Ko ha Tohi ʻa Molomona Motuʻa

Taani Hopo

ʻAitahō, USA

ʻI he ngaahi taʻu kuo hilí, ne u maʻu ha meili leʻo ʻi heʻeku telefoní: “Ko Taani Hopo ʻeni naʻe nofo ʻi ʻAitahō Folo pea naʻe ngāue fakafaifekau ʻi Uāsingatoni ʻi he 1974? Ko Tomu Sanaki ʻeni. ʻOku ou tui naʻá ke akoʻi ʻeku fineʻeikí mo ʻeku tangataʻeikí.”

Naʻá ku ʻohovale. Naʻá ku ngāue fakafaifekau ʻi Tekisisi, USA, kae ʻikai ʻi Uāsingatoni, ka naʻá ku fakatokangaʻi e hingoá. Naʻá ku fakakaukau ki he tohi ʻi heʻeku funga toloá—ko ha paaki ʻo e Tohi ʻa Molomoná he 1948. Ne u fakaava ia ki ha pōpoaki kuo ʻosi hiki tohinima ʻi he peesi takafi muʻá: “ʻOfa ke ʻiate koe ʻa e ʻOtuá. ʻOfa ke tāpuekina koe ʻe he ʻOtuá! Falangikē mo Veisinia Sanaki, 1974.” Fakafokifā kuo toe foki ʻeku manatú ki he taʻu ʻe 35 ki muʻa.

Naʻá ku taʻu 21 mo ofi ke ʻosi ʻeku ngāue fakafaifekaú ʻi Hiusitoni, Tekisisi. Naʻá ku uiui mo hoku hoá kae ʻikai ha ola fēfē, peá ma tukituki ʻi he matapā ʻo tali ʻe ha tangata peá ne fakaafeʻi kimaua ki loto. Naʻá ne fakafeʻiloaki mai ia ko Falangikē Sanaki pea fakafeʻiloaki kimaua ki hono uaifi ko Veisiniá. Ne mau talanoa taimi nounou pē.

Naʻá ma akoʻi e ongoongoleleí ʻi heʻema ngaahi ʻaʻahi hoko atu aí. Naʻe ʻikai ke na mahuʻingaʻia ʻi he papitaisó, ka naʻá na anga fakakaumeʻa maʻu pē. Lolotonga ha lēsoni ʻe taha, ne u fakatokangaʻi ha tatau motuʻa ʻo e Tohi ʻa Molomoná ʻi ha funga tukuʻanga tohi. ʻOku ʻikai ke u manatuʻi e founga naʻá na maʻu aí, ka ʻoku ou manatuʻi ʻa ʻeku fakahā ʻa ʻeku fakaʻofoʻofaʻia aí.

Kimuʻa siʻi peá u foki ki ʻapí, naʻá ku afe ai mo hoku hoá ke fakalea fakaʻosi. Ka kimuʻa peá ma mavahé, ne fakamoʻoni hingoa ʻa Falangikē ʻi he Tohi ʻa Molomona motuʻá peá ne foaki ia kiate au, ko ha meʻaʻofa fakamāvae. Naʻá ne kole pe te u fai fakamoʻoni hingoa ʻi heʻene Tohi Tapu fakafāmilí, fakataha mo hoku hingoá mo e tuʻasilá. Ko e taimi fakamuimuitaha ia ne u sio ai ki he fāmili Sanakí, ka kuó u tauhi maʻu pē ʻena meʻaʻofá.

Naʻá ku tā fakafoki e telefoní ʻi he efiafi ko iá. Naʻe toe fehuʻi mai ʻa Tomu pe naʻá ku ngāue fakafaifekau ʻi Uāsingatoni ʻi he 1974. Ne u fakahā ange naʻá ku ngāue ʻi Tekisisi peá u ʻeke ange pe ko ʻene ongo mātuʻá ʻa Falangikē mo Veisinia.

Naʻá ne talamai naʻe hiki ʻene ongo mātuʻá mei Tekisisi ki Uāsingatoni. Naʻá ne fakakaukau ko e kau faifekau ne ʻaʻahi ki heʻene ongo mātuʻá naʻe ʻi Uāsingatoni. Na‘á ne pehē naʻá ne maʻu hoku hingoá mo e tuʻasilá mei he Tohi Tapu fakafāmilí.

Naʻá ne pehē, “ʻOku ou telefoni atú ke fakahā kiate koe kuó u papitaiso mo hoku tokouá, koeʻuhí pē ko e angalelei ʻa e kau faifekaú ki heʻema ongo mātuʻá.” “Naʻá na mātuʻaki ʻofa ʻi he kau faifekau kotoa pē ne fetuʻutaki mo kinaua ʻi he ngaahi taʻú.”

Hili ia pea fakahā mai ʻe Tomu kuó na ʻosi siʻi mālōlō fakatouʻosi.

Naʻá ne pehē, “Ka ʻoku mau fakakakato he taimí ni hona ngāue fakatemipalé.”

Ne u fakamālō kia Tomu koeʻuhí ko ʻene tā maí ʻi he loʻimataʻia.

ʻI ha ngaahi taʻu lahi, ne u ongoʻi naʻe ʻikai ola fēfē ʻeku ngāue fakafaifekaú. Taimi ʻe niʻihi, naʻá ku fifili pe ne u tokoniʻi nai ha taha he lolotonga ʻeku ngāué. Naʻe hoko ʻa e telefoni ʻa Tomú ko ha ʻaloʻofa ongongofua mei he ʻEikí. ʻOku ou houngaʻia ʻi heʻeku ngāue fakafaifekaú mo e kihiʻi konga siʻi ne u kau atu ki ai ʻi hono ʻomi ʻo e ongoongoleleí ki he fāmili Sanakí.