Kae ʻOua Ke Tau Toe Feʻiloaki
Feinga pē
Mei he “If Thou Endure It Well,” Ensign, Nov. 1984, 20–22.
ʻOku fie maʻu e ngāué ka te ikuna ʻi he pue ki he moʻui taʻengatá—ke ngāue maʻu pē, feinga, mo kātaki lelei ʻi he tokoni ʻa e ʻOtuá.
Laʻitā mei he Getty Images
Ko e taimi ʻoku ou fakakaukau ai ki he naʻinaʻi ʻa e Fakamoʻuí ke tau fai ʻi he loto-fiefia ʻa e ngaahi meʻa kotoa ʻoku tau maʻu ʻa e mālohi ke faí [vakai, T&F 123:17] ʻoku ou fakakaukau ki he tamai ʻa e foha maumau koloá. Naʻe loto mamahi e tamaí ʻi he mole pea mo e ʻulungaanga ʻo hono foha talangataʻá. Ka ʻoku ʻikai ha fakamatala ki heʻene tangí, “Ko e fē ne u fehalaaki aí?” “Ko e hā e meʻa kuó u fai ke hoko ai ʻení?” Pe, “Ne u tō nounoú ʻi fē?”
Kae hangē naʻá ne kātekina taʻe ʻi ai ha mamahi e faihala hono fohá pea talitali lelei ia ʻi he ʻofa. “He ko hoku foha ʻeni naʻe maté, pea kuo toe moʻui; naʻe mole ia, pea kuo ʻiloʻi. …” (Luke 15:24).
ʻI he taimi ‘oku fakatupu loto mamahi ai ha kau mēmipa ʻo e fāmilí, ʻoku mātuʻaki fie maʻu ke tau ako e kātakí. Ka tau ngāue ʻaki ʻa e ʻofá, faʻa kātaki, mo loto mahino, naʻa mo e taimi ʻoku ʻikai mahino ai ha fakalakalaká, ʻoku ʻikai ke tau tō nounou. Kuo pau ke tau feinga pē. …
ʻOku fie maʻu e ngāué ka te ikuna ʻi he pue ki he moʻui taʻengatá—ke ngāue maʻu pē, feinga, mo kātaki lelei ʻi he tokoni ʻa e ʻOtuá. …
… Te tau fehangahangai kotoa pē mo e mamahi mo e ngaahi faingataʻá. Mahalo te tau fetaulaki mo e loto mamahí, mamahi maté, fai angahalá, vaivaí, ngaahi fakatamakí, mahaki fakaesinó, felāngākí, mamahi fakaelotó, fakaanga taʻe totonú, taʻelatá, pe fakafisingaʻí. Ko e founga ʻoku tau kātakiʻi ai e ngaahi faingataʻa ko ʻení ʻokú ne fakapapauʻi pe te nau hoko ko ha ngaahi maka tūkiaʻanga pe ko ha ngaahi piliki ke langa ai. Ki he loto-toʻá, ʻoku fakafaingamālieʻi ʻe he ngaahi faingataʻa ko ʻení ʻa e fakalakalaká mo e tupulakí. …
ʻI he taimi ʻe niʻihi ʻi heʻetau kei tupu haké, naʻe tala mai ʻe lelei pē ʻa e meʻa kotoa. Ka ʻoku ʻikai ke pehē ʻa e moʻuí. ʻOku tatau ai pē pe ko hai koe, ʻe ʻi ai haʻo ngaahi palopalema. Ko e meʻa fakamamahí mo e loto mamahí ko e ongo meʻa hū hala ia ʻi he palani ʻo e moʻuí. …
… ʻOku fua tautau ʻa e leleí ʻe he anga ʻo e meʻa ʻoku tau fai fakafoʻituitui ki he meʻa ʻoku hoko he moʻuí ʻoku hā ngali taʻe fakafiemālie, taʻe ʻuhinga, mo foaki taʻe totonú. …
… Ko e Kalaisí ʻa Sīsū. Ko e taha e ngaahi fakaʻilonga ʻo ʻene maʻongoʻongá, ʻEne faʻa kātakí, ʻoku tuʻu ia ko ha maama maʻu pē ke tau faʻifaʻitaki ki ai. Lolotonga ʻEne fononga ʻi he māmaní naʻá Ne kātekina lelei ʻEne faingataʻaʻia mo hono fakafisingaʻi taupotu tahá. ʻOku ou fakamoʻoni ʻe tokoniʻi kitautolu ʻe he ʻOtuá ke tau kātaki ʻoka tau feinga ke moʻui ʻaki ʻEne ngaahi akonakí, kolea ʻEne fakahinohinó, mo tauhi ʻEne ngaahi fekaú.