Te ha’amaura’a i te niu o te hō’ē ’ohipa rahi

Elder Steven R. Bangerter

Nō te Hitu ’Ahuru

Te mau ha’api’ira’a tei ha’api’ihia nā roto i te mau peu tumu tā tātou i ha’amau i roto i tō tātou fare, noa atu te ha’iha’i e te ’ōhie, e faufa’a rahi tō rātou i roto i te ao nei i teie mahana.

’Ei mau metua i Ziona, e hōpoi’a mo’a nā tātou ’ia fa’aaraara i roto i tā tātou mau tamari’i i te hia’ai rahi ’e te fafaura’a nō te ’oa’oa, te māramarama, ’e te mau parau mau o te ’evanelia a Iesu Mesia. ’A ’atu’atu ai tātou i tā tātou mau tamari’i, e ha’amau tātou i te mau peu tumu i roto i tō tātou fare ’e, e patu tātou i te mau hi’ora’a nō te tūreiara’a ’e nō te huru i roto i tō tātou mau aura’a ’utuāfare. ’Ia nā reira tātou, i reira te mau peu tumu tā tātou e ha’amau e fa’atupu ai i te mau huru pūai, te ’āueue ’ore o te maita’i i roto i tā tātou mau tamari’i, ’o te hōro’a ia rātou i te pūai nō te aro i te mau tītaura’a o te orara’a.

Nō te mau matahiti e rave rahi, ’ua fāna’o tō māua ’utuāfare i te peu tumu matahiti nō te haerera’a e puhapa i ni’a i te mou’a nō Uintah i te pae apato’erau hiti’a o te rā nō Utaha. E rātere mātou e 32km nā ni’a i te hō’ē purūmu ’ōfa’ifa’i repo e tae atu ai i te hō’ē ’āfa’a matie nehenehe, ’e te mau mato teitei, tahehia nā rōpū e te hō’ē ’ānāvai pape to’eto’e ’e te mā. I te matahiti tāta’itahi, ma te ti’aturira’a ’ia ha’apāpū fa’ahou i te faufa’a o te parau ha’api’ira’a ’evanelia ’e te mau ravera’a i roto i te ’ā’au o tā māua mau tamari’i ’e te mau mo’otua, ’ua ani māua o Susan i tā māua nā tamāroa tāta’itahi e ono ’e tō rātou ’utuāfare ’ia fa’aineine i te hō’ē parau poro’i poto nō ni’a i te hō’ē tumu parau tā rātou e mana’o ra e ’ohipa faufa’a ïa i roto i te niu o te hō’ē fare i fa’atumuhia i ni’a i te Mesia. I muri iho e ha’aputuputu mātou nō te hō’ē purera’a ’utuāfare i roto i te hō’ē vāhi i fa’ata’ahia, ’e i reira te ta’ata tāta’itahi e vauvau mai ai i tā rātou parau poro’i.

Mau parau poro’i i pāpa’ihia i ni’a i te mau ’ōfa’i

I teie matahiti, ’ua pāpa’i tā māua mau mo’otua i te tumu parau o tā rātou parau poro’i i ni’a i te mau ’ōfa’i, ’e i muri iho, hō’ē i te taime hō’ē, ’ua huna i te reira i pīha’i iho i te tahi ’e te tahi, ’ei fa’ahōho’ara’a nō te hō’ē niu pāpū i ni’a iho ho’i i te reira e ha’amauhia ai te hō’ē orara’a poupou. Te parau mau tāuiui ’ore ’e te mure ’ore, ’oia ho’i, ’o Iesu Mesia te ’ōfa’i tihi o teie niu, ’ua rara’ahia ïa i rotopū i nā parau poro’i e ono.

’Ia au i te mau parau a Isaia, « e teie nei, te parau mai ra te Fatu га о Iehova, inaha, tē ha’amau nei au i te tahi ōfa’i i Ziona ’ei tumu, e ’ōfa’i tāmatahia, e ’ōfa’i maita’i e tihi, e tumu ’āueue ’ore ’e te mau pāpū ».¹ ’O Iesu Mesia tāua ’ōfa’i tihi maita’i ra i roto i te niu o Ziona. Nāna i heheu mai i te peropheta Iosepha Semita : « Nō reira, ’eiaha e rohirohi i roto i te ’ohipa maita’i, nō te mea tē ha’amau atu nei ’outou i te niu nō te hō’ē ʼohipa rahi roa. ’E nā roto i te mau mea iti nei e tupu mai ai tei rahi roa ra ».²

Te mau ha’api’ira’a tei ha’api’ihia nā roto i te mau peu tumu tā tātou i ha’amau i roto i tō tātou fare, noa atu te ha’iha’i ’e te ’ōhie, e faufa’a rahi tō rātou i roto i te ao nei i teie mahana. E aha te mau mea ha’iha’i ’e te ’ōhie, ’ia ha’amau ana’e-hia, e riro mai ’ei hō’ē ’ohipa rahi i roto i te orara’a o tā tātou mau tamari’i

’Aita i maoro a’e nei ’ua paraparau te peresideni Russell M. Nelson i te hō’ē ’āmuira’a rahi fātata i Toronto, Canada, ’e ma te ’ā’au putapū, ’ua fa’aha’amana’o ’oia i te mau metua i te hōpoi’a mo’a, e ti’a ia tātou ’ia ha’api’i i tā tātou mau tamari’i. I rotopū i te mau hōpoi’a faufa’a tei fa’a’itehia, ’ua ha’apāpū te peresideni Nelson i te mau ’ohipa tā tātou te mau metua e ti’a e rave i te ha’api’ira’a i tā tātou mau tamari’i ’ia hāro’aro’a, nō te aha tātou e ’amu ai i te ’ōro’a mo’a, te aura’a ’ia fānauhia i roto i te fafaura’a, ’e te faufa’a nō te fa’aineinera’a nō te fāri’i i te ha’amaita’ira’a pātereāreha, ’e ’ua fa’aitoito ’oia i te mau metua ’ia ha’apāpū ē, e tupu ihoa te tai’ora’a i te mau pāpa’ira’a mo’a ’ei utuāfare.³ Nā roto i te reira mau rāve’a, ’ua a’o mai tō tātou peropheta herehia ia tātou ’ia fa’ariro i tō tātou ’utuāfare ’ei « vāhi mo’a nō te fa’aro’o ».⁴

I roto i te Buka a Moromona, ’ua pāpa’i o Enosa i tōna māuruuru rahi tāna i fāri’i nō te hi’ora’a maita’i o tōna metua tāne, tei « ha’api’i [iāna] i tōna reo, ’e i te pa’ari ’e te a’o a te Fatu ra ». ’Ua parau a’era Enosa ma te putapū rahi, « e ’ia ha’amaita’ihia te i’oa o tō’u ra Atua i te reira ».⁵

Tē poihere nei au i te mau peu tumu ha’iha’i ’e te ’ōhie tā māua i ha’amau i roto i tō māua ’utuāfare hau atu i te 35 matahiti o tō māua fa’aipoipora’a. E rave rahi o tā māua mau peu e mea ha’iha’i terā rā e mea faufa’a rahi. ’Ei hi’ora’a :

I te mau pō ’aita ana’e au i te fare, ’ua ’ite au i te mau taime ato’a ē, i raro a’e i te fa’aterera’a a Susan, nā tā māua tamaiti matahiapo e arata’i i te ’utuāfare ma te ’ore e anihia, nō te tuatāpapara’a pāpa’ira’a mo’a ’e nō te pure ’utuāfare.⁶
Te tahi atu peu tumu—e’ita roa mātou e fa’aru’e i tō mātou fare ’aore rā e fa’aoti i te hō’ē ’āparaura’a nā roto i te niuniu ma te ’ore e parau ē, « ua here au ’ia ’oe ».
’Ua ha’amaita’ihia tō mātou orara’a nā roto i te fa’ata’ara’a i te taime tāmau nō te fāna’o i te mau uiuira’a ta’ata hō’ē e tā māua mau tamaiti tāta’itahi. I roto i te hō’ē uiuira’a ’ua ani au i tā māua tamaiti nō ni’a i tōna mau hina’aro ’e te fa’aineinera’a ’ia tāvini i te hō’ē misiōni. I muri a’e i te tahi ’āparaparaura’a, ’ua tupu te hō’ē taime muhu ’ore nō te feruri, ’e i muri iho, ’ua tīpapa mai ra ’oia i mua ’e ’ua parau pāpū mai ra ē, « e pāpā tē ha’amana’o ra ’oe i tō’u na’ina’ira’a ’e ’ua ha’amata tātou i te fa’atupu i te uiuira’a metua tāne Nā ’ō atura vau ē, « ’Ē » Nā ’ō mai nei ’oia ē, « nō reira, ’ua fafau atu vau ’ia ’oe i tāua taime ra ē, e tāvini au i te hō’ē misiōni, ’e ’ua fafau mai ’oe iā’u ē, o ’oe ’e o māmā e tāvini ’ōrua i te hō’ē misiōni ’ia pa’ari ’ōrua I muri iho ’ua tupu fa’ahou te muhu ’ore. « Tē vai ra ānei te tahi fifi e tāpe’a nei ’ia ’ōrua ’ia tāvini—nō te mea, e nehenehe paha tā’u e tauturu ? »

Te mau peu tumu ’utuāfare tāmau ’e te maita’i mai te pure, te tai’ora’a i te pāpa’ira’a mo’a, te pō ’utuāfare, ’e te haerera’a i te mau purera’a a te ’Ēkālesia, noa atu ē, e mea ha’iha’i ’e te ’ōhie ’ia hi’ohia, e fa’atupu te reira i te hō’ē tāere o te here, te fa’atura, te hō’ēra’a, ’e te pārurura’a. I roto i te vārua o te ’āpiti i teie mau tauto’ora’a, e pāruruhia tā tātou mau tamari’i i te mau ohe auahi a te ’enemi tei ha’amau-pāpū-hia i roto i te tāere o te ao nei i tō tātou ’anotau.

Te fa’aha’amana’o mai nei te a’ora’a pa’ari a Helamana i tāna tamaiti : « A ha’amana’o, a ha’amana’o, e ’ia ha’amau i tō ’ōrua niu i ni’a i te papa ra o tō tātou Ora, o te Mesia ïa, o te Tamaiti a te Atua ho’i, e ’ia hāpono mai te diabolo i tōna ra mata’i ’ū’ana, e tāna mau ohe nā roto i te pūāhiohio, e ’ia ma’iri mai tōna ra ua pa’ari, ’e tōna vero rahi i ni’a iho ’ia ’ōrua ra, e ’ere ’oia i te mana i ni’a iho ’ia ’ōrua e pūtōhia ai ’ōrua i raro i te ābuso, ’a mamae ai i te ’oto mure ’ore ra, nō te papa pa’i tā ’ōrua i ti’a i ni’a ra, ’o te niu mau ïa, ’o te tumu ’ia patuhia i ni’a e te ta’ata, e ’ore e ti’a ’ia ma’iri rātou i raro ».⁷

E rave rahi matahiti i ma’iri a’e nei, ’a tāvini ai au ’ei ’episekōpo ’āpī, ’ua ani mai te hō’ē ta’ata pa’ari a’e ’ia fārerei iā’u. ’Ua fa’ata’a mai ’oia i tōna fa’aru’era’a i te ’Ēkālesia ’e i te mau peu tumu parau ti’a a tōna nā metua i tōna ’āpīra’a. ’Ua fa’ata’a hu’ahu’a mai ’oia i te ’ā’au mamae tāna i fārerei i roto i tōna orara’a a ’imi ai ’oia i te ’oa’oa vai maoro, i rōpū i te ’oa’oa poto tā te ao nei e hōro’a mai. I teienei, i te mau matahiti hōpe’a nei o tōna orara’a, ’ua fāri’i ’oia i te muhumuhu marū ’e te tāmau māite i te tahi taime a te Vārua o te Atua nō te fa’aha’amana’o mai iāna i te mau ha’api’ira’a, te mau ravera’a, te mau mana’o, ’e te pārurura’a pae vārua o tōna tamari’iri’ira’a. ’Ua fa’a’ite mai ’oia i te māuruuru nō te mau peu tumu a tōna nā metua, ’e i roto i te mau parau o teie tau, ’ua parau tāvevo ’oia i te fa’aarara’a a Enosa : « ’Ia ha’amaita’ihia te i’oa o tō’u Atua nō te reira ».

I roto i tō’u ’itera’a, teie ho’ira’a tō teie ta’ata here i roto i te ’evanelia, ’o te huru ïa o te mau ta’ata e rave rahi, ’e e mea pinepine te reira i te tupu i rotopū i te mau tamari’i a te Atua tei fa’aru’e nō te tahi noa tau, e nō te ho’i fa’ahou mai i roto i te mau ha’api’ira’a ’e te mau peu o tō rātou ’āpīra’a. I roto i tāua mau taime ra, tē fa’a’ite pāpū nei tātou i te pa’ari o te pāpa’i Maseli, tei fa’aitoito i te mau metua ē, « e ha’api’i i te tamaiti i tāna ’ē’a ’ia haere ra : ’e ’ia pa’ari ’oia ra, e ’ore e fa’aru’e i taua ’ē’a ra ».⁸

Tē fārerei nei te mau metua ato’a i te mau taime ’ino’ino ’e i te mau fāito rau o te hina’aro pāpū ’e te pūai i roto i te ’atu’atura’a i te tamari’i. Terā rā, ’ia fa’a’ohipa ana’e te mau metua i te fa’aro’o nā roto i te ha’api’ira’a i te tamari’i ma te parau mau, ma te here ’e ma te rave i te mau mea ato’a e ti’a ia rātou ’ia rave nō te tauturu ia rātou i ni’a i te ’ē’a, e fāri’i ïa rātou i te ti’aturira’a rahi a’e ē, te huero i ueuehia ra e tupu ïa te a’a i roto i te ’ā’au ’e te ferurira’a o tā rātou mau tamari’i.

’Ua hāro’aro’a maita’i o Mose i te hina’aro faufa’a rahi o te ha’api’ira’a tāmau. ’Ua a’o ’oia, « ’e e ha’api’i tāmau māite ’oe [i teie mau parau] i tō mau tamari’i, ’o tā ’oe ïa e parau ’ia pārahi noa ’oe i roto i te fare, ’e ’ia haere noa ’oe nā te ’ē’a ti’a ra, ’e ’ia ta’oto noa ’oe ra, ’e ’ia ti’a noa ’oe i ni’a ra ».⁹

E tūturi tātou i pīha’i iho i tā tātou mau tamari’i i roto i te pure ’utuāfare, e ’atu’atu tātou ia rātou nā roto i tā tātou mau tauto’ora’a nō te fa’atupu i te tai’ora’a pāpū a te ’utuāfare i te pāpa’ira’a mo’a, e ’atu’atu tātou ia rātou ma te fa’a’oroma’i, ma te here ’a ’āmui ai tātou i roto i te pō ’utuāfare, ’e e māuiui tātou nō rātou i ni’a i tō tātou nā turi i roto i tō tātou mau pure ta’ata hō’ē i te ra’i ra. ’Auē, tō tātou hia’ai i te mau huero tā tātou e ueue nei ’ia a’ahia te reira i roto i tō rātou ’ā’au ’e te vārua o tā tātou mau tamari’i.

Te ti’aturi nei au ē, e ’ere te mea faufa’a roa te ’itera’a ē, te « hāro’aro’a ra ānei » tā tātou mau tamari’i i roto i tā tātou ha’api’ira’a, ’ei hi’ora’a, ’a tūtava ai rātou nō te tai’o i te mau pāpa’ira’a mo’a ’aore rā, nō te fa’atupu i te pō ’utuāfare ’aore rā, nō te haere i te mau fa’a’oa’oara’a a te Feiā ’Āpī ’e te tahi atu mau purera’a a te ’Ēkālesia. E ’ere i te mea faufa’a roa te ’itera’a ē, i roto i tāua mau taime ra, tē hāro’aro’a ra ānei rātou i te faufa’a o terā mau ’ohipara’a, e hau atu, tei roto rā te faufa’a i te ’itera’a ē, ’ei mau metua, tē fa’a’ohipa nei tātou i te fa’aro’o e nava’i nō te pe’e i te a’ora’a a te Fatu ’ia ora, ’ia ha’api’i, ’ia a’o ma te itoito, ’e ’ia ha’amau i te mau tītaura’a fa’auruhia mai nā te ’evanelia a Iesu Mesia. E tauto’ora’a pāturuhia e tō tātou fa’aro’o—tō tātou ti’aturira’a ē, ’ia tae i te hō’ē mahana, te mau huero tei ueuehia i roto i tō rātou ’āpīra’a, e a’ahia ïa ’e e ha’amata i te tupu i te rahi.

Nā te mau mea tā tātou e paraparau, te mau mea tā tātou e poro ’e e ha’api’i e fa’aoti i te mau mea o te tupu i rotopū ia tātou. Mai te mea ē, e ha’amau tātou i te mau peu tumu maita’i o tē ha’api’i ra i te parau ha’api’ira’a a te Mesia, e fa’a’ite ïa te Vārua Maita’i i te parau mau o tā tātou parau poro’i ’e e fa’a’amu ho’i i te mau huero o te ’evanelia o tei tanu-hōhonu-hia i roto i te ’ā’au o tā tātou mau tamari’i nā roto i tā tātou mau tauto’ora’a i ni’a i te roara’a o te ’ē’a. Tē faʼaʼite pāpū atu nei au i te reira i te i’oa o Iesu Mesia, ’āmene.