ʻI he Tuʻunga Malangá

Ko e Hā ʻa e Tui?

Fai ʻe Mary B. Ferguson

Laʻitā ʻo Sisitā Fekasoní, ʻi he angalelei ʻa e Laipeli Hisitōlia ʻa e Siasí; fakaʻesia ʻe he Getty Images

Fekauʻaki mo Sisitā Fekasoni

Naʻe fāʻeleʻi ʻa Mele Tinitale Pekisitā Fekasoni (1826–1909) ʻi Kalasikou, Sikotilani, pea liʻekina ʻi heʻene kei siʻí. Hili hono fakafeʻiloaki ia ki he kau faifekau Māmongá, naʻe taʻe-fiemālie ʻa Sisitā Fekasoni, ka ʻi he lahi ange ʻene akó, ko e lahi ange ia ʻene ʻiloʻi ʻoku moʻoni ʻa e Siasí. Naʻe papitaiso ʻi ʻOkatopa ʻo e 1846 peá ne tohi ai ʻo pehē ko hono olá, “ne liʻaki au ʻe hoku ngaahi kaungāmeʻá pea toʻo hoku hingoa leleí ʻo ʻai ko e kovi, koeʻuhi ko e ongoongoleleí.”

Naʻe fetaulaki ʻa Mele mo Sione Pekisitā ʻi ha konifelenisi ʻa e Siasí ʻi Sikotilani, ʻo na mali ʻi he 1849. Naʻá na hikifonuá ki he ʻIunaiteti Siteití ʻi he 1851. Naʻá ne tauhi hono husepānití ʻi heʻene mahamahakí, ko e haʻahaʻa ʻo ʻene ngāue taʻu lahi ʻi ha keliʻanga malala. Naʻe mālōlō ʻa Sione ʻi he 1869, pea tuku ai ʻa Mele ke ne tauhi ha fānau ʻe toko fitu. Naʻe fakamatalaʻi kimui ange ʻe he hisitōlia hono meʻa fakaʻeikí ʻi he nusipepá ʻa ʻene “fāifeinga faingataʻa ke ohi mo tokangaʻi ha fāmili tokolahi ʻoku ʻi ai e fānau īkí, ka naʻe ongona ʻe he ʻEikí ʻene tangí peá Ne tāpuekina ia mo teuteuʻi ke ne fua ʻene kavenga mafasiá.”

Naʻe tauhi ʻe Sisitā Fekasoni hono fāmilí ʻaki ʻene hoko ko ha neesi mo e māʻuli. Naʻe fāifai peá ne toe mali pea hiki ki Sipēnisi Fooki, ʻIutā, ʻo ngāue taʻu lahi ai ko e Palesiteni ʻo e Fineʻofá. Naʻe fakahaaʻi heʻene ngaahi aʻusiá ʻa ʻene lotoʻaki e ʻOtuá neongo e ngaahi faingataʻa ʻi heʻene moʻuí. Ko e lea ʻoku toʻo fakakonga hení, naʻe fai ia ki he kau finemuí ʻi he 1879.

Tā fakatātaaʻi ʻe Dan Burr

ʻI he hoko ʻa e tuí ko e ʻuluaki tefitoʻi moʻoni ʻo e ongoongoleleí, ʻoku ʻaonga ke tau fehuʻi, Ko e hā ʻa e tui? ʻOku talamai ʻe he folofolá “ko e tuí ko e tuʻunga ia ʻo e ngaahi meʻa ʻoku ʻamanaki lelei ki ai, ko e fakamoʻoni ʻo e ngaahi meʻa taʻe hā mai” [Hepelū 11:1]. … Ko ia ai ʻi heʻetau talangofua ki he ongoongoleleí, ʻoku muimui mai ai e ngaahi tāpuaki paú; ka ʻo ka tau pehē ʻoku tau tui pea ʻikai ke tau talangofua, ʻoku taʻeʻaonga leva ʻetau tuí. ʻOku hangē ia ko e sinó taʻe ʻi ai e laumālié, ʻo mate. ʻE hoku ngaahi tokoua kei talavou, ko e tui moʻui ʻeni naʻá ne fakatupu hoʻomou ngaahi tamaí mo e ngaahi faʻeé ke nau talangofua ki he ongoongoleleí ʻi honau ngaahi fonua tupuʻangá mo e ngaahi ʻapí; ʻi he lotolotonga ʻo e manuki mo e fakatangá, pea nau mavahe ai ʻi heʻenau tuí mei honau ʻapí mo e kāingá mo e kotoa pē naʻe mahuʻinga kiate kinautolu, ʻo folaua ʻa e tahi hoú, … ʻo falala pē ki he toʻukupu ʻo Sihová ke ʻomi lelei kinautolu ki ha hufangaʻanga ʻo e mālōlō; pea ko honau tokolahi ne teʻeki ke nau ʻiloʻi e ngaahi ʻahiʻahi mo e ngaahi faingataʻa ʻo e moʻuí. … ʻE hoku ngaahi tokoua kei talavou, fakakaukau ki ai: ki he fononga hoʻomou ngaahi tamaí mo e ngaahi faʻeé ʻi ha maile ʻe lauiafe tupu (kilomita ʻe 1,609) ʻo toho ha saliote toho tangata, mo e meʻatokoní, mo e nāunau mohengá, nāunau feimeʻatokoní, valá mo e ngaahi alā meʻa peheé, ko e tokolahi ʻo kinautolu ne ʻi ai ʻenau fānau iiki; ʻo aʻa ʻi ha ngaahi vaitafe ne aʻu hake ki honau kongalotó pea mo fāifeinga ʻi he ʻoneʻone tatanú ʻo laumālie, ka ʻi he veʻe afí ʻi he poʻulí, ne ongo ʻenau ngaahi hiva fakafetaʻí ki he ʻOtuá, he naʻe tō e ngaahi tefitoʻi moʻoni ʻo e tuí ʻi honau lotó; ne nau maʻu ha fakapapau ʻo e ngaahi meʻa taʻe hā maí; ka ʻi he tuí ne nau tūʻuta mai ki he ngaahi teleʻa ko ʻení; naʻe ʻikai ko ha ngaahi teleʻa kelekele moʻui ʻo hangē ʻoku mou vakai ki ai he taimi ní. ʻI he tuí naʻa nau liliu e kelekele kovi mo kakaá, pea ʻi he ngaahi tāpuaki ʻa e ʻOtuá kuo ola ʻenau ʻai e toafa mamaté ke matala hangē ko e losé. …

ʻE ʻosi e taimí ia kapau teu fakamatala atu ʻa e ngaahi sivi ʻo ʻemau tuí ʻa ia ne fakatupu ʻe he fanga kakalú, heʻé, laʻalaʻá, tāfeá, pea mo e fakatanga foki ʻa homau ngaahi filí; ka ko hono kātoá, ʻoku mau hoko ko ha kakai monūʻia mo fiefia ʻaupito; pea ʻi he tuí, ʻoku mau taumuʻa ke fakautuutu mo tupulaki pea mafola atu ki muli kae ʻoua kuo ʻikai hano ngataʻanga, ʻo hangē ko ʻĒpalahame he kuonga muʻá.

Ka, ʻe hoku ngaahi kaungāmeʻa kei talavou, ʻoku fie maʻu ke ʻoua naʻá ke fakakaukau, ʻoku ʻikai ha meʻa ke mou fai koeʻuhi kuo lahi e meʻa kuo mau fakahokó; kuo pau ke mou mafola atu ki muli. ʻOku fie maʻu ke ʻoua naʻá ke fakakaukau ʻe hao ʻa e fānau ʻo Saioné he vahefonua ʻo ʻIutaá. Kuo pau ke mou langa ha ngaahi kolo nofoʻanga foʻou. …

Ko ia, feinga fakamātoato ki he tui naʻe foaki ki hoʻomou ngaahi tamaí ʻi he ngaahi ʻaho fakaʻosi ko ʻení, koeʻuhí ke mou lava ʻi he tuí ke tokoni ke fakahoko ʻa e ngaahi taumuʻa ʻa Sihová; pea fakatauange ke nofoʻia ʻe he ivi tākiekina ʻo e Laumālie ʻo e ʻOtuá ʻa e fānau ʻo Saioné, koeʻuhí ke hangē ha afi kakahá ʻiate kinautolu, ‘o ʻomi ha fua lahi ki he māʻoniʻoní.

ʻOku fakaʻilongaʻi ʻe he polokalama foʻou ko ʻení e moʻui ʻa e kau fefine moʻui līʻoá mo ʻenau ngaahi pōpoakí, toʻo mei he tohi At the Pulpit: 185 Years of Discourses by Latter-day Saint Women (2017).