiki haké. Ko Sīsū au ʻa ia naʻe kalusefaí. Ko au ko e ʻAlo ʻo e ʻOtua” (T&F 45:52).

ʻOku ou fakamoʻoni mo lotua te tau manatu maʻu ai pē kiate Ia—ʻi he taimi kotoa pē, meʻa kotoa pē, mo e feituʻu kotoa pē te tau ʻi ai (vakai, Mōsaia 18:9).