Ko e Kau Sola Ne Hoko Ko e Fāmili
Sefi Misieli
ʻIutā, USA
Tā fakatātā ʻe Allen Garns
ʻI he pō ʻe taha, ne tā mai hoku foha ko Keletí mei ʻOu Kelea, Uisikonisini, USA. Naʻe fononga mo hono uaifi ko Selí pea mo ʻena fānaú, mei ʻAlapama, ʻa ia ne ako fakakautau ai ʻa Keleti, ʻi he Peisi Laulāpuna Mainotí ʻi Takouta Noate. Naʻá ne fakamatala ne lolotonga ʻenau fononga ʻi Uisikonisiní, kuo puke lahi ʻa Seli. Ne nau maʻu ha falemahaki, pea naʻe palani ha faitoʻo fakatuʻupakē kia Seli he pongipongi hono hokó.
Naʻá ku aleaʻi ke u puna ʻo fakafetaulaki kiate kinautolu, ka ʻe toki lava ke u aʻu ki ai ʻi he ʻaho hono hokó. Naʻe fakahaaʻi ʻe hoku fohá ʻene hohaʻa fekauʻaki mo e meʻa ke fai ki heʻene fānaú—ko ha tamasiʻi taʻu nima, taʻu taha, mo ha pēpē ne uike ʻe tolu—he lolotonga e tafa ʻenau faʻeé. ʻI he ʻikai ke ne ʻilo ha taha he feituʻu ko iá, naʻá ne fakakaukau ke tā ki he pīsope ʻi Mainotí, neongo naʻe teʻeki ke na fetaulaki. Naʻe pehē ʻe he pīsope ʻi Mainotí te ne fetuʻutaki ki he pīsope ʻi ʻOu Keleá.
ʻI he pongipongi hono hokó, naʻe feʻiloaki ʻa e pīsope ʻi ʻOu Keleá, fakataha mo e palesiteni ʻo e Fineʻofá mo Keleti ʻi he hōtelé. Naʻá na pehē te na fiefia ke tokangaʻi e fānaú he lolotonga e tafa ʻa Selí. Naʻe toki pehē ʻe Seli kimui ai naʻá ne mātuʻaki nonga ke tuku ki ha ongo sola—ʻa ia ko e fāmili ʻi he ongoongoleleí—ke tokangaʻi ʻene fānaú. ʻI he taimi ne u aʻu atu ai ki ʻOu Keleá, naʻe fakaakeake ʻa Seli pea naʻe toe foki hoku makapuná ki ai mo Kēleti. Naʻa mau houngaʻia ʻi he tokoni ne mau maʻu ʻi he taimi ʻo ʻemau faingataʻaʻiá.
ʻI ha ngaahi uike siʻi mei ai, naʻá ku mamata ʻi he konifelenisi lahi ʻo ʻOkatopa ʻo e 2016 ʻi he pehē ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, “Te ke ʻalu ki fē ke maʻu ha Siasi kuo fokotuʻutuʻu fakalelei mo fakalaumālie ʻoku akoʻi pea poupouʻi ai koe ʻe ha houʻeiki tangata mo fafine ʻoku tukupā kakato ke tauhi ki he ʻEikí ʻaki ʻenau tokoniʻi koe mo ho fāmilí?” (“Te Mau ʻAlú kia Hai?” Liahona, Nōvema 2016, 91).
Naʻá ku fakakaukau ki he meʻa naʻe hoko ʻi ʻOu Keleá. Ko ha tāpuaki, ke ʻikai ngata pē ʻi heʻete hoko ko ha mēmipa ʻo e Siasí kae hoko foki ko ha mēmipa ʻo ha fāmili ʻi he ongoongoleleí, ʻa ia ʻe lava ke tau tokoni mo tāpuakiʻi ai e niʻihi kehé, ʻo tatau ai pē pe ʻoku tau ʻi fē.