Te ’ohipa a te Buka a Moromona i roto i te fa’afāriura’a
Nā Elder Shayne M. Bowen
Nō te Hitu ’Ahuru
Tē ha’aputuputu nei tātou ia ’Īserā’ela nō te taime hope’a ’e tē nā reira nei tātou nā roto i te Buka a Moromona, hō’ē o te mau mauha’a mana rahi roa nō te fa’afāriura’a.
E rave rahi ta’ata i tō tātou nei tau e uiui nei nō te vai-mau-ra’a te Atua ’e tō tātou aura’a ’e ’ōna. E rave rahi tei ta’a ri’i noa ’aore rā tei ’ore roa i ta’a i tāna fa’anahora’a ’oa’oa. ’Ua hau i te 30 matahiti i teienei, ’ua nā ’ō mai te peresideni Ezra Taft Benson ē : « hō’ē pae rahi… o te ao e pāto’i nei i te hanahana o te Fa’aora. Tē uiui nei rātou i te semeio nō tōna fānaura’a, tōna orara’a maita’i roa, ’e te tupura’a mau tōna ti’afa’ahoura’a hanahana ».1
I tō tātou anotau, e ’ere te mau uiuira’a i ni’a noa i tō tātou Fa’aora, i ni’a ato’a rā i tāna ’Ēkālesia—Te ’Ēkālesia a Iesu Mesia i te Feiā Mo’a i te mau Mahana Hope’a Nei—tei fa’aho’ihia mai nā roto i te peropheta Iosepha Semita. Pinepine te mau uiuira’a nō ni’a i te ’ā’amu, te mau ha’api’ira’a ’aore rā te mau peu a te ’Ēkālesia a te Fa’aora.
E tauturu mai te Buka a Moromona ia tātou ’ia pūai i roto i te ’itera’a pāpū
Tē tai’o nei tātou i roto i te buka ’Ia Poro Haere i Ta’u Nei ’Evanelia : « ’A ha’amana’o ē te mea tā tātou i māramarama [nō te Metua i te Ao ra ’e tāna fa’anahora’a nō te ’oa’oa], nō roto mai ïa i te mau peropheta nō teie tau—’o Iosepha Semita ’e te feiā i muri mai iāna—rātou e fāri’i ’āfaro nei i te heheura’a nō ’ō mai i te Atua. Nō reira, te uira’a mātāmua tītauhia i te ta’ata ’ia pāhono, ’oia ho’i, e peropheta ānei Iosepha Semita, ’e e nehenehe ’oia e pāhono i teie uira’a nā roto i te tai’ora’a ’e te purera’a nō ni’a i te Buka a Moromona ».2
’Ua pūai roa mai tō’u ’itera’a pāpū nō te pi’ira’a hanahana o te peropheta Iosepha Semita nā roto i te pure ’e te tuatāpapara’a i te Buka a Moromona : Te tahi fa’ahou ’ite nō Iesu Mesia. ’Ua fa’a’ohipa vau i te anira’a a Moroni e « ui atu i te Atua i te Metua mure ’ore ra, i te i’oa o Iesu Mesia » ’ia ’ite i te parau mau o te Buka a Moromona.3 Tē fa’a’ite pāpū nei au ē, ’ua ’ite au e parau mau te reira. ’Ua tae mai te reira ’ite iā’u nei ’e e nehenehe ato’a e tae ia ’outou, « nā roto i te mana o te Vārua Maita’i ».4
Tē fa’a’ite nei te ’ōmuara’a o te Buka a Moromona : « Te feiā e noa’a mai te ’ite hanahana [nō te Buka a Moromona] nā roto i te Vārua Maita’i, e ’ite ato’a ïa rātou nā roto i te hō’ē ā mana ē, ’o Iesu Mesia te Fa’aora o te ao, ’o Iosepha Semita tōna heheu parau ’e te peropheta nō te mau mahana hope’a nei, ’e ’o Te ’Ēkālesia a Iesu Mesia i te Feiā Mo’a i te mau Mahana Hope’a Nei te bāsileia o te Fatu tei ha’amau-fa’ahou-hia i ni’a i te fenua nei, nō te fa’aineinera’a nō te Tae-piti-ra’a mai o te Mesia ».5
’Ei misiōnare ’āpī e haere ra i te fenua Tīreni, ’ua ’apo mai au i te hō’ē ha’api’ira’a nō ni’a i te mana fa’afāriu o te Buka a Moromona, tei taui roa i tō’u orara’a. Tē tāvini ra ’o Gonzalez tāne i ni’a i te hō’ē ti’ara’a rahi i roto i tāna ’ēkālesia e rave rahi matahiti. E ha’api’ira’a fa’aro’o teitei tōna, ’e e ’parau tū’ite ha’api’ira’a ato’a nō ni’a i te Atua. E te’ote’ora’a te reira ’ite Bībilia nōna. Nō mātou nei, ’ua pāpū roa ïa e ’aivāna’a ’oia nō te pae fa’aro’o.
’Ua pāpū iāna te mau misiōnare o te ’Ēkālesia a Iesu Mesia i te Feiā Mo’a i te Mau Mahana Hope’a Nei tei haere mai e poro i tōna ’oire ’āi’a ra nō Lima (Peru). ’Ua hina’aro noa ’oia e fārerei ia rātou, nō te tūpa’i ia rātou nō ni’a i te Bībilia.
Mai te huru ra ’ua fāri’i tō te ra’i i terā hina’aro tōna, teie mai nei e piti misiōnare e tāpe’a iāna i ni’a i te purūmu ma te ani e ti’a ānei ia rāua ’ia haere mai i tōna fare nō te ’āparau rātou i te mau pāpa’ira’a mo’a. I moemoea noa na ho’i ’oia i te reira ! ’Ua pāhonohia tāna mau pure. Nāna ïa e fa’a’āfaro mai i teie nā tamāroa i hahi ’ē. I nā ’ō ai ’oia ia rāua ē, e ’oa’oa roa ’oia i te fāri’i ia rāua i tōna fare nō te paraparau nō ni’a i te mau pāpa’ira’a mo’a.
Te mahana fārereira’a noa ïa te maoro. ’Ua ineine roa ’oia nō te pāto’i i tō rāua mau ti’aturira’a ma te Bībilia. ’Ua pāpū roa iāna nā te Bībilia e fa’a’ite pāpū ’e e fa’ahiti pāpū i te hape o tō rāua mau haere’a. Tae mai nei terā pō, tē pātōtō nei nā misiōnare i te ’ūputa. ’Ua oti roa ïa ’oia i te ’oa’oa. Teie tāua taime ra.
Matara mai nei te ’ūputa ’e ’ua fa’atomo ’oia i te mau misiōnare i roto i te fare. ’Ua toro te hō’ē o te mau misiōnare iāna i te hō’ē buka nīnamu ma te fa’a’ite i tōna ’itera’a pāpū ateate ē, ’ua ’ite ’oia tei roto i terā buka te parau a te Atua. ’Ua ’āmui ato’a mai te piti o te misiōnare i tōna ’itera’a pāpū nō te buka, ma te fa’a’ite pāpū ē ’ua ’īritihia te reira e te hō’ē peropheta a te Atua i tō tātou nei anotau, tōna i’oa ’o Iosepha Semita, ’e e ha’api’i te reira nō ni’a i te Mesia. ’Ua ti’a a’era nā misiōnare ’e ’ua fa’aru’e maira i tōna fare.
’Ua ’ino’ino ri’i ’o Gonzalez tāne. ’Ua ’īriti rā ’oia i te buka ’e ’ua hurihuri ’oia i te mau ’api. ’Ua tai’o ’oia i te ’api mātāmua. ’E ’ua tai’o ’oia i terā ’api ’e terā ’api ’e terā ’api ’aita i fa’aea ē tae roa i te avatea nō te mahana nō muri iho. ’Ua tai’o ’oia i te buka tā’āto’a ’e ’ua ’ite e parau mau te reira. ’Ua ’ite a’era ’oia e aha tē rave. ’Ua niuniu ’oia i te mau misiōnare, ’ua fāri’i i te mau ha’api’ira’a ’e ’ua fa’aru’e i tōna orara’a tahito nō te riro mai ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a Nei.
’Ua riro teie ta’ata maita’i ’ei ’orometua nō’u i te pū ha’api’ipi’ira’a misiōnare i Provo (Utah). ’Ua putapū rahi au i te ’ā’amu fa’afāriura’a o te taea’e Gonzalez ’e i te mana o te Buka a Moromona.
Tō’u taera’a i Tīreni, ’ua ani tō’u peresideni misiōni, te peresideni Royden J. Glade, ’ia tai’o mātou i te mau hepetoma ato’a i te ’itera’a pāpū o te peropheta Iosepha Semita tei pāpa’ihia i roto i te Iosepha Semita—’Ā’amu. ’Ua ha’api’i mai ’oia ē, e tū’ati ti’a te hō’ē ’itera’a pāpū nō te ’Ōrama mātāmua i tō mātou iho ’itera’a pāpū nō te ’evanelia ’e i tō mātou ’itera’a pāpū nō te Buka a Moromona.
’Ua ha’apa’o vau i te reira anira’a. ’Ua tai’o vau i te mau fa’ati’ara’a nō te ’Ōrama mātāmua ; ’ua tai’o vau i te Buka a Moromona. ’Ua pure au mai tā Moroni i fa’aue ’e ’ua ui au i « te Atua i te Metua mure ’ore ra, i te i’oa o Iesu Mesia »6 e parau mau ānei te Buka a Moromona. Tē fa’a’ite pāpū atu nei au i teie mahana ē, ’ua ’ite au ē, te Buka a Moromona, mai tā te peropheta Iosepha Semita i parau, « ’o te buka ti’a roa a’e ïa i ni’a i te fenua nei, ’e ’o te tāpe’a ’āpou [clé de voûte] nō tā tātou ha’apa’ora’a, ’e e fātata roa atu te hō’ē ta’ata i te Atua nā roto i te ha’apa’ora’a i tāna mau ture ; i te tahi noa atu buka ».7 ’Ua parau ato’a te peropheta Iosepha ē : « ’A ’rave ’ē atu na i te Buka a Moromona ’e te mau heheura’a, tei hea ïa tā tātou nei ha’apa’ora’a fa’aro’o ? ’Aore roa ïa tā tātou ».8
Tō tātou iho fa’afāriura’a
’Ia māramarama maita’i tātou ’o vai tātou ’e e aha te mau fā a te Buka a Moromona, e hōhonu atu ā ’e e pāpū atu ā tō tātou fa’afāriura’a. E pūaihia tātou i roto i te pūpūra’a ia tātou nō te ha’apa’o i te mau fafaura’a tā tātou i rave i mua i te Atua.
Hō’ē fā rahi nō te Buka a Moromona, ’o te ha’aputuputura’a ïa ia ’Īserā’ela i purara. Tē hōro’a nei teie ha’aputuputura’a i te rāve’a i te mau tamari’i ato’a a te Atua ’ia haere i ni’a i te ’ē’a nō te fafaura’a ’e, nā roto i te fa’aturara’a i teie mau fafaura’a, e ho’i i mua i te aro o te Metua. ’Ia ha’api’i tātou i te tātarahapara’a ’e ’ia bāpetizo tātou i te feiā fa’afariu, tē ha’aputuputu nei tātou ia ’Īserā’ela.
I roto i te Buka a Moromona e 108 fa’ahitira’a nō te ’utuāfare o ’Īserā’ela. I te ’ōmuara’a o te Buka a Moromona, ’ua ha’api’i Nephi : « ’O te ’ī ho’i o tō’u hina’aro, ’ia tītau atu vau i te ta’ata ’ia haere mai i te Atua o Aberahama, ’e te Atua nō Isa’aka, ’e te Atua nō Iakoba, e ora ai ».9 Te Atua o Aberahama, o Isa’aka, ’e o Iakoba, ’o Iesu Mesia ïa, te Atua o te Faufa’a Tahito. E fa’aorahia tātou ’ia haere mai tātou i te Mesia nā roto i te orara’a i tāna ’evanelia.
’Ua pāpa’i Nephi i muri ri’i mai :
« ’Oia ïa, e rave rahi te mau parau a tō’u metua i te Etene ra, ’e te ’utuāfare ato’a o ’Īserā’ela ra, e fa’aauhia rātou i te hō’ē rā’au ’ōrive e tāpū-’ē-hia tōna mau ’āma’a, ’e e ha’apurarahia i te mau vāhi o te ao ato’a nei…
« ’E ’ia ha’apurarahia te ’utuāfare o ’Īserā’ela ra, e ha’aputuputu-fa’ahou-hia mai rātou ; ’oia ïa, ’ia fāri’ihia te ’ī o te ’evanelia e te Etene ra, e poihia te mau ’āma’a mau o te rā’au ’ōrive ra, ’oia ho’i te toe’a o te ’utuāfare o ’Īserā’ela ra, ’oia ïa, e ’ite rātou i te Mesia ra, tō rātou Fatu ’e tō rātou Fa’aora ».10
Mai te reira ato’a i te hope’a o te Buka a Moromona, tē fa’aha’amana’o nei te peropheta Moroni ia tātou i tā tātou mau fafaura’a, ’a nā ’ō ai ’oia ē : « ’Ia ’ore ’outou ’ia ha’amā fa’ahou, ’ia tupu te mau faufa’a tā te Metua mure ’ore i fafau ia ’outou, e te ’utuāfare o ’Īserā’ela ē. »11
Te mau faufa’a tā te Metua mure ’ore i fafau
E aha « te mau faufa’a tā te Metua mure ’ore i fafau » tā Moroni e parau ra ? Tē tai’o nei tātou i roto i te buka nō Aberahama :
« ’O Iehova tō’u i’oa, ’e ’ua ’ite au i te hope’a mai te mātāmua mai, nō reira, ’ei ni’a a’e tō’u rima ia ’oe.
« ’E e fa’ariro ho’i au ia ’oe ’ei nūna’a rahi, ’e e ha’amaita’i rahi roa vau ia ’oe, ’e e fa’arahi au i tō ’oe i’oa i rotopū i te mau nūna’a ato’a ra, ’e e riro ’oe ’ei ha’amaita’ira’a nō tō ’oe ra hua’ai i muri ia ’oe, e ti’a ai ia rātou ’ia hōpoi i teie nei tōro’a ’e teie nei Autahu’ara’a i roto i tō rātou rima, i te mau nūna’a ato’a ra ».12
’Ua ha’api’i a’enei te peresideni Russell M. Nelson i roto i te hō’ē ha’apurorora’a ’ati a’e i te ao ē « teie mau te mau mahana hopeʼa, ʼe te haʼavitiviti nei te Fatu i tāna ʼohipa nō te haʼaputuputu ia ’Īserāʼela. Taua haʼaputuputuraʼa, ʼo te ʼohipa faufaʼa rahi roa ïa ʼo tē tupu nei i niʼa i te fenua nei. ʼAita e ʼohipa ʼē atu e faʼa’auhia i te rahi, ʼaita e ʼohipa ʼē atu e faʼa’auhia i te faufaʼa rahi, ʼaita e ʼohipa ʼē atu e faʼa’auhia i te hanahana. E mai te mea e māʼiti ʼoutou, mai te mea e hinaʼaro ʼoutou, e nehenehe ʼoutou ʼia riro ʼei tufaʼa faufaʼa rahi nō te reira. E nehenehe tā ʼoutou e riro ʼei tufaʼa rahi nō te tahi mea rahi, te tahi mea faʼahiahia !
« ʼIa paraparau anaʼe tātou i te parau nō te haʼaputuputuraʼa, tē parau nei tātou i teie parau mau faufaʼa rahi : E tiʼa i te mau tamariʼi atoʼa a tō tātou Metua i te Ao ra, i nā pae e piti ʼo te pāruru, ʼia faʼaroʼo i te poroʼi nō te ʼevanelia a Iesu Mesia tei faʼahoʼihia mai. Nā rātou e faʼaoti nō rātou iho mai te mea e hinaʼaro rātou ʼia ʼite atu ā i te reira ».13
’O tā tātou ïa e rave nei ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a Nei : tē ’imi nei tātou i te fa’atae i tō te ao i te māramaramara’a—’e te fa’afāriura’a—i te ’evanelia a Iesu Mesia. ’O tātou « te feiā ha’aputuputu i te mau mahana hope’a nei ».14 E misiōni pāpū tā tātou. Te mau taea’e ’e te mau tuahine, ’ia ’itehia tātou ’ei feiā ’o tei ha’apa’o tō rātou ’ā’au i te parau a Moroni, tei pure ’e tei fāri’i i te pāhonora’a nō te ’ite ē, e parau mau te Buka a Moromona, ’e ’ia fa’a’ite atu i terā ’ite ia vetahi ’ē, nā roto i te parau, ’e hau atu nā roto i te ’ohipa.
Te ’ohipa a te Buka a Moromona i roto i te fa’afāriura’a
Tei roto i te Buka a Moromona te ’īra’a o te ’evanelia a Iesu Mesia.15 E arata’i te reira ia tātou i te mau fafaura’a a te Metua, ’e mai te peu e ha’apa’ohia, e noa’a ïa ia tātou tāna hōro’a rahi roa a’e—te ora mure ’ore.16 ’O te Buka a Moromona te tāpe’a ’āpou o te fa’afāriura’a o te mau tamaiti ato’a ’e te mau tamāhine ato’a a te Metua i te Ao ra.
Nō te fa’ahiti fa’ahou i te peresideni Nelson : « ’A… tai’o [ai ’outou] i te Buka a Moromona i te mau mahana ato’a, e ha’api’i mai ’outou i te ha’api’ira’a tumu nō te ha’aputuputura’a, te mau parau mau nō ni’a ia Iesu Mesia ’e tāna tāra’ehara ’e te ’īra’a o tāna ’evanelia ’aita e ’itehia i roto i te Bibilia. ’O te Buka a Moromona te pū nō te ha’aputuputura’a o ’Īserāʼela. Inaha, ’āhani ’aita te Buka a Moromona, e’ita te fafaura’a i parauhia nō te ha’aputuputura’a o ’Īserāʼela e tupu ».17
E ’ōpani au ma teie parau a te Fa’aora i te ha’api’ira’a ’oia i te mau ’āti Nephi nō ni’a i te mau ha’amaita’ira’a i parauhia : « ’O ’outou ho’i tā taua mau peropheta ra tamari’i ; ’e nō te ’utuāfare o ’Īserā’ela ho’i ’outou ; ’e nō ’outou ho’i te faufa’a tā te Metua i fa’aau mai i tō ’outou hui metua ra, ’a nā ’ō ai ’oia ia Aberahama ra ē, ’ei tō hua’ai e maita’i ai te mau fēti’i ato’a o te ao nei ».18
Tē fa’a’ite pāpū nei au ē, e tamaiti ’e e tamāhine tātou nā te Atua, te hua’ai o Aberahama, te ’utuāfare o ’Īserā’ela. Tē ha’aputuputu nei tātou ia ’Īserā’ela nō te taime hope’a ’e tē nā reira nei tātou nā roto i te Buka a Moromona—e buka ho’i, ’ia ’āmuihia i te Vārua o te Fatu, e mauha’a mana rahi mau ïa nō te fa’afāriura’a. Tē arata’ihia nei tātou e te hō’ē peropheta nā te Atua, te peresideni Russell M. Nelson, ’o tē fa’atere nei i te ha’aputuputura’a o ’Īserā’ela i tō tātou nei anotau. E parau mau te Buka a Moromona. ʼUa taui te reira i tōʼu oraraʼa. Tē parau fafau nei au ia ’outou mai ia Moroni ’e te tahi atu mau peropheta e rave rahi nō muta’a ra, e ti’a i te reira ’ia taui i tō ’outou orara’a.19 I te i’oa o Iesu Mesia, ’āmene.