’Eiaha ia pe’ape’a
Nā Elder Ronald A. Rasband
Nō te pupu nō te Tino ’Ahuru Ma Piti ’āpōsetolo
Fa’aitoito e te mau taea’e ’e te mau tuahine. ’Oia, tē ora nei tātou i roto i te mau tau fifi, terā rā, mai te mea ē, e fa’aea noa tātou i ni’a i te ’ē’a o te fafaura’a, e’ita tātou e mata’u.
Tē ’āpiti atu nei au i tō’u ’itera’a pāpū i te mau parau poro’i a te peresideni Nelson ’e a Elder Cook tei hōro’ahia atu i ’āraua’e ra nō ni’a i te au māite ’e te hō’ēra’a te ’āpo’ora’a o te Peresidenira’a Mātāmua ’e te Tino Ahuru Ma Piti ’āpōsetolo. ’Ua ’ite au ē, teie mau fa’aarara’a i heheuhia, o te mana’o ïa ’e te hina’aro o te Fatu ’e e ha’amaita’i ’e e ha’apūai te reira i te mau ta’ata ’e te mau ’utuāfare, ’e i te ’Ēkālesia a Iesu Mesia i te Feiā Mo’a i te mau Mahāna Hōpe’a nei nō te mau u’i i muri nei.
Tau matahiti i ma’iri a’e nei, hō’ē ’o tā māua tamāhine tei fa’aipoipo-’āpī-hia ’e tāna tāne, tei ui mai i te tuahine Rasband ’e iā’u i te hō’ē uira’a faufa’a roa nō te orara’a : « E mea pāpū ānei ’e e ’ohipa pa’ari ānei ’ia tu’u mai i te tamari’i i roto i teie ao ’ino tā tātou e ora nei ? »
I teienei, e uira’a faufa’a roa teie nō te hō’ē mama ’e te hō’ē papa e ti’a ’ia feruri e tā rāua mau tamari’i here fa’aipoipohia. E nehenehe tā tātou e fa’aro’o i te mata’u i roto i tō rātou reo ’e ’ia ’ite i te mata’u i roto i tō rātou ’ā’au. Tā māua pāhonora’a ia rāua o te hō’ē ïa « ’Ē pāpū, hau atu i te hō’ē OK », ’a fa’a’ite ai māua i te mau ha’api’ira’a tumu o te ’evanelia ’e tae noa atu i tō māua mau mana’o ’ā’au rotahi ’e te mau ’itera’a o te orara’a.
E ’ere te mata’u i te ’ohipa ’āpī. ’Ua mata’u te mau pipi a Iesu Mesia i ni’a i te miti nō Galilea, i « te mata’i, ’e i te are » i roto i te pōiri o te pō.1 ’Ei mau pipi nāna i teie mahāna, e mata’u ato’a tō tātou. Tē mata’u nei tō tātou feiā pa’ari ’ōtahi ’ia rave i te mau fafaura’a mai te fa’aipoipora’a. E nehenehe te feiā fa’aipoipo-’āpī-hia, mai tā māua mau tamari’i, e mata’u ’ia tu’u mai i te mau tamari’i i roto i te hō’ē ao te rahi noa atu ra te ’ino. E rave rahi mau mea e mata’uhia nei e te mau misiōnare, i te taime ihoa rā e tāpiri atu i te ta’ata ’e’ē. Tē mata’u nei te mau vahine ’ivi e haere i mua rātou ana’e. Tē mata’u nei te mau tamari’i ’āpī ’o te ’ore rātou e fāri’ihia ; tē mata’u nei te mau pīahi tuatoru i te mahana mātāmua o te ha’api’ira’a ; tē mata’u nei te mau pīahi nō te ha’api’ira’a teitei ’ia fāri’i i te numera o te hi’opo’ara’a. Tē mata’u nei tātou i te manuia-’ore-ra’a, i te fa’aru’era’a, te ’ino’ino, ’e te ’ite-’ore-hia. Tē mata’u nei tātou i te mata’i rorofa’i, te ’āueuera’a fenua ’e te auahi o te ha’amou i te fenua ’e i tō tātou orara’a. Tē mata’u nei tātou o te ’ore tātou e mā’itihia, ’e, i te tahi a’e pae, tē mata’u nei tātou o te mā’itihia tātou. Tē mata’u nei tātou e ’ere tātou i te mea maita’i roa ; te mata’u nei tātou ē ’aita tā te Fatu e ha’amaita’ira’a nō tātou. Tē mata’u nei tātou i te tauira’a, ’e e nehenehe tō tātou mata’u i te pa’uma roa i ni’a i te ri’ari’a rahi. Tei roto ānei te tā’āto’ara’a ?
Mai tahito mai ā tō te mata’u fa’aitira’a i te ’itera’a ātea o te mau tamari’i a te Atua. ’Ua au roa vau i te ’ā’amu o Elisaia i roto i Te mau ari’i 2. ’Ua tono mai te ari’i nō Siria i te nu’u rahi « i te pō, e ’ua hā’ati a’era i tāua ’oire ra ».2 Tā rātou ōpuara’a ’ia haru ’e ’ia taparahi pohe i te peropheta Elisaia. Te taiʻo nei tātou :
« ’E ’ia ara Elisaia i te po’ipo’i roa, ’e reva atura i rāpae, inaha e nu’u pua’ahorofenua ’e te pere’o’o te hā’ati mai ra i te ’oire. ’Ua parau atura tāua tāvini ra iāna, ’āue e tā’u Fatu ē ! Nāhea tātou nei ? »3
E reo mata’u terā.
« ’E ’ua parau mai ra [Elisaia], ’eiaha e mata’u : E rahi tō tātou e iti tō rātou ».4
’Aita rā ’oia i fa’aea i reira.
« ’Ua pure atura Elisaia, nā ō atura, e Iehova ē, teie tā’u parau ia ’oe, e fa’a’ara’ara ’oe i tōna mata ’ia ’ite ’oia. ’E ’ua fa’a’ara’ara a’era Iehova i te mata o tāua ta’ata ’āpī ra, ’ite atu ra ’oia ; ’e inaha, ’ua ’ī te mou’a i te pua’ahorofenua, ’e te pere’o’o auahi, i te hā’atira’a ia Elisaia ».5
E tonohia mai paha te mau pere’o’o auahi ’e ’aore rā, ’aita, nō te tāmarū i tō tātou mau mata’u ’e nō te aro i tō tātou mau demoni, terā rā, e mea māramarama roa te ha’api’ira’a. Tei pīha’i iho te Fatu ia tātou, ’ua ’ite ’oia ē tē vai nei tātou ’e te ha’amaita’i nei ’oia ia tātou i roto i te hō’ē noa rāve’a e nehenehe iāna ’ia rave. E nehenehe te pure e ti’aoro ’ia ha’ama’irihia mai te pūai ’e te heheura’a tā tātou e hina’aro nō te fa’atumu i tō tātou mau mana’o i ni’a ia Iesu Mesia ’e i tāna tusia tāra’ehara. ’Ua ’ite te Fatu ē, e mata’u tātou i te tahi taime. ’Ua nā reira mai au, ’oia ato’a ’outou, nō reira te mau pāpa’ira’a mo’a i ’ī roa ai i te mau parau a’o :
« Ia ’oa’oa, e ’eiaha e mata’u ».6
« ’A hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u ».7
« ’Eiaha e mata’u ’e te nāna iti ē ».8 E mea au nā’u te marū o « te nāna iti ». I roto i teie ’Ēkālesia e iti paha tō tātou nūmera ’ia au i te tai’ora’a a tō te ao nei, ia ’ara’ara rā tātou i tō tātou mata vārua, « e rahi tō tātou, e iti tō rātou ».9 ’Ua parau ā tō tātou tīa’i here, o Iesu Mesia, « ’ia ’āmui noa atu tō te ao nei ’e tō te pō ho’i i te pāto’ira’a ia ’outou, nō te mea ’ia patuhia ’outou i ni’a i tā’u nei papa, e ’ore roa rātou e manuia ».10
Nāhea te mata’u i te tāmarūhia ? Nō te tamaiti ’āpī, tē ti’a ra ’oia i pīha’i iho ia Elisaia, hō’ē peropheta nā te Atua. ’Ua fafau-ato’a-hia mai te reira ia tātou. ’Ia fa’aro’o ana’e tātou i te peresideni Russell M. Nelson, ’ia ha’apa’o ana’e tātou i tāna a’o, tē ti’a ra ïa tātou i pīha’i iho i te hō’ē peropheta a te Atua. Ha’amana’o nā i te mau parau a Iosepha Semita : « E i teienei, i muri mai i te mau parau fa’a’ite e rave rahi o tei hōro’ahia nōna ra, ’o teie ho’i te parau fa’a’itera’a hope’a roa ra, o tā māua e fa’a’ite atu nei nōna ra ; ’oia ho’i te ora nei ’oia ! »11 Tē ora nei Iesu Mesia. Nā tō tātou here iāna ’e i tāna ’evanelia e tāmarū i te mata’u.
Nā tō tātou hina’aro « ’ia vai noa tōna Vārua »12 i roto ia tātou e tūra’i i te mata’u i te hiti, ’ia vai mai te hō’ē hi’ora’a mure ’ore rahi a’e nō tō tātou orara’a tāhuti nei. ’Ua fa’aara mai te peresideni Nelson, « i te mau mahana i muri nei, e’ita tātou e ora mai i te pae vārua mai te peu ’aita te mana arata’i ’e te fa’atere ’e te tāmāhanahana ’e te tāmau o te Vārua Maita’i ».13
’Ua parau te Fatu, nō ni’a i te mau ’ino e tāpo’i i te fenua ’e ’o te fa’a’eta’eta i te ’ā’au o te ta’ata e rave rahi : « E ti’a noa tā’u mau pipi i roto i te mau vāhi mo’a ra, ’e e ’ore roa rātou e fa’anu’uhia atu ».14
’E teie te a’ora’a hanahana : « ’Eiaha e pe’ape’a, nō te mea, ’ia hope teie nei mau mea ato’a i te tupu, e ’ite ai ’outou ē, e fa’atupuhia te mau parau tā’u i fafau atu ia ’outou na i reira ».15
’A ti’a i te mau vāhi mo’a—’eiaha e pe’ape’a—’e e fa’atupuhia te mau fafaura’a. E hi’o na tātou i te reira nā mea e toru ’ia fa’aauhia i tō tātou mau mata’u.
A tahi, ’a ti’a i te mau vāhi mo’a. ’Ia ti’a ana’e tātou i te mau vāhi mo’a—tō tātou mau ’utuāfare parau ti’a, tō tātou mau fare purera’a ha’amo’ahia—e ’ite tātou i te Vārua o te Fatu i pīha’i iho ia tātou. E ’itehia ia tātou te mau pāhonora’a i te mau uira’a ’o tē ha’ape’ape’a nei ia tātou ’aore rā te hau, nō te tu’u i te reira i te hiti. ’O te Vārua te reira e ’ohipa ra. Tē tītau nei teie mau vāhi mo’a i roto i te bāsileia o te Atua i ni’a i te fenua nei i tō tātou fa’atura, tō tātou fa’atura ia vetahi ’ē, tō tātou huru maita’i roa i te orara’a i te ’evanelia, ’e tō tātou ti’aturira’a ’ia vaiiho i te hiti i tō tātou mau mata’u ’e ’ia ’imi i te mana fa’aora o Iesu Mesia nā roto i tāna tāra’ehara.
’aita e pārahira’a nō te mata’u i roto i teie mau vāhi mo’a o te Atua ’e ’aore rā, i roto i te ’ā’au o tāna mau tamari’i. Nō te aha ? Nō te here. Tē here nei te Atua ia tātou—i te mau taime ato’a—’e tē here nei tātou iāna. E pāto’i tō tātou here i te Atua i te mau mata’u ato’a, ’e ’ua ’ī roa te mau vāhi mo’a i tōna here. ’A feruri na i te reira. ’Ia tapitapi ana’e tō tātou mana’o nō ni’a i tā tātou mau fafaura’a i te Fatu, ia fa’aātea ana’e tātou i te ’ē’a e tae atu ai i te ora mure ’ore ra, ’ia uiui ana’e tātou e ’aore rā, ’ia fē’a’a ana’e tātou i tō tātou aura’a i roto i tāna fa’anahora’a hanahana, ’ia vaiiho ana’e tātou i te mata’u ’ia ’īriti i te ’ūputa i te tā’āto’ara’a o tōna mau hoa—te mana’o ha’aparuparu, te riri, te ’ino’ino—e fa’aru’e te Vārua ia tātou, ’e ’aita te Fatu fa’ahou i pīha’i iho ia tātou. Mai te mea ē tē ’ite ra ’outou ē, e aha terā huru, ’ua ’ite ïa ’outou ē, e ’ere i te vāhi maita’i ’ia vai i reira. ’Ia ti’a ana’e rā tātou i te mau vāhi mo’a, e nehenehe tā tātou e ’ite i te here o te Atua, ’e « nā te aroha rahi ho’i e ’īriti ’ē atu i te mata’u ».16
Te fafaura’a i muri iho maori rā, « ’eiaha e pe’ape’a ».17 Noa atu te fāito o te ’ino ’e te ti’arepu i ni’a i te fenua nei, nā roto i tō tātou ha’apa’o ia Iesu Mesia i te mau mahana ato’a, ’ua fafauhia mai ia tātou « te hau a te Atua o tei hau ’ē atu i te ’ite ta’ata nei ».18 ’E ’ia haere mai te Mesia nā roto i te mana ’e te hanahana rahi, e mou te ’ino, te ’ōrurehau ’e te parau ti’a ’ore.
I muta’a ihora, ’ua tohu te ’āpōsetolo Paulo i tō tātou ’anotau, ma te parau i te tamaiti ra ia Timoteo :
« E tupu te ’ati rahi i taua ’anotau hope’a nei, ’ia ’ite mai ’oe.
« E riro te ta’ata nei ’ei mi’imi’i, e nounou moni, e fa’aahaaha, e te’ote’o, e fa’a’ino, e fa’aro’o ’ore i te metua, e māuruuru ’ore, ’e te vi’ivi’i,
« e hina’aro i te mau mea e navenave ai ra ’aore hina’aro i te Atua ».19
Ha’amana’o, i nā pae e piti o te pāruru, te feiā tei here i te Fatu ma tō rātou ’ā’au ato’a, te mana’o ato’a ’e te pūai ato’a, « e rahi tō tātou e iti tō rātou ».20 Mai te mea ē, e ti’aturi itoito tātou i te Fatu ’e i tōna mau haere’a, mai te mea ē, e fa’aō tātou ia tātou i roto i tāna ’ohipa, e’ita ïa tātou e mata’u i te mau peu a tō te ao nei, ’e ’aore rā, e ha’ape’ape’ahia nā te reira. Tē tāparu nei au ia ’outou ’ia tu’u i te hiti i te mau mea o te ao nei ’e te mau tura’ira’a ’e ’ia ’imi i te vārua i roto i tō ’outou orara’a i te mau mahāna ato’a. ’A here i te mea tā te Fatu e here, ’oia ho’i, tāna mau fa’auera’a, tōna mau fare mo’a, tā tātou mau fafaura’a mo’a i mua iāna, te ’ōro’a mo’a i te mau mahana sābati ato’a, tā tātou ’āparaura’a nā roto i te pure, e’ita ïa ’outou e pe’ape’a.
Te mana’o hōpe’a : ’A ti’aturi i te Fatu ’e i tāna mau fafaura’a. ’Ua ’ite au ē, e fa’atupuhia tāna mau fafaura’a tā’āto’a. ’Ua ’ite au i te reira ma te pūai mai tā’u e ti’a nei i mua ia ’outou i teie mahana.
’Ua heheu mai te Fatu ē : « Nō te mea o rātou o tei pa’ari ’e ’ua fāri’i ho’i i te parau mau, e ’ua rave ho’i i te Vārua mo’a ’ei arata’i nō rātou ra, e ’aita ho’i rātou e ha’avarehia—’oia mau tā’u e parau atu ia ’outou nā e ’ore roa rātou e tāpūhia ’e e hurihia i roto i te auahi, e fa’a’oroma’i rā rātou i te reira mahana ».21
Nō reira ’eiaha tātou e pe’ape’a i te mau ’ārepurepura’a o teie tau, i te feiā i roto i te fare rahi ’e te ’ā’ano, i te feiā e fa’ainaina nei i te tauto’ora’a ti’a ’e te tāvinira’a pāpū i te Fatu ia Iesu Mesia. E tae mai te mana’o pāpū, te itoito, ’e te aroha nā roto mai i te ’ā’au fa’ateimaha-ore-hia i te mau pe’ape’a ’aore ra, i te ’ārepurepura’a. ’Ua fa’aha’amana’o mai te peresideni Nelson ia tātou, ’ia au i tōna huru « ta’ata mana’o maita’i nō te tau i mua nei » ē, « mai te mea ē, e ti’aturi tātou ’ia tīti’a i te naho’a reo ’e te mana’o hōhonu o te ta’ata e ’aro ra i te parau mau, tītauhia ’ia tātou ’ia ha’api’i nāhea i te fāri’i i te heheura’a ».22
Nō te fāri’i i te heheura’a nō te ta’ata iho, tītauhia ia tātou ’ia tu’u ’ei fā mātāmua, te orara’a i te ’evanelia ’e te fa’aitoitora’a i te parau nō te ha’apa’o ’e te pae vārua i roto ia vetahi ’ē ’e i roto ia tātou iho.
’O Spencer W. Kimball te hō’ē o te mau peropheta i tō’u ’āpīra’a. I te mau matahiti i ma’iri a’e nei, i muri a’e i tō’u pi’ira’ahia ’ei ’āpōsetolo, ’ua ’itehia iā’u te hau i roto i tāna poro’i mātāmua i roto i te ’āmuira’a rahi nō ’Ātopa 1943. ’Ua putapū roa ’oia i tōna pi’ira’a ; ’ua ’ite au i te huru o te reira mana’o. ’Ua parau ’o Elder Kimball ē : « ’Ua feruri ’e ’ua pure ’ū’ana vau, ’e ’ua ha’apae i te mā’a ’e ’ua pure. ’Ua tupu mai te mau mana’o tū’ati ’ore i roto i tō’u ferurira’a—mai te huru ē, e mau reo o tē parau mai nei ē : E’ita tā ’oe e nehenehe e rave i terā ’ohipa. E ’ere ’oe i te mea ti’amā. ’Aita e ’ite tō roto ia ’oe —’e i te mau taime ato’a, ’e tae mai te mana’o upo’oti’a i te pae hōpe’a : ’Ia rave ’oe i te ’ohipa i fa’auehia e ti’a ai—’ia fa’a’aravihi ia ’oe iho, ia fa’ati’amā, ’e ’ia fa’aineine ia ’oe iho.’ ’E ’ua ’ū’ana te arora’a ».23
E ha’apa’o vau i terā ’itera’a pāpū o teie ’āpōsetolo o tei riro mai ’ei 12ra’a o te Peresideni o te ’Ēkālesia. ’Ua ’ite ’oia ē, tītauhia iāna ’ia tu’u i tōna mau mata’u i muri iāna nō « te rave i te ’ohipa i fa’ata’ahia » ’e ’ua tītau-ato’a-hia iāna ’ia turu’i i ni’a i te Fatu nō te fāri’i i te pūai E nehenehe ato’a tātou. E ’ū’ana te mau arora’a, terā rā, e fa’aruru tātou i te reira nā roto i te Vārua o te Fatu. « ’Eiaha tātou e pe’ape’a » nō te mea mai te mea e ti’a tātou i pīha’i iho i te Fatu ’e e ti’a nō tāna mau parau tumu ’e tāna fa’anahora’a mure ’ore, tē ti’a ra ïa tātou i te vāhi mo’a.
I teienei, e aha te parau nō terā tamāhine ’e te huno’a tamaiti tei ui mai i te hō’ē uira’a hōhonu roa, niuhia i ni’a i te mata’u tau matahiti i ma’iri a’e nei ? ’Ua feruri māite rāua i tā mātou ’āparaura’a i tāua pō ra; ’ua pure rāua ’e ’ua ha’apae i te mā’a ’e ’ua rave i tā rāua iho fa’aotira’a. Ma te ’oa’oa ’e ma te pōupou nō rāua ’e nō māua, te mau metua tupuna, ’ua ha’amaita’ihia rāua i te fāri’ira’a e hitu tamari’i nehenehe ’a haere ai rātou i mua i roto i te fa’aro’o.
Fa’aitoito e te mau taea’e ’e te mau tuahine. ’Oia, tē ora nei tātou i roto i te mau tau fifi, terā rā, mai te mea ē, e fa’aea noa tātou i ni’a i te ’ē’a o te fafaura’a, e’ita tātou e mata’u. Tē ha’amaita’i nei au ia ’outou mai te mea e nā reira ’outou, e’ita ’outou e ha’ape’ape’ahia nā te tau tā tātou e ora nei ’e ’aore rā, nā te mau pe’ape’a i ni’a i tō ’outou haere’a. Tē ha’amaita’i nei au ia ’outou ’ia mā’iti ’ia ti’a noa i te mau vāhi mo’a ’e ’eiaha ia fa’anu’u-’ē-hia atu. Tē ha’amaita’i nei au ia ’outou ’ia ti’aturi i te mau fafaura’a a Iesu Mesia, tē ora nei ’oia, tē ara nei ’oia i ni’a iho ia tātou, ’e te aupuru nei ’oia ia tātou ’e tē ti’a nei i pīha’i iho ia tātou. Nā roto i te i’oa o tō tātou Fatu e Fa’aora, o Iesu Mesia ra, ’āmene.