Te ’oa’oa nō te tāvinira’a pipiri ’ore

Nā Cristina B. Franco

Tauturu piti i roto i te peresidenira’a rahi o te Paraimere

’Ua parau fafau tātou i tō tātou Metua i te Ra’i ē, e tāvini tātou iāna ’e ia vetahi ’ē ma te here, ma te rave i tōna hina’aro i roto i te mau mea ato’a.

I muri mai i te ’āmuira’a rahi i ma’iri, e rave rahi ta’ata tei ui mai iā’u : « E aha te huru terā mau pārahira’a, e mea au ānei ? » Hō’ē noa pāhonora’a tā’u : « E mea au maita’i terā mau pārahira’a mai te mea ’aita ’oe e hōro’a i te a’ora’a ». Parau mau, e ’ēre ? ’Aita tō’u pārahira’a i au maita’i i teie ’āmuira’a, ’ua māuruuru rā vau nō te ha’amaita’ira’a ’e te tura ’ia paraparau ia ’outou i teie pō.

I roto i tā tātou tāvinira’a, e pārahi tātou i ni’a i te mau pārahira’a ta’a’ē tē tahi ’e tē tahi. Tē vai ra e mea marū maita’i ’e tē vai ra ’aita, ’ua parau fafau rā tātou i tō tātou Metua i te Ra’i ē, e tāvini tātou iāna ’e ia vetahi ’ē ma te here, ma te rave i tōna hina’aro i roto i te mau mea ato’a.

Tau matahiti a’enei, ’ua ha’api’i te feiā ’āpī o te ’Ēkālesia ē, « ’ia ‘ha’amata [’oe] i te rave i te ’ohipa a te Atua’ [Te Parau Ha’api’ira’a ’e te mau Parau Fafau 4:2], tē ’āmui ra ïa ’oe i te tere rahi roa a’e. Tē tauturu nei ’oe i te Atua ’ia ha’ape’epe’e i tāna ’ohipa, e ’ohipa rahi ho’i ’e te ’oa’oa ’e te māere ».¹ E tere teie tei matara i te tā’āto’ara’a—noa atu te matahiti—’e e tere e fa’ahaere ia tātou i ni’a i tā te peropheta i parau « te ’ē’a nō te fafaura’a ».²

Te vāhi ’ino rā, e ao pipiri tā tātou e ora nei i reira te ta’ata e tāmau noa ai i te ui : « E aha tō’u ’āpī i reira ? » e ’ere rā « ’O vai tā’u e tauturu i teie mahana ? » ’aore rā « Nāhea vau e tāvini maita’i a’e i te Fatu i roto i tā’u pi’ira’a ? » ’aore rā « Tō’u tā’āto’ara’a ānei tā’u e hōro’a ra i te Fatu ? »

Hō’ē hi’ora’a rahi nō te tāvinira’a pipiri ’ore i roto i tō’u orara’a, ’o te tuahine Victoria Antonietti ïa. E ’orometua Paraimere ’oia i te ’āma’a i pa’ari ai au, i Rāparata. Pauroa te avatea mahana piti, ’ia putuputu mātou nō te Paraimere, e ’āfa’i mai ’oia i te hō’ē faraoa monamona tōtōrā. ’Ua au pauroa te ta’ata i te faraoa monamona—pauroa, ’eiaha rā vau. E mea au ’ore nā’u te faraoa monamona tōtōrā. ’E noa atu e tāmata ’oia i te tāpū mai te tahi nā’u, e fa’a’uture’a atu vau.

Hō’ē mahana, i te otira’a ’oia i te ’ōpere i te faraoa monamona tōtōrā i te toe’a o te mau tamari’i, ’ua ui atu vau : « Nō te aha ’oe ’aita e ’āfa’i mai i te tahi atu faraoa monamona—mai te ’ānani ’aore rā te vānira ? »

’Ua ’ata ri’i ’oia ’ei reira tōna anira’a : « Nō te aha ’aita ’oe e tāmata ri’i noa i teie ? E ’ōhipa ta’a ’ē i roto i teie faraoa monamona, ’ia tāmata ’oe, e au roa ’oe ! »

’Ua hi’o vau i te tamari’i ’ati a’e iā’u, ’ua māere au, e au ē, tē au nei rātou i terā faraoa monamona. ’Ua fāri’i au e tāmata. ’E ’ia mana’o ’outou e aha tei tupu ? ’Ua au roa vau ! ’O te taime mātāmua vau i au ai i te hō’ē faraoa monamona tōtōrā.

Tau matahiti i muri mai tō’u ’itera’a i te ’ohipa ta’a ’ē i roto i te faraoa monamona tōtōrā a te tuahine Antonietti. E haere au ’e ta’u mau tamari’i i tō’u metua vahine ra pauroa te hepetoma. I te hō’ē taime, tē ’amu ra māua tō’u māmā i te tahi faraoa monamona tōtōrā, ’ua fa’ati’a atura vau iāna nāhea tō’u aura’a mai i te reira i te taime mātāmua. Nāna ïa i ha’amāramarama mai i te hope’a o te ’ā’amu.

’Ua nā ’ō mai ’oia : « ’Ia ’ite ’oe Cris, ’aita tā Victoria ’e tōna ’utuāfare moni rahi roa, ’e pauroa te hepetoma e feruri ’oia e ’aufau ānei i te pere’o’o mata’eina’a nōna ’e tāna e maha tamari’i nō te haere mai i te Paraimere ’aore rā e ho’o i te mau ’ohipa nō te faraoa monamona tōtōrā nō te Paraimere. E mā’iti noa ’oia i te faraoa monamona tōtōrā ’eiaha te pere’o’o mata’eina’a, ’e e nā raro noa mai rātou hau i te piti maile [3 km], noa atu te huru o te reva ».

I terā mahana, ’ua māuruuru rahi roa atu ā vau nō tāna faraoa monamona tōtōrā. Hau atu, ’ua ha’api’i au ē, te ’ohipa ta’a ’ē i roto i te faraoa monamona a Victoria, ’o tōna ïa here i te ta’ata tāna e tāvini ’e tāna tusia pipiri ’ore nō mātou nei.

’Ia feruri au i tāna faraoa monamona, e ha’amana’o ato’a vau i te hō’ē tusia pipiri ’ore i roto i te mau ha’api’ira’a mōrohi ’ore a te Fatu i tāna mau pipi ’a haere ai ’oia i te vaira’a tao’a o te hiero. ’Ua ta’a ia ’outou te ’ā’amu. ’Ua ha’api’i Elder James E. Talmage ē, 13 vaira’a tao’a, « ’e i roto, e fa’atopa te ta’ata i tā rātou moni tauturu nō te mau ’ōpuara’a [ta’a ’ē] tei pāpa’ihia i ni’a i te mau ’āfata ». ’Ua hi’o Iesu i te mau ’āpapara’a ta’ata hōro’a, e mau ta’ata huru rau. Tē vai ra tei hōro’a « ma te hina’aro mau » ’e tē vai ra tei tu’u « i te ’ārio ’e te ’auro », ’ia hi’o a’e te ta’ata ia rātou, ’ia ’itehia ’e ’ia ’āruehia tā rātou i hōro’a.

« ’Ua haere maira te hō’ē vahine tao’a ’ore, e ’ivi, ’ua tu’u maira i e piti toata veo tei parauhia e lepeta ; te fāito moni tāna i hōro’a, tei raro mai ïa i te hō’ē toata moni marite. ’Ua parau atura Iesu i tāna mau pipi ’ia tāpiri mai, ma te fa’a’ite i te vahine ’ivi veve ’e tāna i hōro’a, ’ua nā ’ō atura : ‘’Oia mau tā’u e parau atu ia ’outou nei, E rahi tā teie nei vahine ’ivi tao’a ’ore i tu’u i roto i te pu’era’a tao’a nei i tā rātou ato’a. E ti’ahapa ho’i nō tā rātou tao’a rahi tā rātou i tu’u i roto, ’āre’a ’oia ’ua hope roa āna tao’a ri’i nava’i ’ore i te tu’uhia e ana i roto’ [Mareko 12:43-44] ».³

’Ia hi’ohia, ’aita tā teie vahine ’ivi e ti’ara’a fa’ahiahia i roto i te sōtaiete i tōna tau. E ’ohipa faufa’a a’e rā e vai ra : e mea ateate tōna mau hina’aro, ’e ’ua hōro’a ’oia i te tā’āto’ara’a tei tītauhia iāna ’ia hōro’a. E mea iti a’e paha tāna i hōro’a i tā vetahi ’ē, e mea māniania ’ore a’e paha, e mea ta’a ’ē paha. ’Ia hi’o vetahi ra, e mea faufa’a ’ore tāna i hōro’a, ’ia hi’o rā te Fa’aora, « te hāro’aro’a o te ferurira’a ’e te hina’aro o te ’ā’au »,⁴ ’ua hōro’a ’oia i te tā’āto’ara’a nāna.

E te mau tuahine, tē hōro’a hua ra ānei tātou i tā tātou tā’āto’ara’a nā te Fatu ? Tē fa’atusia ra ānei tātou i tō tātou taime ’e te mau tārēni, ’ia ha’api’i mai te u’i ’āpī ’ia here i te Fatu ’e i tāna mau fa’auera’a ? Tē aupuru ra ānei tātou i te feiā ’ati a’e ia tātou to’opiti ’e te feiā tei fa’ata’ahia nā tātou, ma te maita’i ’e te itoito—ma te fa’atusia i te taime ’e te pūai e nehenehe e fa’a’ohipa maita’i atu ā ? Tē ora ra ānei tātou i nā fa’auera’a rahi e piti—here i te Atua ’e here i tāna mau tamari’i ?⁵ E ’ite-pinepine-hia te reira here i roto i te tāvinira’a.

’Ua ha’api’i te peresideni Dallin H. Oaks : « ’Ua hōro’a tō tātou Fa’aora iāna iho i roto i te tāvinira’a pipiri ’ore. ’Ua ha’api’i ’oia ē, ’ia pe’e tātou tāta’itahi iāna e ti’a ai, ma te pāto’i i tō tātou iho ’ana’anatae pipiri i te tāvinira’a ia vetahi ’ē ».

’Ua parau fa’ahou ’oia :

« Te hō’ē hi’ora’a mātauhia nō te ha’amo’era’a ia ’outou iho i roto i te tāvinira’a ia vetahi ’ē… ’o te tusia ïa tā te mau metua e rave nō tā rātou mau tamari’i ». E māuiui te metua vahine ’e e ha’amo’e i tāna iho mau ’ōpuara’a mātāmua ’e te orara’a au maita’i nō te fānau ’e nō te fa’a’amu i te tamari’i tāta’itahi. E fa’aau te metua tāne i tōna orara’a ’e tāna iho mau ’ōpuara’a mātāmua ’ia ora tōna ’utuāfare…

« Tē ’oa’oa ato’a nei tātou i te feiā ’o tē ha’apa’o nei i te mau fēti’i huma ’e i te mau matahiapo. ’Aita roa teie huru tāvinira’a e ani, e aha tō’u ’āpī i reira ? E tītau teie mau mea ato’a ’ia vaiiho i te hiti i tō tātou fāna’ora’a nō te tāvini ma te pipiri ’ore…

« [’E] e mau fa’aaura’a ana’e teie nō te parau tumu mure ’ore ē, e rahi a’e ’e e rahi roa te ’oa’oa ’ia ’ohipa ’e ’ia tāvini ho’i tātou nō te hōro’a atu ’eiaha rā nō te noa’a mai.

« Tē ha’api’i mai nei tō tātou Fa’aora ’ia pe’e iāna nā roto i te ravera’a i te mau tusia tītauhia nō te ha’amo’e ia tātou i roto i te tāvinira’a pipiri ’ore ia vetahi ’ē ».⁶

’Ua ha’api’i ato’a te peresideni Thomas S. Monson ē, « penei a’e ’ia fārerei atu tātou i tō tātou Hāmani mata ’e mata, e’ita tātou e anihia, ‘E fea ti’ara’a tā ’oe i amo ?’ e anihia rā, ‘E fea ta’ata tā ’oe i tauturu ?’ ’Oia mau, e’ita roa e nehenehe e here i te Fatu ē tae noa atu e tāvini ’oe iāna nā roto i te tāvinira’a i tōna mau ta’ata ».⁷

’Oia ho’i, te mau tuahine ē, e’ita e ha’apa’ohia mai te mea ’ua pārahi ānei tātou i ni’a i te mau pārahira’a marū ’aore rā ’ua fa’a’oroma’i noa tātou i ni’a i te mau pārahira’a tutae ’auri i muri i te piha. E’ita ato’a e ha’apa’ohia mai te mea ’ua tītauhia ia ’outou ’ia haere i rāpae i te purera’a ’ōro’a nō te fa’anā i te pēpe. Te mea e ha’apa’ohia, ’oia ho’i, ’ua haere mai tātou ma te hina’aro e tāvini, ’ua ’ite tātou i te feiā tā tātou e aupuru ’e ’ua fārerei atu ma te ’oa’oa, ’e ’ua paraparau tātou i te ta’ata e pārahi ra i ni’a i tā tātou ’āna’ira’a pārahira’a tūfetu—ma te toro atu i te rima hoa noa atu ā ’aita tātou i fa’ata’ahia nō te aupuru ia rātou. ’E pāpū e ha’apa’ohia ē, tē rave ra ānei tātou i terā mau mea ato’a ma teie ’ohipa ta’a ’ē roa, ’oia ho’i te tāvinira’a ’āpitihia i te here ’e te fa’atusia.

’Ua noa’a mai tō’u ’ite ē, ’aita i tītauhia e hāmani i te faraoa monamona tōtōrā nō te riro mai ’oe ’ei ’orometua Paraimere manuia ’e te itoito, inaha e ’ere te faraoa monamona te tumu. ’O te here rā i muri mai i te reira.

Tē fa’a’ite pāpū nei au ē, e ha’amo’ahia te reira here nā roto i te tusia—te tusia ānei a te hō’ē ’orometua,’e hau atu, te tusia hope ’e te mure ’ore a te Tamaiti a te Atua. Tē fa’a’ite pāpū nei au tē ora nei ’oia ! ’Ua here au iāna ’e ’ua hina’aro vau e tu’u ’ē atu i te mau hina’aro pipiri nō te here ’e nō te aupuru i te ta’ata mai iāna te huru. I te i’oa o Iesu Mesia, ’āmene.