ʻE Lava Ke u Ngāue Ai?
Mei he ʻuluaki sēniti ʻe taha naʻá ku faʻo ki heʻeku hina paʻanga ki heʻeku ngāue fakafaifekaú, ne u ʻiloʻi naʻá ku fie ngāue. Ne u tānaki ha paʻanga ʻi ha taʻu ʻe 12 ʻi he taimi naʻe fanongonongo mai ai ʻe lava ke ngāue ʻa e kau fafiné ʻi he taʻu 19. Neongo naʻe ʻikai ke u fakapapauʻi pe ko e taimi totonu ia kiate aú, ka naʻe tali ʻe he ʻEikí ʻeku ngaahi lotú, pea naʻe ueʻi au ke u kamata ʻeku foomu ngāue fakafaifekaú.
Ne u fie maʻu ke totonu hoku uiuiʻi ngāue fakafaifekaú mou ʻiloʻi ko ʻeku faitotonu ki he kau taki ʻo e Siasí, ʻo tautautefito ki he tuʻunga ʻo ʻeku moʻui leleí, ko e founga pē ia ke ongoʻi ai ha nongá. ʻOku ou mahaki moa, ʻa ia ko ha tuʻunga moʻui ia ʻokú ne fakatupu ha ngaahi hamu taʻeʻamanekina. Meʻa mālie, ʻoku puleʻi kakato ʻeku tuʻunga moʻuí ʻaki e faitoʻó. Neongo ia, ʻe lava ke fakangatangata e feituʻu ʻe vahe ke u ngāue aí ʻe heʻeku fakafalala ki he faitoʻó.
Fakakaukau ki heʻeku ʻohovale ʻi hono ui au ke u ngāue ʻi he Misiona Lepāpulika Tominikeni Sanitō Tomingiko Hahaké! Ka naʻe ʻi ai ha palopalema: naʻá ku toki ʻilo ne ʻikai maʻu ʻeku faitoʻó ʻi he Lepāpulika Tominikení. Naʻá ku puputuʻu. Ko e hā e ʻuhinga ʻe ueʻi fakalaumālie ai ʻe he ʻEikí ʻa e kau taki ʻo e Siasí ke ʻave au ki ha feituʻu ʻoku ʻikai maʻu ai ʻeku faitoʻó?
Ne u lotua fakataha mo hoku fāmilí ke maʻu ha tali. Naʻá ku ongoʻi mālohi naʻe fie maʻu moʻoni au ʻe he ʻEikí ke u ngāue ʻi he Lepāpulika Tominikení, ko ia ne mau ngāue leva. Naʻe fai mai ʻe he toketaá e tohi faitoʻo feʻunga mo e māhina ʻe 18, ka ne totongi pē ʻe he maluʻi moʻuí ia e taʻu ʻe taha, kae tuku ke mau totongi e māhina fakaʻosi ʻe 6. ʻI heʻemau hoko atu ʻi he tuí, ne mau maʻu ha founga maʻamaʻa ange.
Ko e taimi naʻe vaheʻi ai aú, ne tāpuakiʻi au ʻe heʻeku palesiteni siteikí ke ʻoua naʻa uesia au ʻe hoku tuʻunga moʻuí he lolotonga ʻeku ngāue fakafaifekaú—ko ha palōmesi teu lava ke fakamoʻoniʻi naʻe fakahoko. Neongo naʻá ku aʻu ki he ngataʻanga ʻo hoku tuʻunga fakaesinó, ka ʻoku ou ʻiloʻi, tuʻunga ʻi he Fakalelei ʻa Sīsū Kalaisí, naʻá ku lava ai ʻo ikunaʻi e ngaahi faingataʻa ne u fehangahangai mo ia kimuʻa pea mo e lolotonga ʻeku ngāue fakafaifekaú.