Ko e Palōmesi ke Tuku-e-Keé
ʻOku nofo e tokotaha naʻá ne fai e talanoá ʻi ʻIutā, USA.
“Naʻa nau ʻave ʻenau ngaahi heletaá, mo e ngaahi mahafu tau kotoa … , ʻo nau tanu ia ʻo loloto ʻi he kelekelé” (ʻAlamā 24:17).
Ko ha ʻaho fakaʻofoʻofa moʻoni ʻeni. Naʻe haʻu e kāinga ʻo Timí, ʻa Mati. Pea te ne nofo ʻi ha uike kakato ʻe taha! Naʻe ʻikai ke ne faʻa tatali ke fakaʻaliʻali ki ai ʻene ngaahi meʻavaʻingá mo na vaʻinga fakataha.
ʻI he haʻu ko ia ʻa Matí, naʻe kamata leva ha ngaahi meʻa mālie. Naʻá na vaʻinga mo e fanga kiʻi tainasoá mo fakamuna ko ha ongo kaihaʻa kinaua ʻi tahi, ʻi he ongo ʻuluaki ʻahó. Naʻe fakalata ʻaupito. Ka ʻi he ʻaho hono tolú, naʻe ʻikai ke fuʻu lelei. Naʻe ʻikai ke lava ʻa Timi mo Mati ʻo felotoi ʻi ha meʻa.
“Ta hū ki tuʻa ʻo fulihi ʻa e fale ʻakaú ko ha vaka vavā!” Ko e lea ange ia ʻa Timí.
“ʻOku ʻikai ke u fie fai ia ʻe au. Ta nofo pē ʻi fale ʻo tā fakatātā,” ko e lea ange ia ʻa Matí.
“ʻOku taʻeoli ʻa loto ia!”
“ʻIkai, ʻoku ʻikai! ʻOkú ta fai maʻu pē ʻa e ngaahi vaʻinga ʻokú ke fie vaʻinga aí. Ko e hā ʻokú ke fili maʻu ai pē ʻa e meʻa ke ta faí?”
Naʻe hoko atu pē ʻa e fakafekiki ʻa Timi mo Matí. Naʻe ʻikai ke na toe fiefia. Naʻe ʻikai ke saiʻia ʻa Timi he ongo naʻá ne maʻu ʻi he taimi naʻá na kē aí. Naʻá ne fakakaukau leva ki ha meʻa.
Pehē ange ʻa Timi, “ʻE Mati, ʻai ke ta hangē ko e kau ʻAnitai-Nīfai-Līhaí.”
“ʻA hai?”
“Kau ʻAnitai-Nīfai-Līhaí. Ko e kakai kinautolu ʻi he Tohi ʻa Molomoná ʻa ia naʻa nau tanu ʻenau ngaahi heletaá. Ne lahi ʻenau taú, pea naʻa nau ongoʻi halaia, ko ia ne nau fakatomala leva. Naʻa nau palōmesi ki he Tamai Hēvaní he ʻikai te nau toe tau. Hili ia pea nau tanu ʻenau ngaahi mahafu taú ʻi he kelekelé ke fakahaaʻi naʻa nau fie tauhi ʻenau palōmesí.”
Fakafokifā pē kuo haʻu ha fakakaukau kia Timi. “Ta faʻu ha ngaahi heletā loi pea tanu ia mo palōmesi he ʻikai ke ta kē.”
Pehē ange ʻa Mati, “Sai ia.”
Naʻe ʻomi leva ʻe Timi mo Mati ha ngaahi meʻa vaʻinga langa pelesitiki mei he loki ʻo Timí pea faʻu ha ngaahi heletā kehekehe. Ko e niʻihi ne lōloa. Ko e niʻihi ne nounou. Pea ko e niʻihi naʻe lanu kehekehe. ʻI he taimi naʻá na ʻosi aí, naʻe ʻave leva ʻe Timi mo Mati ʻena ngaahi mahafu taú ki he holoholoʻanga lahi ʻi he hūʻangá.
Naʻe talaange ʻe Timi, “Ta pehē pē ko e fuʻu luó ʻa e holoholoʻangá.
Naʻá na tangutu leva ʻi he veʻe holoholoʻangá. Pea na tuku takitaha ʻena ngaahi heletaá ki he holoholoʻangá ʻo fakangalingali ʻokú na tanu kinautolu.
Pehē ange ʻa Timi, “ʻOku ou palōmesi he ʻikai te u toe tau,” mo lī hifo ʻene meʻavaʻinga heletā fakaʻosí ki he fokotuʻungá.
Pehē ange ʻa Mati, “Mo au pē.” “Ta ō leva he taimí ni ʻo vaʻinga! Ko e hā ʻokú ke fie faí?”
Naʻe pehē ʻe Timi mo e malimalí, “Ta tā fakatātā”
Malimali ange ʻa Mati. “Hili ia peá ta ō ʻo vaʻinga ʻi he vaka vavā ʻi tuʻá.”
Naʻe tauhi ʻe Timi mo Mati ʻena palōmesí ʻi he toenga ʻo e uiké. Pea naʻá na fiefia ange ke vaʻinga fakataha hili e tuku ʻena keé.