Mau rurura’a nō te maha o te sābati (’Ātopa–Tītema 2018)

Tuatāpapara’a pāpa’ira’a mo’a a te ta’ata hō’ē ’e te ’utuāfare

I te maha o te sābati nō 2018, e paraparau te mau pupu peresibutero ’e te mau Sōtaiete Tauturu nō ni’a i te tuatāpapara’a pāpa’ira’a mo’a a te ta’ata hō’ē ’e te ’utuāfare. E mā’iti te mau feiā fa’atere ’e te mau ’orometua ha’api’i ’ia arata’i i te tāu’ara’a parau i ni’a i te hō’ē o te mau parau tumu i muri nei.

Tuatāpapara’a pāpa’ira’a mo’a a te ta’ata hō’ē

Nō te fa’auru i te mau melo ’ia tuatāpapa tāmau i te mau pāpa’ira’a mo’a, e nehenehe e ani i te mau melo tāta’itahi ’ia mā’iti i te hō’ē o te mau ’īrava i muri nei nō te tai’o : Iosua 1:8 ; 2 Timoteo 3:15–17 ; 1 Nephi 15:23–25 ; 2 Nephi 32:3 ; Te Parau Ha’api’ira’a ’e te mau Parau Fafau 11:22–23 ; 33:16–18. I muri mai i te tai’ora’a ’e te ferurira’a i te reira, e nehenehe tā rātou e fa’a’ite i te tahi atu ta’ata i roto i te piha e aha tā te ’īrava e ha’api’i nei nō ni’a i te tuatāpapara’a pāpa’ira’a mo’a.

E nehenehe ato’a e ani i te mau melo ’ia fa’a’ite mai i tō rātou ’itera’a pāpū nō ni’a i te mau ha’amaita’ira’a tā rātou i fāri’i i te tuatāpapara’a i te mau pāpa’ira’a mo’a. E ’āpī ato’a mai te mau melo ’ia fa’aro’o mai rātou i tō te tahi ’e tō te tahi mana’o e aha tā rātou e rave nei nō te fa’ariro i te tuatāpapara’a pāpa’ira’a mo’a ’ei taime fa’ahiahia (hi’o te tahi mau hi’ora’a i roto « Mau manaʼo tauturu nō te haʼamaitaʼi i tā ʼoutou tuatāpaparaʼa i te pāpaʼiraʼa moʼa » i roto Mai, peʼe mai—nō te ta’ata hō’ē ’e te ’utuāfare. E nehenehe ato’a e fa’a’ite i te mau melo i tā Elder Quentin L. Cook i ha’api’i nō ni’a i te « mau fā ’e te mau ha’amaita’ira’a i ’āpitihia i [te mau fa’atanora’a i te mau hora purera’a i te sābati] ’e i te tahi atu mau tauira’a ’āita i maoro a’enei » (hi’o « Te fa’afāriura’a hōhonu ’e te pāpū i te Metua i te Ao ra ’e i te Fatu ra Iesu Mesia », Ensign ’aore rā Liahona, Novema 2018). E nehenehe te mau melo e paraparau nāhea tā tātou mau tauto’ora’a e ha’amaita’i ai i tā tātou tuatāpapara’a pāpa’ira’a mo’a e tauturu i te fa’atupu i teie mau fā. E nehenehe ato’a te mau video i muri nei i ni’a ia LDS.org e fa’auru i te mau melo : « Words with Friends », « The Blessings of Scripture », « Daily Bread: Pattern », ’e « What Scriptures Mean to Me ».

Tāmau māite i te tuatāpapara’a ’evanelia

Tē fa’aau nei Elder David A. Bednar i te tuatāpapara’a tāmau a te ’utuāfare i te mau pāpa’ira’a mo’a, nā reira ato’a te mau peu parau ti’a ’ei mau pōta’a pēni e hōro’a mai i te hō’ē pēni nehenehe. Nō te tauturu i te mau melo ’ia māramarama i tā Elder Bednar i ha’api’i, e nehenehe e fa’a’ite i te hō’ē pēni e ’itehia te mau pōta’a pēni a te ta’ata pēni. I muri iho e nehenehe te mau melo e tai’o i te fa’aaura’a a Elder Bednar, i roto i te a’ora’a « Fa’aitoito ia rātou ’ia ha’apa’o maita’i i roto i te ’utuāfare » (Ensign ’aore rā Liahona, Novema 2009, 19–20), ’a ’āparau atu ai e mea nāhea e au te mau pōta’a pēni o te pēni i te tuatāpapara’a pāpa’ira’a mo’a. E aha tei tauturu ia tātou ’ia upo’oti’a i ni’a i te ārai’ē’a nō te tuatāpapa tāmau māite i te ’evanelia, ’ei ta’ata hō’ē ānei ’aore rā ’ei ’utuāfare ? E aha tā te peresideni Russell M. Nelson i parau ia rātou e « ha’a itoito noa… nō te fa’aau i tō [rātou] ’utuāfare ’ei pū nō te ha’api’ira’a ’evanelia » ? (hi’o « Riro ’ei feiā mo’a hi’ora’a maita’i », Ensign ’aore rā Liahona, Nov. 2018). Vaiiho i te tahi taime nō te mau melo ’ia feruri ’e ’ia fa’a’ite i tei fa’auruhia ia rātou ’ia rave maoti te mea tā rātou i ’apo mai i teie mahana.

Mau ’āparaura’a ’evanelia i te ’utuāfare ’e i te fare purera’a

Hō’ē rāve’a e nehenehe e tauturu i te mau melo ’ia māramarama i te faufa’a rahi nō te mau ’āparaura’a i te ’utuāfare ’e i te fare purera’a, ’o te anira’a ïa i te hō’ē tamari’i ’e te hō’ē metua ’ia hīmene i te hīmene « Ha’api’i iā’u ’ia ’ite i te maita’i » (Te mau hīmene, n°189). E aha te ’āparaura’a i roto i te tamari’i ’e te metua i roto i te mau ’īrava o teie hīmene e ha’api’i nei nō ni’a i te ’apora’a ’evanelia ? E hina’aro paha te tahi mau melo e fa’a’ite mai i tō rātou mana’o e nāhea i te fa’arirora’a i te mau ’āparaura’a ’evanelia ’ei tuha’a mātau ’e te tāmau i roto i te orara’a ’utuāfare. E nehenehe ato’a e ’apo mai i te tahi mana’o i roto i te mau ’īrava i muri nei : Deuteronomi 11:18–20 ; 1 Petero 3:15 ; Mosia 18:9 ; Moroni 6:4–5, 9 ; Te Parau Ha’api’ira’a ’e te mau Parau Fafau 88:122. Nāhea tā tātou mau ’āparaura’a i te ’utuāfare ’e i te fare purera’a e ha’afātata atu ā ia tātou i te Metua i te Ao ra ’e ia Iesu Mesia ?

Mau mana’o nō te turu i te tuatāpapara’a pāpa’ira’a mo’a i te ’utuāfare nō 2019

I roto i te matahiti 2019, e riro te mau melo tā’āto’a i te tuatāpapa i te Faufa’a ’Āpī—i te fare ’e i te Ha’api’ira’a Sābati ’e i te Paraimere. I roto i te pupu autahu’ara’a ’e te Sōtaiete Tauturu, e fa’aha’amana’o te feiā fa’atere ’e te mau ’orometua ha’api’i nō ni’a i te mau ’īrava nō te hepetoma i muri mai e vai ra i roto i te Mai, pe’e mai—nō te ta’ata hō’ē ’e te ’utuāfare ’ia tuatāpapa rātou i te reira i te fare. E nehenehe e pāpa’i atu ’aore rā e parau atu i te reira fa’aha’amana’ora’a, ’aore rā to’opiti.

E nehenehe te feiā fa’atere ’e te mau ’orometua pupu peresibutero ’e Sōtaiete Tauturu e fa’aitoito i te reira tuatāpapara’a pāpa’ira’a mo’a nā roto i te ’imira’a i te mau rāve’a nō te fa’ahiti i te tahi hi’ora’a mai roto mai i te Faufa’a ’Āpī, i roto i te mau rurura’a pupu peresibutero ’e Sōtaiete Tauturu. ’Ei hi’ora’a, e nehenehe te feiā fa’atere ’e te mau ’orometua pupu peresibutero ’e Sōtaiete Tauturu e rave mai teie :

Mau mana’o nō te turu i te tuatāpapara’a pāpa’ira’a mo’a i te ’utuāfare nō 2019

• Fa’a’ite nāhea te mau ’ā’amu ’aore rā te ha’api’ira’a tumu tā rātou i ’apo mai i roto i tā rātou tuatāpapara’a pāpa’ira’a mo’a e tano nō te ha’api’ira’a a te pupu peresibutero ’aore rā a te Sōtaiete Tauturu. E nehenehe te feiā fa’atere ’e te mau ’orometua e fa’a’ite i te reira i roto i te hō’ē rurura’a i te sābati.

• Fa’a’ite i te mau melo nāhea te mau ’ā’amu ’aore rā te ha’api’ira’a tumu i roto i te Faufa’a ’Āpī e tano i tā rātou mau hōpoi’a i roto i te pupu peresibutero ’e te Sōtaiete Tauturu.

• Fa’a’ite i te mau melo i te tahi mau ’ohipa au i tupu nō rātou i te tuatāpapara’a i te Faufa’a ’Āpī i te ’utuāfare ’e e fa’aitoito i te mau melo ’ia fa’a’ite ato’a atu i te reira.