Naʻe Ongoʻi ʻe he Tamai Hēvaní ʻEku Lotú

Lesieli E. Petilasa ti Polosio

ʻIutā, USA

Naʻá ma kei nofo pē ʻi homa fonua tupuʻangá, ʻi ʻĀsenitina, ʻi he taimi naʻá ku kamata ai mo hoku husepānití homa fāmilí. Ne ʻosi ʻema ngāue fakafaifekaú mo ʻiloʻi ko ha tāpuaki ke mali ʻi he temipale ʻa e ʻEikí. Naʻá ma fiefia ke fononga fakataha he hala foki ki he Tamai Hēvaní.

Ne ma ʻiloʻi naʻe kau ʻi he palani ʻo e fakamoʻuí ha ngaahi faingataʻa, ka naʻá ma falala ʻe lava ke ma ikunaʻi ha faʻahinga meʻa pē ʻi he tuí mo e lotú. Ka naʻe ʻikai ke ma ʻamanaki ʻe fasitanunu ʻa e faingataʻá, ʻo ʻikai toe ʻosi. Naʻe hangē ne ʻuha mai e ngaahi faingataʻá kiate kimauá.

Naʻá ku nofo tokotaha pē ʻi ha hoʻatā ʻe taha, ongoʻi loto mamahi mo tangi halotulotu koeʻuhí ko homa ngaahi faingataʻaʻiá. Naʻe ʻikai ke u ʻilo e meʻa ke faí. Ko e taimi kotoa pē naʻá ku feinga ai ke tuku ʻeku tangí, naʻá ku ongoʻi loto mamahi lahi ange.

Peá u fakakaukau leva ki he kau tangata mo e kau fafine tokolahi ne nau fakamatala mai hono mahuʻinga ʻo e lotú kiate kinautolu he lolotonga e ngaahi taimi faingataʻá. Naʻá ku maʻu ha fakamoʻoni ki he lotú, ka naʻe mamahi lahi hoku ʻatamaí mo e laumālié ʻou fakakaukau ai he ʻikai lava ke u maʻu ʻa e ngaahi lea ke lea ʻakí.

ʻI he loʻimataʻia, Ne u tūʻulutui ʻi hoku veʻe mohengá pea naʻá ku kole ki he Tamai Hēvaní ʻaki hoku lotó kotoa ha fakafiemālie mo ha nonga. Naʻe ʻikai ke u kole ha fakalelei pē ke mole atu e faingataʻá. Naʻá ku kole pē ha nonga.

Lolotonga ʻeku lotú, kuó u fanongo ki ha tukituki ʻi he matapaá. Ne u fakaava, ʻoku ou kei tangi pē, ʻo u mamata ki ha fefine mei he Fineʻofá. Naʻá ne talamai naʻe ngāue ʻi he feituʻu ko ʻení peá ne afe mai ʻi heʻene paikí. Ko e meʻa pē ne u faí ko e fāʻofua ai. Naʻá ne pehē, “ʻOku ʻikai ke u ʻilo hono ʻuhingá, ka naʻá ku ongoʻi naʻe fie maʻu ke u afe mai ʻo vakai koe.”

Naʻá ma tangutu ʻi hoku peitó peá ne tokoniʻi au ke u nonga hifo. Hili ʻeku talanoa mo ia ʻi ha ngaahi miniti siʻi, kuo kamata ke u ongoʻi naʻe ʻikai ke u tuēnoa pea kuo ʻafioʻi ʻe he Tamai Hēvaní ʻeku lotú.

Ko ha tāpuaki ke lava ʻo fakataufolofola mo ʻeku Tamai Hēvaní ʻi he lotu. Naʻá Ne fakafanongo kiate au ʻi hoku taimi faingataʻaʻiá pea fekau ha taha ʻo ʻEne fānaú ke tokoniʻi au. ʻOku ou houngaʻia naʻe fanongo ʻa e fefine ko ʻení ki he ueʻi ʻa e Laumālié pea muimui ki ai.