Te fa’afāriura’a hōhonu ’e te pāpū i te Metua i te Ao ra ’e i te Fatu ia Iesu Mesia

Novema 2018

Te fa’afāriura’a hōhonu ’e te pāpū i te Metua i te Ao ra ’e i te Fatu ia Iesu Mesia

Nā Elder Quentin L. Cook

Nō te Pupu nō te Tino ’Ahuru Ma Piti ’āpōsetolo

Tā tātou fā o te fa’a’aifāitora’a ïa i te mau ’itera’a i te pae ’Ēkālesia ’e i te pae ’utuāfare ’ia nehenehe te reira ’ia fa’arahi atu i te fa’aro’o ’e te pae vārua, ’e ’ia fa’ahōhonu i te fa’afāriura’a.

Mai tā peresideni Russell M. Nelson i fa’ahiti a’e nei ma te nehenehe ’e te māramarama, e mea maoro i teienei tō te feiā fa’atere o te ’Ēkālesia tuatāpapara’a i te hō’ē fa’anahora’a « fa’atumuhia i ni’a i te ’utuāfare ’e ma te pāturuhia e te ’Ēkālesia, nō te ha’api’i mai i te ha’api’ira’a tumu, nō te ha’apūai i te fa’aro’o, ’e nō te fa’atupu i te ha’amorira’a rahi a’e a te ta’ata iho ». I muri iho, ’ua fa’aara mai te peresideni Nelson i te hō’ē tauira’a nō te fa’atupu i « te hō’ē au māite ’e te tū’atira’a i rotopū i te ha’api’ira’a ’evanelia i roto i te ’utuāfare ’e i roto i te ’Ēkālesia ».¹

Nō te fa’atupu i teie mau ’ōpuara’a—tei fa’ata’ahia mai ’e tei arata’ihia e te peresideni Russell M. Nelson, ’e ’ia au i te fa’aotira’a a te ’Āpo’ora’a a te Peresidenira’a Mātāmua ’e te Pupu nō te Tino Ahuru ma Piti ’āpōsetolo—e tauihia te fa’anahora’a purera’a o te sābati mai teie te huru i muri nei, ’e e ha’amata te reira i te ’āva’e tēnuare 2019.

Fa’anahora’a purera’a i te sābati

Teie atura te fa’anahora’a nō te mau purera’a i te sābati, hō’ē purera’a ’ōro’a e 60 minuti te roa i te mau sābati ato’a, ’ia fa’atumuhia i ni’a i te Fa’aora, te ’ōro’a nō te ’ōro’a mo’a, ’e te mau parau poro’i pae vārua. I muri a’e i te reira, e haere te mau melo o te ’Ēkālesia i roto i te piha ha’api’ira’a e 50 minuti te maoro, ’e e tāuiui noa i te sābati tāta’itahi.

Te sābati mātāmua ’e te toru, e fa’aterehia te ha’api’ira’a sābati.
Te piti ’e te maha o te sābati, e fa’aterehia te mau purera’a a te mau pupu autahu’ara’a, te Sōtaiete Tauturu, ’e te feiā ’āpī tamāhine.
Te mau purera’a i te pae o te sābati, nā te ’episekopo e fa’atere te reira.

E fa’aterehia te paraimere i te mau hepetoma ato’a, i roto ato’a i terā nā 50 minuti te maoro, tei roto i reira te taime hīmenera’a ’e te ha’api’ira’a.

Nō te fa’anahora’a o te mau purera’a i te sābati, ’ua ’ite maoro te feiā fa’atere pa’ari o te ’Ēkālesia ē, nō te tahi pae o tō tātou mau melo faufa’a, e nehenehe te fa’anahora’a toru hora i te sābati e riro ’ei mea fifi. Nō te mau metua ihoa rā e tamari’i na’ina’i tā rātou, nō te mau tamari’i Paraimere, nō te mau melo pa’ari, nō te feiā fa’afāriu-’āpī-hia, ’e te vai atura.²

E ’ere rā teie tauira’a nō te ha’apoto noa i te fa’anahora’a purera’a i te sābati, tē vai ra te mau mea hau atu i te faufa’a nō te reira. ’Ua ’ite ’e ’ua māuruuru te peresideni Nelson i te mau ’ohipa i fa’aotihia maoti tō ’outou ha’apa’o maita’i i te mau tītaura’a i mua ra. Tē hina’aro nei ’oia ’e te tā’āto’ara’a o te fa’aterera’a o te ’Ēkālesia, e hōpoi atu i te ’oa’oa rahi o te ’evanelia—i te mau metua, te mau tamari’i, te feiā ’āpī, te feiā ’ōtahi, te ruhiruhiā, te feiā fa’afāriu ’āpī, ’e terā mau ta’ata tā te mau misiōnare e ha’api’i nei—nā roto i te hō’ē tauto’ora’a ’aifāito, fa’atumuhia i ni’a i te ’utuāfare, pāturuhia e te ’Ēkālesia. Teie te mau fā ’e te mau ha’amaita’ira’a i ’āpitihia i teie tauira’a ’e te tahi atu mau tauira’a ’aita i maoro a’e nei :

Te fa’ahōhonura’a i te fa’afāriura’a i te Metua i te ao ra ’e i te Fatu ia Iesu Mesia ’e te ha’apūaira’a i te fa’aro’o i roto ia rāua.
Te ha’apūaira’a i te ta’ata iho ’e te mau ’utuāfare nā roto i te fa’anahora’a ha’api’ira’a fa’atumuhia i ni’a i te ’utuāfare, pāturuhia e te ’Ēkālesia, ’o te fa’atupu mai i te orara’a i te ’evanelia ma te ’oa’oa.
Te ha’amo’ara’a i te mahana sābati, ma te fa’atumu i ni’a i te ōro’a nō te ’ōro’a mo’a.
Te tāuturura’a i te mau tamari’i pā’āto’a a te Metua i te ao ra i nā pae e piti o te pāruru nā roto i te ’ohipa misiōnare ’e te fāri’ira’a i te mau ’ōro’a ’e te mau fafaura’a ’e te mau ha’amaita’ira’a o te hiero.

Fa’atumuhia i ni’a i te ’utuāfare, te ha’api’ira’a mai i te ’evanelia pāturuhia e te ’Ēkālekia

Nā roto i te teie fa’anahora’a o te sābati, e rahi atu te taime nō te hō’ē ahiahi ’utuāfare ’e nō te tuatāpapa i te ’evanelia i te ’utuāfare i te sābati, ’aore rā, i te tahi atu mau taime tā te ta’ata ’e te mau ’utuāfare e mā’iti. E nehenehe e fa’atupu i te hō’ē pō fa’a’oa’oara’a ’utuāfare i te monirē ’aore rā, i te tahi atu taime. Nō reira, e tāmau noa te feiā fa’atere i te ’ōpani ’ia fa’atupuhia te mau putuputura’a ’e te mau fa’a’oa’oara’a a te ’Ēkālesia i te mau pō monirē. Terā rā, e ti’a ’ia fa’anahohia te taime nō te ahiahi ’utuāfare, te tuatāpapara’a ’evanelia, ’e te mau fa’a’oa’oara’a nō te mau ta’ata ’e nō te mau ’utuāfare, mai te au i te huru o tō rātou orara’a.

Mai, pe’e mai—nō te ta’ata hō’ē ’e te ’utuāfare.

E maita’i roa atu te tuatāpapara’a ’evanelia a te ’utuāfare ’e a te ta’ata hō’ē i te ’utuāfare nā roto i te hō’ē fa’anahora’a ha’api’ira’a au māite, ’e te hō’ē rāve’a tauturu ’āpī Mai, pe’e mai nō te ta’ata hō’ē ’e te ’utuāfare ’o tei fa’anahohia ’ia au i te mau mea e ha’api’ihia ra i roto i te Ha’api’ira’a Sābati ’e te Paraimere.³ I te ’āvae tēnuare, e ha’api’i te feiā ’āpī ’e te feiā pa’ari nō te Ha’api’ira’a Sābati ’e te mau piha ha’api’ira’a Paraimere, i te Faufa’a ’Āpī. Teie rāve’a tauturu ’āpī nō te tuatāpapara’a i te fare, Mai, pe’e mai nō te ta’ata hō’ē ’e te ’utuāfare—tē ha’api’i ato’a ra i te Faufa’a ’Āpī—’ua fa’ata’ahia nō te tauturu i te mau melo ’ia ha’api’i mai i te ’evanelia i roto i te ’utuāfare. Tē fa’ata’a ra te reira, « nō te mau ta’ata ato’a ’e te mau ’utuāfare i roto i te ’Ēkālesia teie rāve’a tauturu. ’Ua hāmanihia te reira nō te tauturu [maita’i a’e ia tātou] ’ia ha’api’i mai i te ’evanelia—’o [tātou] ana’e iho ’aore rā e tō [tātou] ’utuāfare… ’Ua fa’anahohia te arata’ira’a ha’api’ira’a i roto i teie mātēria [’āpī] mai te au i te tārena tāhepetoma ».⁴

Te mau ha’api’ira’a ’āpī Mai, pe’e mai nō te Paraimere ’o te ha’api’ihia i te fare purera’a, e pe’e ato’a i te reira tārena tāhepetoma. E fa’anahohia te mau ha’api’ira’a a te feiā pa’ari ’e a te feiā ’āpī nō te Ha’api’ira’a Sābati i te sābati mātāmua ’e te piti, ’ia nehenehe ia rātou ’ia pāturu i te rāve’a tauturu ’āpī nō te ’utuāfare, Mai, pe’e mai. I te piti ’e te maha o te sābati, e tāmau noa ā te feiā pa’ari i roto i te autahu’ara’a ’e te Sōtaiete Tauturu, i te tuatāpapa i te mau ha’api’ira’a a te feiā fa’atere o te ’Ēkālesia, ma te ha’apāpū i ni’a i te mau parau poro’i a te mau peropheta nō teie ’anotau.⁵ E tuatāpapa te feiā ’āpī tamāhine ’e te feiā ’āpī tamāroa nō te autahu’ara’a a Aarona i te mau tumu parau nō te ’evanelia i tāua mau sābati ra.

E hōro’a mai te mātēria ’āpī nō te tuatāpapara’a ’utuāfare i « te mau mana’o nō te tuatāpapara’a pāpa’ira’a mo’a a te ’utuāfare ’e nō te pō ’utuāfare ».⁶ Tē vai ra i roto i te arata’ira’a ha’api’ira’a nō te hepetoma tāta’itahi te mau mana’o ’e te mau ’ohipara’a nā te ta’ata hō’ē ’e te ’utuāfare. E rave rahi ato’a mau hōho’a i roto i te mātēria tauturu Mai, pe’e mai, ’o te tauturu ’ia ha’amaita’i i te ha’api’ira’a mai a te ta’ata hō’ē ’e te ’utuāfare, nō te mau tamari’i ihoa rā.⁷ E hōro’ahia teie mātēria tauturu ’āpī nā te ’utuāfare tāta’itahi i te ’āva’e tītema nō teie matahiti.

I roto i tāna a’ora’a mātāmua i te mau melo o te ’Ēkālesia i te ’āva’e tēnuare ra, ’ua fa’aitoito te peresideni Nelson ia tātou ’ia fa’aineine nō te tae-piti-ra’a mai o Iesu Mesia nā roto i te haerera’a nā ni’a i te ’ē’a nō te fafaura’a.⁸

Nō te huru tupura’a o te ao nei, ’ua tītauhia te fa’afāriura’a rahi atu o te ta’ata ’e te ha’apūaira’a rahi atu o te fa’aro’o i te Metua i te ao ra ’e ia Iesu Mesia ’e tāna tāra’ehara. ’Ua fa’aineine te Fatu ia tātou, rēni i ni’a i te rēni, nō te mau tau ’ati rahi tā tātou e fa’aruru nei i teienei. I te mau matahiti i ma’iri a’e nei, ’ua arata’i te Fatu ia tātou nō te pāhono i tō tātou mau māna’ona’ora’a tumu, ’oia ho’i :

Te ha’amo’ara’a i te mahana sābati ’e i te ’ōro’a mo’a tei ha’apāpū-fa’ahou-hia mai i roto i nā matahiti e toru i ma’iri a’e nei.
I raro a’e i te fa’aterera’a a te ’episekōpo, tē fa’atumu nei te mau pupu autahu’ara’a ’e te Sōtaiete Tauturu ha’apūaihia i ni’a i te ’ōpuara’a a te ’Ēkālesia⁹ ’e te tauturura’a i te mau melo ’ia rave ’e ’ia ha’apa’o i te mau fafaura’a mo’a.
Tē ha’apa’ohia nei ma te ’oa’oa te aupurura’a i roto i te hō’ē ravera’a teitei a’e ’e te mo’a a’e.
Ma te ha’amata nā te hōpe’a i te ferurira’a, tē riro nei te mau heheura’a o te hiero ’e te tāvinira’a i roto i te ’ā’amu ’utuāfare ’ei tuha’a faufa’a nō te ’ē’a o te fafaura’a.

Te tauira’a tei fa’a’itehia i teie po’ipo’i o te tahi atu ïa hi’ora’a nō te arata’ira’a nō te mau tītaura’a o tō tātou tau.

’Ua ha’apāpū te fa’anahora’a ha’api’ira’a tahito a te ’Ēkālesia i te ’itera’a o te Ha’api’ira’a Sābati. ’Ua ’ite tātou ē, mai te mea tē vai ra tā tātou hō’ē ha’api’ira’a maita’i a’e, ’e te mau melo o te piha ha’api’ira’a ineine maita’i i te pae vārua, e roa’a ia tātou te hō’ē ’itera’a maita’i a’e nō te sābati i te fare purera’a. E fāna’o tātou i te mea ē, pinepine te Vārua i te fa’arahi ’e i te ha’apūai i te fa’afāriura’a i roto i te fa’anahora’a a te ’Ēkālesia.

Tītauhia i te fa’anahora’a ha’api’ira’a ’āpī fa’atumuhia i ni’a i te ’utuāfare ’e pāturuhia e te ’Ēkālesia, ’ia tura’i pūai atu ā i te ha’apa’o ’e i te huru pae fa’aro’o o te ’utuāfare ’e i te ha’apa’o ’e i te huru pae fa’aro’o o te ta’ata hō’ē. ’Ua ’ite tātou i te hōpe’ara’a pae vārua ’e te fa’afāriura’a hōhonu ’e te pāpū o te nehenehe e ravehia i roto i te fa’anahora’a o te ’utuāfare. E rave rahi matahiti i ma’iri a’e nei, ’ua fa’a’ite te hō’ē tuatāpapara’a ē, pinepine te fa’aurura’a a te Vārua Maita’i i ni’a i te feiā ’āpī tamāroa ’e tamāhine i te ’āpe’e i te tuatāpapara’a i te pāpa’ira’a mo’a ’e te pure a te ta’ata hō’ē i roto i te ’utuāfare. Tā tātou fā o te fa’a’aifāitora’a i te mau ’itera’a i te pae ’Ēkālesia ’e i te pae ’utuāfare ’ia nehenehe te reira ’ia fa’arahi i te fa’aro’o ’e te pae vārua, ’e ’ia fa’ahōhonu i te fa’afāriura’a i te Metua i te ao ra ’e i te Fatu ia Iesu Mesia.

I roto i te tuha’a fa’atumura’a i ni’a i te ’utuāfare, pāturuhia e te ’Ēkālesia o teie tauira’a, e nehenehe te ta’ata hō’ē ’e te ’utuāfare e fa’ata’a, nā roto i te vārua pure, nāhea ’e e aha te taime e fa’a’ohipa ai i te reira. ’Ei hi’ora’a, noa atu ē, e ha’amaita’i rahi teie i te mau ’utuāfare ato’a, nō ni’a i te mau hina’aro, e mea tano roa nō te feiā ’āpī pa’ari, nō te feiā pa’ari ’ōtahi, nō te mau metua ’ōtahi, nō te mau ’utuāfare ’āfa melo, nō te mau melo ’āpī,¹⁰ ’e nō vetahi, ’ia ha’aputuputu ’ei mau pupu i rāpae i te mau purera’a ha’amorira’a i te sābati nō te fāna’o i te autaea’era’a o te ’evanelia ’e ’ia ha’apūaihia nā roto i te tuatāpapa-’āmui-ra’a i te rāve’a tauturu fa’atumuhia i ni’a i te ’utuāfare, pāturuhia ’e te ’Ēkālesia. E ravehia te reira nā te feiā e hina’aro.

I roto i te mau tuha’a e rave rahi o te ao nei, e mā’iti te mau ta’ata e fa’aea i te fare purera’a i muri a’e i te mau hora purera’a o te sābati nō te fāna’o i te mau auta’atira’a sōtiare. ’Aita roa atu te fa’aarara’a nō te tauira’a e ha’afifi nei i teie peu nehenehe ’e te faufa’a.

Nō te tauturu i te mau melo ’ia fa’aineine nō te sābati, ’ua hāpono a’ena te tahi mau pāroita i te hō’ē rata uira ha’amāramaramara’a ’aore ra, i te hō’ē poro’i i te ’āfa hepetoma. Nō teie tauira’a, tē fa’aitoito pūai atu nei mātou i teie huru tureiara’a. Nā teie mau anira’a e fa’aha’amana’o i te mau melo i te fa’anahora’a purera’a nō te sābati nō te reira hepetoma, tae noa atu i te parau tumu nō te ha’api’ira’a, ’e te ’āparaura’a ’evanelia tāmau i te ’utuāfare. Ta’a ’ē atu i te reira, e hōro’a ato’a te mau purera’a feiā pa’ari i te sābati i te ha’amāramaramara’a nō te nati i te tuatāpapara’a a te ’Ēkālesia ’e a te ’utuāfare i te hepetoma tāta’itahi.

Tītauhia ’ia feruri māite nā roto i te pure, nō ni’a i te purera’a ’ōro’a ’e te taime ha’api’ira’a, nō te ha’apāpū ē, ’ua ha’afaufa’ahia te mau fā pae vārua mātāmua nā mua i te ’ohipa fa’aterera’a. ’Ei hi’ora’a, e nehenehe te mau parau fa’a’ite e hōro’ahia i roto i te hō’ē anira’a i rōpū i te hepetoma ’aore rā, i ni’a i te hō’ē fa’anahora’a nene’ihia. E ravehia te pure ha’amatara’a ’e te pure fa’aotira’a i roto i te purera’a ’ōro’a, are’a te piti o te putuputura’a, e nehenehe e hōro’ahia te pure fa’aotira’a ana’e.¹¹

Mai tā tātou i fa’ahiti i te ’ōmuara’a, e’ita teie fa’anahora’a ’āpī nō te sābati e ha’amata nā mua a’e i te tēnuare 2019. E rave rahi tumu nō te reira. Nā tumu faufa’a roa a’e e piti, a tahi, nō te taime e tītauhia nō te ’ōpere i te mātēria Mai, pe’e mai, nō te ta’ata hō’ē ’e te ’utuāfare, te piti, nō te hōro’a i te taime i te mau peresideni titi ’e te mau ’episekōpo ’ia fa’anaho i te mau tārena purera’a, ’ia rahi atu te mau pāroita e putuputu ’oi’oi i te reira mahana.

’A ’imi ai te feiā fa’atere i te heheura’a, ’ua fāri’ihia te arata’ira’a i roto i te mau matahiti i ma’iri ’oia ho’i ’ia ha’apuai i te purera’a ’ōro’a, ’ia ha’amo’a i te mahana sābati, ’e ’ia fa’aitoito ’e ’ia tauturu i te mau metua ’e i te mau ta’ata ’ia fa’ariro i tō rātou fare ’ei pū nō te pūai pae vārua ’e nō te fa’arahi i te fa’aro’o—e vāhi nō te ’oa’oa ’e te poupou.

Mau ha’amaita’ira’a fa’ahiahia

E aha te aura’a teie mau tauira’a nō te mau melo nō te ’Ēkalesia a Iesu Mesia i te Feiā Mo’a i te mau Mahana Hope’a nei ? Tē ti’aturi nei mātou ē, e ha’amaita’i-rahi-hia te mau melo. E nehenehe te sābati e riro ’ei mahana nō te ’apora’a mai ’e nō te ha’api’ira’a i te ’evanelia i te fare purera’a ’e i roto i te ’utuāfare. ’A rave ai te ta’ata hō’ē ’e te ’utuāfare i te mau ’āpo’ora’a ’utuāfare, te ’ā’amu ’utuāfare, te aupurura’a, te tāvinira’a, te ha’amorira’a a te ta’ata iho, ’e te taime fa’a’oa’oara’a ’utuāfare, e riro mau te sābati ’ei ’oa’oara’a.

E melo te hō’ē ’utuāfare nō te hō’ē titi i reira te tāmatamatara’ahia te materia ’āpī Mai, pe’e mai. Teie te mau parau a te metua tāne, o Fernando, e misiōnare tahito, ’e o Nancy, e nā metua nō nā tamari’i ’āpī e maha : « I te tu’ura’ahia mai te fa’anahora’a Mai, pe’e mai i roto i tā mātou titi, ’ua ’oa’oa roa vau, ’e ’ua feruri au ē, e taui te huru nō tā mātou tuatāpapara’a i te mau pāpa’ira’a mo’a i te ’utuāfare.’ ’Ua tupu mau te reira i roto i tō’u ’utuāfare, ’e ’ei ta’ata fa’atere nā te ’Ēkālesia, ’ua ’ite au i te reira i te tupura’a i roto i te tahi atu mau ’utuāfare… ’Ua tauturu te reira ia mātou ’ia tau’aparau mau i te pāpa’ira’a mo’a i roto i tō mātou ’utuāfare. ’Ua roa’a i tā’u vahine ’e iā’u ato’a te hō’ē ’itera’a hōhonu a’e nō ni’a i te parau tumu i tuatāpapahia… ’Ua tauturu te reira ia mātou… ’ia fa’arahi i tō mātou ’itera’a i te ’evanelia, ’e ’ia ha’amaita’i i tō mātou fa’aro’o ’e te ’itera’a pāpū… Tē fa’a’ite nei au i tō’u ’itera’a pāpū… ’ua ’ite au ē, nā te Fatu i fa’auru mai i te reira, ’ia ti’a i te tuatāpapara’a tāmau ’e te maita’i i te mau parau tumu ’e te mau ha’api’ira’a tumu e vai ra i roto i te mau pāpa’ira’a mo’a ’ia hōpoi mai i te fa’aro’o, te ’itera’a pāpū ’e te māramarama rahi atu i te mau ’utuāfare… i roto i te hō’ē ao te rahi noa atura te ’ino ».¹²

I roto i te mau titi i tāmatamatahia nā te ao nei, tē vai ra hō’ē pāhonora’a maita’i roa nō ni’a i te mātēria ’āpī nō te ’utuāfare, Mai, pe’e mai E rave rahi tei fa’a’ite mai ē, ’ua haere rātou i mua nā roto i te tai’ora’a i te mau pāpa’ira’a mo’a ’e ’ia tuatāpapa mau i te mau pāpa’ira’a mo’a. ’Ua ’ite ato’ahia ē, ’ua ha’apūai tāua ’ohipa ra i te fa’aro’o ’e ’ua fa’atupu i te hō’ē ’ohipa maita’i i ni’a i te pāroita.¹³

Fa’afāriura’a hōhonu ’e te pāpū

Te fā o teie mau tauira’a o te fāri’ira’a ïa i te fa’afāriura’a hōhonu ’e te pāpū o te feiā pa’ari ’e o te u’i e ti’a mai nei. Tē fa’a’ite mai nei te ’āpī mātāmua o te mātēria o te ta’ata hō’ē ’e te ’utuāfare : « Te tītaura’a o te mau ’apora’a ’e te ha’api’ira’a i te ’evanelia, ’o te fa’ahōhonura’a ïa i tō tātou fa’afāriura’a ’e te tauturura’a ia tātou ’ia riro mai ia Iesu Mesia te huru.… Te aura’a, maori rā, e turu’i tātou i ni’a i te Mesia nō te taui i tō tātou māfatu ».¹⁴ E ’ōhie te reira nā roto i te haerera’a i ō mai i te piha ha’api’ira’a ē tae atu i te ’ā’au ’e te fare o te ta’ata hō’ē. Tītauhia te tauto’ora’a tāmau ’e te tauto’ora’a tāmahana nō te māramarama ’e nō te ora i te ’evanelia. E tītau te fa’afāriura’a mau i te mana fa’auru o te Vārua Maita’i ».¹⁵

Te fā faufa’a roa a’e ’e te ha’amaita’ira’a hōpe’a o te fa’afāriura’a hōhonu ’e te pāpū, ’o te fāri’ira’a ïa ma te ti’amā i te mau fafaura’a ’e te mau ’ōro’a o te ’ē’a o te fafaura’a.¹⁶

Tē ti’aturi nei mātou ia ’outou ’ia ’āpo’o ’āmui ’e ’ia ’imi i te heheura’a nō te fa’a’ohipara’a i teie mau tauira’a—’eiaha rā e hi’o i ō atu i te tāpa’o ’aore rā, e tāmata i te fa’ature i te ta’ata ’aore rā, i te ’utuāfare. E hōro’ahia atu te tahi atu mau ha’amāramaramara’a i roto i te mau tureiara’a i muri nei, mai te rata a te Peresidenira’a Mātāmua.

Tē fa’a’ite pāpū atu nei au ia ’outou ē, i roto i te fa’aotira’a a te ’āpo’ora’a a te Peresidenira’a Mātāmua ’e te Tino Ahuru Ma Piti ’āpōsetolo i roto i te hiero, ’e i muri a’e i tō tō tātou peropheta here tāparura’a i te Fatu nō te heheura’a ’ia haere i mua i roto i teie mau tauira’a, ’ua fāri’i te tā’āto’ara’a i te hō’ē ha’apāpūra’a pūai. ’O Russell M. Nelson tō tātou peresideni ’e te peropheta ora. E fa’atupu te mau fa’aarara’a i hōro’ahia i teie mahana, i te mau ha’amaita’ira’a rahi nō te feiā o te fāri’i poupou i te mau tauira’a ’e ’o te ’imi i te arata’ira’a a te Vārua Maita’i. E fātata roa atu ā tātou i tō tātou Metua i te Ao ra ’e i tō tātou Fatu e Fa’aora, o Iesu Mesia, o vau ho’i tōna ’ite pāpū. I te i’oa o Iesu Mesia, ’āmene.