ʼA tāmata, ʼa tāmata, ʼa tāmata
Nā te peresideni Henry B. Eyring
Tauturu piti i roto i te Peresidenira’a Mātāmua
Tē tuʼu nei te Faʼaora i tōna ra iʼoa i roto i tō ʼoutou ʼāʼau. ʼE tē ʼite nei ʼoutou i te hinaʼaro mau o te Mesia nō vetahi ’ē ʼe nō ʼoutou iho.
E a’u mau taea’e ’e a’u mau tuahine, tē māuruuru nei tōʼu ʼāʼau ʼia paraparau atu ia ʼoutou. ʼUa riro teie ʼāmuiraʼa ʼei faʼaitoitoraʼa ʼe ʼei haʼapūairaʼa iāʼu. ʼUa fa’aōhia te hīmene i hīmenehia mai ’e te mau parau tei aʼohia mai i roto i tō tātou ʼāʼau nā te Vārua Maitaʼi. Tē pure nei au ē te mea tāʼu e parau atu e ʼāfaʼihia atu ïa te reira ia ʼoutou nā taua iho Vārua ra.
E rave rahi mau matahiti i māʼiri aʼe nei, e tauturu mātāmua vau nō te hōʼē peresideni mataeinaʼa i te pae hitiaʼa o te rā nō te fenua Marite. Hau atu i te hōʼē taime, ’a tere ai māua i tō mātou mau ʼāmaʼa iti, e parau mai ʼoia iāʼu, « e Hal, ʼia fārerei anaʼe tāua i te mau taʼata, e mai te mea ē e ʼite tāua e tē fifi ra rātou, ʼua tano ïa tāua i te rahiraʼa o te taime ». ’Ua tano ’oia, ʼua haʼapiʼi ato’a mai rā vau nā roto i te mau matahiti i muri mai ē, e mea ha’ehaʼa roa tāna hiʼoraʼa. I teie mahana, tē hinaʼaro nei au ’ia faʼaitoito ia ʼoutou i roto i te mau peʼapeʼa tā ʼoutou e faʼaruru nei.
ʼUa faʼanahohia tō tātou oraraʼa tāhuti e te hōʼē Atua here ʼia riro ʼei hōʼē tāmataraʼa ʼe ’ei tumu nō te tupuraʼa nō tātou tātaʼitahi. Tē haʼamanaʼo nei ʼoutou i te mau parau a te Atua nō niʼa i tāna mau tamariʼi i te hāmaniraʼahia o te ao nei : « E tāmata tātou ia rātou i reira e ʼia ʼite tātou ē, e haʼapaʼo ānei rātou i te mau mea atoʼa tā te Fatu tō rātou Atua e faʼaue ia rātou ra ».1
Mai te haʼamataraʼa o te ao ʼe ʼere te mau tāmataraʼa i te mea ʼōhie. Tē faʼaruru nei tātou i te mau tāmataraʼa nō te fāriʼiraʼa i te mau tino tāhuti nei Tē ora pāʼātoʼa nei tātou i roto i te hōʼē ao i reira te tāmaʼi a Sātane nō te parau mau ʼe nō tō tātou iho ʼoaʼoa i te riroraʼa ʼei mea ʼūʼana roa atu. E au ra te ao nei ʼe tō ʼoutou iho oraraʼa te rahi noa atu i te ʼāhuehura’a.
’O teie tā’u haʼapāpūraʼa : Te Atua here tei faʼatiʼa i teie mau tāmataraʼa nō ʼoutou ʼua faʼataʼa atoʼa ʼoia i te hōʼē rāveʼa pāpū nō te faʼaʼoromaʼi i te reira. Nō te aroha o te Metua i te Ao ra i tō te ao i tono mai ai ʼoia i tāna Tamaiti Here nō te tauturu ia tātou.2 ʼUa hōroʼa tāna Tamaiti, o Iesu Mesia, i tōna ora nō tātou. ʼUa amo Iesu Mesia i Getesemane ʼe i niʼa i te sātauro i te māuiui nō tā tātou atoʼa mau hara. ʼUa ʼite ʼoia i te mau ʼoto ato’a, te mau māuiui atoʼa ʼe te mau hotu nō tā tātou mau hara ’ia nehenehe iāna ’ia tāmahanahanaha ʼe ʼia haʼapūai ia tātou nā roto i te mau tāmataraʼa atoʼa i roto i te oraraʼa nei.3
Tē haʼamanaʼo nei ʼoutou i tā te Fatu i parau atu i tāna mau tāvini
« ’Ua hōʼē o vau ʼe te Metua. Tei roto vau i te Metua ʼe tei roto te Metua iāʼu nei ʼe nō te mea ʼua fāriʼi mai ʼoutou iāʼu, tei roto ïa ʼoutou iāʼu nei ʼe tei roto hoʼi au ia ʼoutou na.
Nō reira tei rotopū ïa vau ia ’outou na, ’e ’o vau nei ā te tīai māmoe maita’i, ’e te ’ōfaʼi hoʼi nō ’Īserā’ela ». ʼO ʼoia o te patu i niʼa i teie nei pāpā ra e ʼore roa ʼoia e hiʼa atu».4
ʼUa hōroʼa atoʼa mai tō tātou peropheta, peresideni Russell M. Nelson, i taua atoʼa haʼapāpūraʼa ra. Hau atu i te reira, ʼua faʼaʼite mai ʼoia i te hōʼē rāveʼa e nehenehe ai ia tātou ’ia pātu i niʼa i taua ʼōfaʼi ra ʼe ʼia tuʼu i te iʼoa o te Fatu i niʼa i tō tātou ʼāʼau nō te arataʼi ia tātou nā roto i tō tātou mau tāmataraʼa.
ʼUa parau ʼoia : « E riro paha ʼoutou i te hepohepo nō te tahi taime, ʼa haʼamanaʼo, e ʼaita te oraraʼa i ʼōpuahia ʼei mea ʼōhie. ʼIa amohia te mau tāmataraʼa ʼe ’ia faʼaʼoromaʼihia te māuiui nā niʼa i te ʼēʼa. ’Ia haʼamanaʼo anaʼe ʼoutou e ’aore roa hoʼi e mea e ʼore e tiʼa i te Atuaʼ (Luka 1:37), ’ia ’ite ē ’o ’oia tō tātou Metua. E tamāroa ʼaore rā e tamāhine ʼoutou i hāmanihia ’ia au i tōna ra hōhoʼa, e tiʼa ’ia fāriʼi i te heheuraʼa nō te tauturu ia ʼoutou i roto i tā ʼoutou mau ravera’a tano. E nehenehe ʼoutou e rave i niʼa iho ia ʼoutou te iʼoa moʼa o te Fatu. E nehenehe ʼoutou e aʼo i te iʼoa moʼa o te Atua (hiʼo PH&PF 1:20) ».5
Tē faʼahaʼamanaʼo mai nei te mau parau a te peresideni Nelson i te fafauraʼa tei ʼitehia i roto i te pure nō te ʼōroʼa, te hōʼē fafauraʼa tā tō tātou Metua i te Ao ra e rave faʼaoti ’ia rave anaʼe tātou i te mea tā tātou i fafau atu.
ʼA faʼaroʼo na i te mau parau : « E te Atua, te Metua Mure Ore, tē ani atu nei mātou ia ʼoe nā roto i te iʻoa o tō Tamaiti o Iesu Mesia, e haʼamaitaʼi mai ʼe e haʼamo’a mai i teie nei pāne nā te mau vārua atoʼa o te rave mai nei, ʼia ʼamu rātou i te reira mai te haʼamana’o i te tino o tō Tamaiti ra, ʼe ʼia faʼaʼite rātou ia ʼoe, e te Atua, te Metua Mure ʼOre, e tiʼa ia rātou i te rave i te iʻoa o tō Tamaiti i ni’a iho ia rātou, ʼe i te haʼamanaʻo ā iāna ʼe a muri noa atu, ma te haʼapaʼo maitaʼi i tāna mau faʼaue tāna i tuʼu mai ia rātou ʼia vai noa tōna vārua i roto ia rātou ʼe a muri noa atu. ʼĀmene.6
I te mau taime atoʼa e parau ai tātou i te parau ’āmen e ʼia pupu-anaʼe-hia taua pure nō tātou, tē fafau ra ïa tātou ē nā roto i te ʼamuraʼa i te pāne ʼua tiʼa ia tātou i te rave i niʼa iho ia tātou te iʼoa moʼa o Iesu Mesia, ʼia haʼamanaʼo noa ā iāna, ʼe ʼia haʼapaʼo i tāna ra mau faʼaue. I muri mai, ʼua fafauhia mai ia tātou ē e vai noa mai tōna Vārua i roto ia tātou. Nō teie mau fafauraʼa, ʼua riro te Faʼaora ʼei ’ōfaʼi niʼa i te reira e nehenehe ai ia tātou e tiʼa atu ma te pāruruhia ’e ma te fē’a’a ’ore i roto i te mau vero atoʼa tā tātou e faʼaruru atu.
’A feruri hōhonu ai au i te mau parau nō te fafauraʼa ʼe te mau haʼamaitaʼiraʼa tei fafauhia mai, ʼua ui au e aha ra te auraʼa ’ia ineine i te rave i niʼa iho ia tātou i te iʼoa o Iesu Mesia.
Tē fa’ata’a nei te peresideni Dallin H. Oaks : « E mea faufaʼa ’ia ’ite ē, ’ia rave anaʼe tātou i te ʼōroʼa, ’aita tātou e faʼaʼite nei ē tē rave nei tātou i niʼa iho ia tātou i te iʼoa o Iesu Mesia. Tē faʼaʼite nei rā tātou ē ʼua tiʼa ia tātou i te rave i te reira. (Hi‘o PH&PF 20:77.) Te mea hoʼi ē tē faʼaʼite noa nei tātou i tō tātou hina’aro ē e tiʼa i te tahi mea ’ia tupu mai hou ’a rave mau ai tātou i taua iʼoa moʼa ra i niʼa iho ia tātou i roto i te auraʼa faufaʼa rahi mau ».7
Te parau mai ra te faʼahitiraʼa parau ē ʼua « tiʼa ia tātou i te rave i niʼa iho ia [tātou] » tōna i’oa, tē parau mai ra ē ’a rave ai tātou i tōna iʼoa i te taime mātāmua ʼa bāpetizohia ai tātou, ʼaita ïa te raveraʼa i tōna iʼoa i hope i te bāpezitoraʼa. E tiʼa ia tātou ʼia haʼa tāmau noa i te rave i tōna iʼoa i te roaraʼa o tō tātou oraraʼa, ’oia ato’a ’ia faʼaʼāpī ana’e tātou i te mau fafauraʼa i te ʼiri nō te ʼōroʼa ʼe ’a rave ai tātou i te mau fafauraʼa i roto i te mau hiero moʼa a te Fatu.
Nō reira teie nā uiraʼa faufaʼa rahi e piti i riro ai nō tātou tātaʼitahi « E aha te mea e tiʼa iāʼu ’ia rave nō te rave i tōna iʼoa i niʼa iho iāʼu ? » ʼe « Nāhea vau e ʼite ai e te haere ra vau i mua ? »
’Ua hōroʼa mai te faʼahitiraʼa parau a te peresideni Nelson i te hōʼē pāhonoraʼa nō te tauturu. ʼUa parau ʼoia ē e nehenehe tā tātou e rave i te iʼoa o te Faʼaora i niʼa iho ia tātou ’e e nehenehe tātou e parau nōna. ʼIa parau anaʼe tātou nōna, tē tāvini ra ïa tātou iāna. « Nāhea e ’ite ai te hō’ē ta’ata i te fatu ’aore ā i tāvinihia e āna ra, ’e tei vai ta’ata ’ē ra iāna, ’e tei te ātea ’ē te mau mana’o ’e te mau ’ōpuara’a o tōna ra ’ā’au ? »8
Te paraura’a nōna tītauhia te hō’ē pure nō te fa’aro’o E tītauhia te hōʼē pure ʼūʼana i te Metua i te Ao ra nō te ’apo mai e aha te mau parau tā tātou e nehenehe e parau nō te tauturu i te Faʼaora i roto i tāna ʼohipa. E tiʼa ia tātou ʼia fa’ata’ahia nō te fafauraʼa : « Nā roto i tō’u iho reo ’e ’aore rā, nā roto i te reo o tā’u mau tāvini, hō’ē ā ïa ».9
Teie rā e tītau-rahi-hia i te parau noa nōna nō te raveraʼa i tōna iʼoa i niʼa iho ia tātou. Tē vai nei te mau manaʼo i roto i tō tātou ʼāʼau e tiʼa ia tātou ’ia fa’ata’ahia nō te riro ʼei mau tāvini nāna.
ʼUa faʼaʼite mai te peropheta Moromona i te mau manaʼo o te faʼataʼa ’e o te fa’ati’a ia tātou ’ia rave i tōna ra iʼoa i niʼa iho ia tātou. I roto i teie mau manaʼo tē vai ra te faʼaroʼo, te tiʼaturi, ʼe te aroha, ʼoia hoʼi te hina’aro mau i te Mesia.
ʼUa haʼamāramarama mai Moromona
« Tē manaʼo nei hoʼi au ē e faʼaroʼo tō ʼoutou i te Mesia nō tō ʼoutou ha’ehaʼa ’āhiri hoʼi ʼaita o ʼoutou e faʼaroʼo iāna, ʼaita atoʼa ʼoutou e au ʼia taiʼohia i rotopū i te feiā o tāna ʼēkālesia.
« ’E teie nei, e au mau taea’e here, e parau atu vau ia ’outou i te tīa’i ra E nāhea ʼoutou i te roaʼaraʼa te faʼaroʼo, maori rā o te tīaʼi atoʼa tō ʼoutou ?
« ’E e aha tā ʼoutou e tīa’i ra ? Inaha, tē parau atu nei au ia ’outou, e tīa’i outou ’ia faʼati’ahia ʼoutou i te ora mure ʼore nā roto i te tāraʼehara a te Mesia, ʼe te mana o te ti’afaʼahouraʼa, ʼe teie, nō tō ʼoutou faʼaroʼo iāna mai te au i tei parauhia mai ra.
« Nō reira, e faʼaroʼo tō te taʼata, ’ia roaʼa atoʼa te tīa’i iāna e ti’a ai ; ʼaita ho’i e faʼaroʼo ʼaita atoʼa e tīa’i.
« E inaha, e parau atu vau ia ʼoutou ē, e ʼore e roaʼa te faʼaroʼo ʼe te tīaʼi ia ʼoutou maori rā ʼo te ha’ehaʼa ʼe te marū te ʼāʼau.
« ʼĀhiri i nā reira, ʼua riro tōna faʼaroʼo ʼe tōna tīaʼi ʼei mea faufaʼa ʼore, ʼaore hoʼi te taʼata e ʼitehia i mua i te Atua, maori rā ʼo te marū ʼe te ha’ehaʼa te ʼāʼau ; ʼe ʼo te marū ʼe te ha’ehaʼa te ʼāʼau, ʼe te faʼi ʼoia nā te mana o te Vārua Maitaʼi ē, ’o Iesu ʼo te Mesia ïa, ’ia vai atoʼa te aroha i roto iāna e ti’a ai ; ʼaita hoʼi ʼōna e aroha e au ʼoia i te ’aore ; nō reira ia tupu tōna aroha e ti’a ai
I muri aʼe i te tātararaʼa i te parau nō te aroha, ʼua tāmau Moromona i te parau :
« ’O te aroha rā, ’o te hina’aro mau ïa i te Mesia, e ’ore roa ïa e mou ; ’e ’o te ’itea te aroha i roto iāna i te mahana hope’a ra, e maitai ïa tōna.
Nō reira, e au mau taeaʼe here, e pure atu i te Metua ma te pūai hope o te ʼāʼau ia ’ī ʼoutou i teie nei aroha, ’o tāna i hō mai i te taʼata atoʼa e peʼe mau i tāna tamaiti ia Iesu Mesia, ’ia riro ʼoutou ʼei tamariʼi nā te Atua, ’e ʼia fā mai ʼoia ra ʼua riro tātou mai iāna ra te huru e ʼite hoʼi tātou iāna i tōna ra huru mau, ʼe ʼia vai māite ā teie nei tīaʼiraʼa i roto ia tātou, ē ’ia tamāhia hoʼi tātou atoʼa mai iāna i mā. ʼĀmene ».10
Tōʼu ʼiteraʼa pāpū ’oia ho’i tē tuʼu nei te Faʼaora i tōna iʼoa i roto i tō ʼoutou ʼāʼau. Nō ʼoutou e rave rahi, te mara’a nei tō ʼoutou faʼaroʼo iāna. Tē ʼite rahi nei ʼoutou i te tiʼaturiraʼa ’e te ʼanaʼanatae. ʼE tē ʼite nei ʼoutou i te hinaʼaro mau i te Mesia nō vetahi ʼe nō ʼoutou iho.
Tē ʼite nei au i te reira i roto i te mau misiōnare e tāvini nei nā te ao atoʼa nei. Tē paraparau nei te mau melo i tō rātou mau hoa ʼe te mau melo nō te ʼutuāfare nō niʼa i Te ʼĒkālesia a Iesu Mesia i te Feiā Moa i te mau Mahana Hopeʼa Nei. Tē aupuru nei te mau tāne, te mau vahine, te feiā ʼāpī ʼe tae noa atu te mau tamariʼi ma te here nō te Faʼaora ʼe nō tō rātou mau taʼata tupu.
I te parau faʼaʼite mātāmua nō niʼa i te mau ʼati nā te ao atoʼa nei, ʼua rave te mau melo i te mau ʼōpuaraʼa nō te haere e faʼaora, i te tahi taime nā niʼa atu i te mau moana, ma te ani-’ore-hia. E mea fifi nō rātou i te tahi mau taime ʼia tīaʼi ’ia fāri’ihia mai rātou i te vāhi i ʼatihia.
Tē ʼite nei au ē tē manaʼo nei te tahi o ʼoutou ē tē haʼavīhia ra tō ʼoutou faʼaroʼo ʼe tō ʼoutou tiʼaturiraʼa nā tō ʼoutou mau fifi. E tē hiaʼai nei ʼoutou i te here.
E au mau taeaʼe ʼe au mau tuahine, tē vai nei te mau rāveʼa a te Fatu i pīhai iho ia ʼoutou nō te ʼite ʼe nō te faʼaʼite i tōna aroha. E nehenehe tā ʼoutou e pure ma te tiʼaturi i te Fatu nō te arataʼi ia ʼoutou ’ia aroha atu i te tahi taʼata nōna. E pāhono ʼoia i te mau pure a te mau taʼata ā’au marū e hōroʼa nei i tō rātou taime mai ia ʼoutou. E ʼite ʼoutou i te aroha o te Atua nō ʼoutou ʼe nō te taʼata tā ʼoutou e tāvini nei nōna. ʼA tauturu ai ʼoutou i te mau tamariʼi a te Atua i roto i tō rātou mau fifi, e au ra e mea māmā aʼe tō ʼoutou iho mau fifi. E haʼapūaihia tō ʼoutou faʼaroʼo ʼe tō ʼoutou tiʼaturiraʼa.
E taʼata ʼite mata vau nō taua parau mau ra. I roto i tōna oraraʼa, ʼua paraparau tāʼu vahine faʼaipoipo nō te Fatu ʼe ʼua tāvini i te mau taʼata nōna. Mai tā’u i fa’ahiti nā mua a’e, ʼua parau te hōʼē o tō māua ʼepisekōpo iāʼu i te hōʼē taime, « e maere au. I te mau taime atoʼa e faʼaroʼo vau i te parau nō te hōʼē taʼata i roto i te pāroita tei roto i te fifi, e haere vitiviti au e tauturu. I te taime e tae atu ai au, e au ra tei reira aʼena tā ʼoe vahine faʼaipoipo. E parau mau te reira i te mau vāhi atoʼa i reira māua i te orara’a, ʼua ʼora māua e 56 matahiti.
I teienei e nehenehe noa tāna e parau te tahi noa ma’a parau i te mahana. E fārereihia ʼoia e te mau taʼata tāna i here nō te Fatu. I te mau pō ʼe te mau poʼipoʼi atoʼa, e hīmene au i te mau hīmene e ʼona ʼe e pure māua. ʼO vau te reo i roto i te mau pure ’e te mau hīmene. I te tahi mau taime e nehenehe au e ’ite iāʼu ʼia hiʼo iāna ’ia parau hāmama i te vaha i te mau parau o te hīmene. Mea au nāna te mau hīmene a te mau tamariʼi. Te manaʼo tāna e au maitaʼi aʼe ʼua haʼapotohia i roto i te hīmene « Jésus-Christ est mon modèle ».11
I te tahi mahana ra, i muri aʼe i te hīmeneraʼa i te mau parau nō te hīmene : « ’A aroha i te tahi ’e te tahi mai ia Iesu i aroha ia ʼoutou. ʼA tāmata i te faʼaʼite i te maitaʼi i roto i te mau mea atoʼa tā ʼoutou e rave nei ʼua parau marū noa ʼoia, ma te pāpū rā, « ʼa tāmata, ’a tāmata, ’a tāmata », Tē manaʼo nei au ē e ʼite ʼoia, ʼia ʼite anaʼe ʼoia iāna, ē ʼua tuʼu tō tātou Faʼaora i tōna iʼoa i roto i tōna ʼāʼau ʼe ʼua riro mai ʼoia mai iāna ra te huru. Tē amo nei ʼoia iāna nā roto i tōna mau fifi i teienei, mai iāna e amo ia ʼoutou nā roto i tō ʼoutou mau fifi.
Tē faʼaʼite pāpū atu nei au ia ’outou ē i tōʼu ʼiteraʼa taʼā ʼē ’ua ʼite ʼe ’ua here te Faʼaora ia ʼoutou. ʼUa ʼite ʼoia i tō ʼoutou iʼoa mai ia ʼoutou i ʼite i tōna. ’Ua ’ite ’oia i tō ’outou mau fifi. ’Ua fa’aruru ’oia i te reira. Nā rotro i tāna tāraʼehara, ʼua upoʼotiʼa ʼoia i tō te ao. Nā roto i tō ʼoutou hina’aro mau ’ia rave i tōna iʼoa i niʼa iho ia ʼoutou, e tātara ʼoutou i te mau hōpoiʼa e rave rahi a te tahi mau taʼata e rave rahi E e ʼite ʼoutou ’ia tae i te tau mau ra ē ʼua ʼite maitaʼi aʼe ʼoutou i te Faʼaora ’e ʼua rahi atu tō ʼoutou here iāna. E fa’atumuhia tōna i’oa i roto i tō ʼoutou ʼāʼau ʼe i roto i tō ʼoutou feruriraʼa. ’O te i‘oa ’outou e pi’ihia ai. Tē faʼaʼite pāpū nei au i te reira, ma te māuruuru rahi nō tōna aroha hāmani-maitaʼi iāʼu, i te mau taʼata i herehia e au, ʼe ia ʼoutou, i te iʼoa o Iesu Mesia, ʼāmene.