Mai, fa’aro’o i te reo o te peropheta

Nā te ’episekōpo Dean M. Davies

Tauturu mātāmua i roto i te ’Episekōpora’a fa’atere rahi

’Ia ha’apa’ari tātou i roto i tō tātou orara’a i te ’ohipa fa’aro’o ’e te ha’apa’o i te reo o te mau peropheta ora, e ’ō’oti mai tātou i te mau ha’amaita’ira’a mure ’ore.

’Ua parau te Fatu nō ni’a i te Peresideni o Te ’Ēkālesia a Iesu Mesia i te Feiā Mo’a i te mau Mahana Hope’a Nei :

« ’E teie fa’ahou ā, ’o te ’ohipa nō te Peresideni nō te tōro’a nō te Autahu’ara’a teitei ’o te fa’aterera’a ïa i ni’a i te ’ēkālesia pā’āto’a, ’e ’ia riro ho’i mai ia Mose…

« ’Oia ïa, ’ia riro ’ei hi’o, ’ei heheu parau, ’ei ’īriti parau, ’e ’ei peropheta, tei iāna ho’i te mau hōro’a ato’a a te Atua tāna e tu’u atu nei i ni’a i te upo’o nō te ’ēkālesia » (Te Parau Ha’api’ira’a ’e te mau Parau Fafau 107:91-92 ; reta tei fa’ahuru-’ē-hia).

’Ua ha’amaita’ihia vau i te ’itera’a i te tahi mau hōro’a a te Atua i ni’a i tāna mau peropheta. E fāri’i ānei ’outou ’ia fa’ati’a atu vau i te hō’ē ’ohipa mo’a i tupu ? Hou teie pi’ira’a tō’u, ’ua tauturu vau i te hi’ora’a ’e i te vauvaura’a i te tahi mau vāhi e tano nō te mau hiero. I muri mai i te 11 nō Setepa 2001, ’ua ’eta’eta roa te hi’opo’ara’a i te mau ’ōti’a fenua o te Fenua Marite. Nō reira, e piti ’aore rā e toru atura hora nō te mau melo, nō te haere mai mai Vancouver (Canada) i te hiero nō Seattle (Washington). ’Ua tu’u te peresideni Gordon B. Hinckley, Peresideni o te ’Ēkālesia i terā tau, i te mana’o nō te hō’ē hiero i Vancouver, e riro i te ha’amaita’i i te mau melo nō te ’Ēkālesia. ’Ua fa’ati’ahia te ’imira’a nō te hō’ē vāhi, ’ua hi’ohia e rave rahi fenua a te ’Ēkālesia ’e i muri iho ’ua hi’o-ato’a-hia te tahi atu mau vāhi e ’ere nā te ’Ēkālesia.

’Ua ’itehia mai te hō’ē fenua nehenehe i te hō’ē vāhi ha’amanahia nō te mau patura’a fare purera’a, piri noa i te purūmu tārava rahi nō Canada. E mea ’ōhie nō te haere i reira, ’ua nehenehe te mau tumu paina Canada i reira ’e e mea teitei ri’i, e ’ite-maita’i-hia te reira e te mau pere’o’o e nā reira atu.

’Ua vauvau atu mātou i te parau nō teie vāhi ma te tahi hōho’a ’e te tahi hōho’a fenua i roto i te rurura’a ’āva’e a te Tōmite nō te mau vāhi patura’a hiero. ’Ua hōro’a mai te peresideni Hinckley i te parau fa’ati’a nō te fa’aau i te ho’o ’e nō te fa’aoti i te tahi atu mau tītorotorora’a. I terā ’āva’e Tītema, ’ua fa’aho’i mai mātou i te parau fa’a’ite i te tōmite, ’ua oti te mau tītorotorora’a ’e ’ua tīa’i atura mātou i te ha’amanara’a nō te ho’o roa mai i te reira. I te otira’a tā mātou parau fa’a’ite, ’ua parau te peresideni Hicnkley : « E mea au ’ia hi’o vau i terā vāhi. »

I muri ri’i mai, i roto i te ’āva’e, piti mahana i muri mai i te Noela, ’ua reva atu mātou i Vancouver, ’o te peresideni Hinckley ; te peresideni Thomas S. Monson ; ’e ’o Bill Williams, e tahu’a nīno’a fare nō te hiero. Nā Paul Christensen, te peresideni titi i reira i fāri’i ia mātou ’e i fa’ahoro ia mātou i taua vāhi ra. E mea ua ri’i terā mahana ’e te māhu, ’ua pou rā te peresideni Hinckley i rāpae i te pere’o’o ’e hāhaere atura nā reira.

’Ua maoro ri’i mātou i’ō, ’ua ani atura vau i te peresideni Hinckley ’ua hina’aro ānei ’oia e hi’o i te tahi atu mau vāhi tā mātou i feruri. ’Ua nā ’ō mai ’ioa ē, ’ē. Tē ta’a ra ia ’outou, ’ia hi’o mātou i te tahi atu mau vāhi, e nehenehe ïa e fa’aau te maita’i o te tahi ’e te tahi.

’Ua fa’a’ati mātou ia Vancouver nō te hi’o i te tahi atu mau vāhi ē ho’i mai a’era i te vāhi mātāmua ra. ’Ua nā ’ō te peresideni Hinckley : « E vāhi nehenehe teie. » I reira tōna anira’a : « E nehenehe ānei e haere i terā fare purera’a a te ’Ēkālesia, 0,4 km te ātea ? »

« ’Oia peresideni », ’ua pāhono atu mātou.

’Ua pa’uma mātou i roto i te pere’o’o ’e ’ua tere atura i terā fare purera’a tāpiri noa mai. I te taera’a mātou i te fare purera’a, ’ua nā ’ō mai te peresideni Hinckley : « Tīpu’u i te pae ’aui. » ’Ua tīpu’u mātou ’e ’ua pe’e i terā purūmu mai tei parauhia mai. ’Ua ha’amata te purūmu i te pa’uma ri’i.

I te tāpaera’a te pere’o’o i te vāhi teitei roa a’e, ’ua nā ’ō maira te peresideni Hinckley : « Tāpe’a, tāpe’a i te pere’o’o. » Toro ihora tōna rima i ni’a i te tahi tāpū fenua i te pae ’atau ma te ui mai : « ’E teie fenua ? Teie te vāhi nō te hiero. Teie te vāhi tā te Fatu i hina’aro i te hiero. E noa’a ānei ia ’outou ? E noa’a ānei ia ’outou ? »

’Aita ho’i mātou i hi’o i terā fenua. Tei muri roa ho’i, e mea ātea i te purūmu rahi, ’e ’aita i ni’a i te mau tāpura fenua e ho’ohia ra. I te nā-’ō-ra’a mātou ’aita mātou i ’ite, ’ua fa’atoro ’oia i tōna rima i ni’a i terā fenua ’a nā ’ō fa’ahou ai : « Teie te vāhi nō te hiero. » ’Ua fa’aea mātou ma’a minuti, tere atura mātou i te taura’a manureva nō te ho’i i te fare.

’Ia po’ipo’i a’e, ’ua pi’ihia māua i roto i te piha tōro’a a te peresideni Hinckley. ’Ua pāpa’i pauroa mai ’oia i ni’a i te hō’ē pāpie : te mau purūmu, te fare purera’a, te tīpu’ura’a i te pae ’aui ’e te tāpa’o X nō te hiero. ’Ua ui mai ’oia e aha tā māua parau ’āpī. ’Ua nā ’ō atura māua ē, ’aita e fenua fifi roa a’e e ho’o mai. E toru fatu fenua : hō’ē nō Canada, hō’ē nō Inidia ’e hō’ē nō Taina ! ’E e ’ere i te vāhi ha’amanahia nō te mau patura’a fare purera’a.

« ’A, ’a fa’aitoito ïa », ’ua nā ’ō mai ’oia.

Tupu mai nei te semeio. Tau ’āva’e ri’i noa, ’ua ho’o mai mātou i te fenua, ’e i muri ri’i mai, ’ua hōro’a mai te ’oire nō Langley (Colombie-Britanique) i te parau fa’ati’a nō te patu i te hiero.

’Ia feruri au i teie ’ohipa, e mana’o ha’eha’a tē tae mai i te hi’ora’a ē, ’o māua nei ho’i te taea’e Williams tei mau i te ’ite ha’api’ira’a ’e te ’aravihi nō te ho’ora’a fare ’e te patura’a hiero, ’aita tā te peresideni Hinckley te reira ’ite ; e mea hau atu rā tāna—’o te hōro’a nō te hi’ora’a peropheta. ’Ua ti’a iāna ’ia hi’o i te vāhi i tītauhia e fa’ati’a i te hiero a te Atua.

I te fa’auera’a te Fatu i te feiā mo’a mātāmua o teie tau tu’ura’a ’ia patu i te hō’ē hiero, ’ua nā ’ō ’oia :

« Terā rā ’ia fa’ati’ahia te hō’ē fare i tō’u nei i’oa mai te au i te hōho’a tā’u e fa’a’ite atu ia rātou ra.

« ’E mai te mea e ’ore ta’u mau ta’ata e fa’ati’a mai i te reira mai te au i te hōho’a tā’u e fa’a’ite atu… e ’ore roa vau e fāri’i i te reira i tō rātou mau rima ra » (Te Parau Ha’api’ira’a ’e te mau Parau Fafau 115:14-15).

Tei tupu nō te feiā mo’a mātāmua, mai te reira ato’a ïa nō tātou nei : ’ua heheu te Fatu, ’e tē tāmau nei ho’i ’oia i te heheu, i te Peresideni o te ’Ēkālesia i te hōho’a e fa’aterehia ai te bāsileia o te Atua i tō tātou nei anotau. ’E nō te ta’ata hō’ē, tē hōro’a nei ’oia i te arata’ira’a nō ni’a i te huru e au ai ’ia fa’atere i tō tātou orara’a, ’ia fāri’i ato’a mai te Fatu i tā tātou mau ravera’a.

I te ’āva’e ’Ēperēra 2013, ’ua paraparau vau nō ni’a i te mau tauto’ora’a tītauhia nō te fa’aineine i te niu o te mau hiero ato’a, ’ia pāpū ē, e ti’a i te reira ’ia fa’aruru i te mau vero ’e te mau ’ati e ma’iri i ni’a iāna. E ha’amatara’a noa rā te niu. Te hiero, e mau ’ōfai patu e rave rahi ïa, tei fa’atano-maita’i-hia te tahi ’e te tahi mai te au i te hōho’a tei feruri-a’ena-hia. ’Ua riro tō tātou orara’a i te hiero tā tātou tāta’itahi e tūtava nei i te patu, mai tei ha’api’ihia e te Fatu ra (hi’o 1 Korinetia 3:16-17), e ti’a ’e e tano ïa ’ia ui ia tātou iho ē : « E aha te mau ’ōfa’i patu tītauhia ’ia ’āpapa, ’ia vai te nehenehe o tō tātou orara’a, ’e te hanahana ari’i ’e te pautuutu, i mua i te mau vero o te ao nei ? »

E nehenehe e ’itehia te pāhonora’a i roto i te Buka a Moromona. ’Ua nā ’ō te peropheta Iosepha Semita nō ni’a i te Buka a Moromona : « ’Ua parau vau i te mau taea’e ē, te Buka a Moromona, ’o te buka ti’a roa a’e ïa i ni’a i te fenua nei, ’e ’o te ’ōfa’i tua o tā tātou ha’apa’ora’a, ’e e piri roa atu te hō’ē ta’ata i te Atua nā roto i te tāmau-māite-ra’a i tāna mau ture ; i te tahi noa atu buka » (’Ōmuara’a o te Buka a Moromona). I roto i te ’ōmuara’a o te Buka a Moromona, tē ha’api’ihia nei tātou ē, « te feiā e noa’a mai te ’ite hanahana nā roto i te Vārua Maita’i ē [e parau nā te Atua te Buka a Moromona] e ’ite ato’a ïa rātou nā roto i te hō’ē ā mana ē, ’o Iesu Mesia te Fa’aora o te ao, ’o Iosepha Semita tōna heheu parau ’e [te peropheta nō te Fa’aho’i-fa’ahou-ra’a], ’e ’o Te ’Ēkālesia a Iesu Mesia i te Feiā Mo’a i te mau Mahana Hope’a Nei te bāsileia o te Fatu tei ha’amau-fa’ahou-hia i ni’a i te fenua nei ».

’E teie atura ïa te mau ’ōfa’i patu faufa’a rahi nō tō tātou iho fa’aro’o ’e te ’itera’a pāpū :

1. ’O Iesu Mesia te Fa’aora o te ao.

2. ’O te parau a te Atua te Buka a Moromona.

3. ’O te bāsileia o te Atua i ni’a i te fenua nei Te ’Ēkālesia a Iesu Mesia i te Feiā Mo’a i te mau Mahana Hope’a Nei.

4. E peropheta Iosepha Semita, ’e e mau peropheta ora tā tātou i ni’a i te fenua nei.

Mau ’āva’e a’enei, ’ua fa’aro’o vau i te mau a’ora’a ato’a i te ’āmuira’a rahi tā te peresideni Nelson i hōro’a mai tōna pi’i-mātāmua-ra’a-hia ’ei ’āpōsetolo. ’Ua taui roa tō’u orara’a i teie ’ohipa. ’A tuatāpapa ai au, ’e ’a feruri ai au i nā 34 matahiti parau pa’ari a te peresideni Nelson i ha’aputuhia, ’ua matara mai te tahi mau tumu parau pāpū ’e te tāmau. E au teie nau tumu parau tāta’itahi i te mau ’ōfa’i patu i fa’ahitihia, ’aore rā ’o te tahi atu ā ’ōfa’i patu faufa’a rahi nō tō tātou iho hiero. Tē vai nei ïa te fa’aro’o i te Fatu ra ia Iesu Mesia, te tātarahapa, te bāpetizora’a ’ia matara te hara, te hōro’ara’a o te Vārua Maita’i, te fa’aorara’a o te feiā pohe ’e te ’ohipa hiero, te fa’aturara’a i te mahana sābati ’ei mahana mo’a, ha’amata ma te hope’a i te ferurira’a, fa’aea i ni’a i te ’ē’a nō te fafaura’a. ’Ua fa’ahiti te peresideni Nelson i te reira ato’a mau mea ma te here ’e te ’ā’au tae.

Te ’ōfa’i tihi rahi ’e te ’ōfa’i patu rahi o te ’Ēkālesia ’e nō tō tātou orara’a, ’o Iesu Mesia ïa. Teie tāna ’Ēkālesia. ’O Peresideni Nelson tāna peropheta. Tē fa’a’ite nei ’e tē heheu nei te mau ha’api’ira’a a te peresideni Nelson i te orara’a ’e te huru o Iesu Mesia, ’ei maita’i nō tātou. Tē parau nei ’oia ma te here ’e te ’ite pāpū nō te nātura o te Fa’aora ’e tāna misiōni. ’Ua fa’a’ite pinepine ato’a ’oia i tōna ’itera’a pāpū pūai nō te pi’ira’a hanahana o te mau peropheta ora—te mau Peresideni o te ’Ēkālesia—tāna i tāvini atu.

I teienei, tei ia tātou nei te tura ’ia pāturu iāna ’ei peropheta ora nā te Fatu i ni’a i te fenua nei. ’Ua mātau tātou i te pāturura’a i te feiā fa’atere o te ’Ēkālesia nā roto i te hōho’a hanahana e ’āfa’i fa’atuea i tō tātou rima i ni’a ’ei fa’a’itera’a i tō tātou fāri’ira’a ’e te pāturura’a. Nō rave noa iho nei tātou i te reira, ma’a minuti i teienei. ’Ua hau atu rā te pāturura’a mau i teie tāpa’o fa’a’itera’a. Mai tei pāpa’ihia i roto i te Te Parau Ha’api’ira’a ’e te mau Parau Fafau 107:22 e turuhia te Peresidenira’a Mātāmua « e te ti’aturira’a, te fa’aro’o, ’e te pure ato’a nō te ’ēkālesia. » E noa’a ia tātou te pāturu-hope-ra’a ’e te pāturu-mau-ra’a i te peropheta ora ’ia fa’atupu ana’e tātou i te peu ti’aturira’a i tāna mau parau, ma te fa’aro’o nō tē rave i te reira, ’ei reira e pure ai nō te mau ha’amaita’ira’a tāmau a te Fatu i ni’a iāna.

’Ia feruri au i te peresideni Russell M. Nelson, e tae mai te tāmāhanahanara’a i te mau parau a te Fa’aora ’a nā ’ō ai ’oia ē : « ’E mai te mea e fa’aro’o mai ta’u mau ta’ata i tō’u nei reo, ’e i te reo nō ta’u mau tāvini tā’u i fa’ata’a nō te arata’i i ta’u mau ta’ata, inaha, ’oia mau tā’u e parau atu nei ia ’outou, e ’ore roa rātou e tāhiti-’ē-hia atu i tō rātou ra vāhi » (Te Parau Ha’api’ira’a ’e te mau Parau Fafau 124:45).

’Ia fa’aro’o ’e ’ia ha’apa’o tātou i te parau a te mau peropheta ora e tupu ai te maita’i rahi ’e te tauira’a rahi roa ’ino i roto i tō tātou orara’a. E pūaihia tātou. E pāpū a’e tō tātou mana’o ’e te ti’aturi i roto i te Fatu. E fa’aro’o tātou i te parau a te Fatu. E putapū tātou i te here o te Atua. E ’ite tātou nāhea i te fa’atere i tō tātou orara’a ma te mana’o pāpū.

’Ua here au ’e tē pāturu nei au i te peresideni Russell M. Nelson, ia rātou ato’a tei pi’ihia ’ei peropheta, ’ei hi’o ’e ’ei heheu parau. Tē fa’a’ite pāpū nei au ē, tei iāna mau te mau hōro’a tā te Fatu i tu’u i ni’a i tōna upo’o, ’e tē fa’a’ite pāpū nei au ē, ’ia ha’apa’ari tātou i roto i te ’ohipa fa’aro’o ’e te ha’apa’o i te reo o te mau peropheta ora i roto i te orara’a, e patuhia ïa tō tātou orara’a mai te au i te hōho’a hanahana a te Fatu nō tātou, ’e e ’ō’oti mai tātou i te mau ha’amaita’ira’a mure ’ore. Tē fa’ataehia nei teie anira’a i te tā’āto’ara’a. Mai, fa’aro’o i te reo o te peropheta, ’oia mau, ’a haere mai i te Mesia ’ia ora ’outou. I te i’oa o Iesu Mesia, ’āmene.