I teienei te taime
Nā Elder Jack N. Gerard
Nō te Hitu ’Ahuru
Mai te mea tē vai ra te tahi mea i roto i tō ʼoutou oraraʼa e ti’a ia ʼoutou ʼia fēruri, teie ïa te taime.
E rave rahi mau matahiti i māʼiri aʼenei, ’a faʼaineine ai au nō te hōʼē tere ʼohipa, ʼua haʼamata vau i te ʼite i te māuiui i roto i te ʼouma. Nō tōna peʼapeʼa, ʼua faʼaoti aʼera tāʼu vahine faʼaipoipo i te ’āpeʼe iāʼu. I roto i te tuhaʼa mātāmua nō tō māua tere manureva, ʼua rahi roa te māuiui e ʼua fifi au i te hutiraʼa i te aho. I tō mātou tauraʼa, ʼua faʼaruʼe māua i te tauraʼa manureva ’e ʼua haere tiʼa atu māua i te fare maʼi, i reira, i muri aʼe e rave rahi mau hiʼopoʼaraʼa, ’ua parau mai te taote hiʼopoʼa e nehenehe tā māua e tāmau i tō māua tere.
ʼUa hoʼi atu māua i te tauraʼa manureva ʼe ’ua tere atu i tō māua tāpaeraʼa hopeʼa. ’A fātata ai mātou i te tau, ʼua paraparau mai ra te pairati nā roto i te ʼāfata parau ē ʼua ani mai iā’u ’ia faʼaʼite atu vau iāʼu iho. ʼUa haʼafātata mai ra te ihi reva, ma te parau mai ē ’ua fāriʼi iho nei rātou i te hōʼē piʼiraʼa rū ʼe ʼua parau mai ra iāʼu ē tē vai nei te hōʼē pere’oʼo nō te fare maʼi e tīaʼi mai ra i te tauraʼa manureva nō te faʼahoro atu ia māua i te fare maʼi.
ʼUa paʼuma aʼera māua i roto i te pere’oʼo nō te fare maʼi ʼe ʼua fa’ahoro rūhia atura māua i te piha rū o te fare maʼi. I reira, ʼua fārerei atu māua e piti nā taote peʼapeʼa rahi tō rāua ’o tei faʼaʼite mai ē ʼua hape te hiʼopoʼaraʼa i ravehia i niʼa iho iāʼu ’e e maʼi mau tōʼu i roto i te mahaha, ʼaore rā e toto paʼari, i roto i tōʼu nei mahaha, tei tiʼa i te rāpaʼauhia i te reira ihoa taime. ʼUa faʼaʼite mai te mau taote ia māua ē e rave rahi mau taʼata maʼi ’o te ’ore e ora mai i teie huru maʼi. Nō tō rāua ʼiteraʼa ē tei te ātea ’ē māua i te ʼutuāfare ʼe te pāpū ʼore mai te mea ʼua ineine māua nō taua mau tauiraʼa o te oraraʼa, ’ua parau te mau taote e mai te mea tē vai ra i roto i tō māua oraraʼa te tahi mea e tiʼa ia māua ’ia fēruri; teienei ïa te taime.
Tē haʼamanaʼo maitaʼi nei au ē i reira ihoa i roto i taua taime hepohepo ra ’ua taui roa te tāʼātoʼaraʼa o tōʼu nei hiʼoraʼa. Te mea tei riro e mea faufaʼa rahi roa tau minuti noa nā mua atu e mea faufaʼa ’ore ïa i teienei. ʼUa fa’aru’e vitiviti tōʼu feruriraʼa i te maitaʼi ʼe te mau ha’apeʼapeʼara’a nō teie nei oraraʼa nō tē huri ti’a atu i ni’a i te hōʼē hiʼoraʼa mure ʼore—te mau manaʼo nō te ʼutuāfare, te mau tamariʼi, tāʼu vahine faʼaipoipo, ʼe te hopeʼa te hōʼē hiʼopoʼaraʼa i tōʼu iho oraraʼa.
E aha ïa tō mātou huru ʼei ’utuāfare ʼe ʼei taʼata tātaʼitahi ? Tē ora ra ānei mātou i tō mātou oraraʼa ’ia au i te mau fafauraʼa tā mātou i rave ʼe te mau tītauraʼa a te Fatu, ʼaore rā tē faʼatiʼa nei mātou, ma te ʼōpua-ʼore-hia, i te mau peʼapeʼa nō teie nei ao ’ia faʼahahi ʼē atu ia mātou i taua mau mea faufaʼa rahi ra ?
E ani ïa vau ia ʼoutou ʼia fēruri i te hōʼē haʼapiʼiraʼa faufaʼa rahi tei haʼapiʼihia mai roto mai i teie ʼohipa tei tupu : ’Ia faʼaātea ’ē ia ’outou i te mau mea nō teie ao ʼe ʼia hiʼopoʼa i tō ʼoutou nei oraraʼa. ʼAore rā mai te mau parau a te taote, mai te mea tē vai ra te tahi mea i roto i tō ʼoutou oraraʼa e ti’a ia ʼoutou ʼia fēruri, teienei ïa te taime.
Hiʼopoʼaraʼa i tō tātou oraraʼa
Tē ora nei tātou i roto i te hōʼē ao tei ’ī roa i te haʼamāramaramaraʼa, e te rahi noa atura te mau faʼahahī-ʼē-raʼa ’o te haʼafifi ia tātou ’ia fa’aātea ’ē i te ʼāhuehue o teie nei oraraʼa ’e ’ia faʼatumu i niʼa i te mau mea faufaʼa mure ʼore. ’Ua fa’ao’ō’ohia tō tātou oraraʼa i te mauʼohipa e haru i tō tātou mau mata ’o tē hōhorahia mai nā roto i te mau rāveʼa ʼāpī tāuiui noa nō teie nei tau.
ʼIa ʼore anaʼe tātou e rave i te taime nō te feruri, eʼita paha tātou e ʼite i te pūai o teie huru fa’anahora’a i ni’a i tō tātou oraraʼa i te mau mahana atoʼa ʼe te mau māʼitiraʼa tā tātou e rave. E ʼite paha tātou i tō tātou oraraʼa tei ’ī i te mau parau ʼāpī tei puʼohuhia i roto i te mau ʼmemeʼ, te mau video ʼe te mau parau faʼatiʼaniraʼa ʼanaʼana. Nōa atu tō rātou hiʼoraʼa faʼaʼanaʼanatae ʼe te faʼarearea, te rahiraʼa o teie mau mea ʼaita ïa e tuʼatiraʼa i te parau nō tō tātou haereraʼa mure ʼore i mua, ʼe te faʼataui nei rātou i tō tātou hiʼoraʼa i tō tātou oraraʼa tāhuti nei.
E nehenehe teie mau faʼahahi-ʼē-raʼa a tō te ao e faʼaauhia i te mau faʼahahi-’ē-raʼa i roto i te moemoeā o Lehi. ʼA haere ai tātou nā niʼa i te ʼēʼa nō te fafauraʼa ma tō tātou rima e tāpeʼa māite i te mea ʼauri, tē faʼaroʼo nei ʼe te ʼite nei tātou i taua mau taʼata ra « e tāhitohito mai ra ’e te toro mai ra i tō rātou mau manimani rima » mai te fare rahi mai ʼe te ʼāʼano ra (1 Nephi 8:27). Eʼita paha tātou e ʼōpua i te rave i te reira, e faʼafa’aea rā tātou i te tahi mau taime nō te hiʼo e aha rā teie ʼāhuehue rahi. E faʼaru’e paha te tahi o tātou i te mea ʼāuri nō te tāpiri atu nō te hiʼo maitaʼi aʼe. E hahi ʼē atu paha te tahi nō te « mau taʼata e tāhitohito nei ia rātou » (1 Nephi 8:28).
ʼUa faʼaara mai te Fa’aora ia tātou ʼia « ara… ’o tei teimaha ʼoutou ’e te… peʼapeʼa o teie nei ao » (Luka 21:34). Tē faʼahaʼamanaʼo mai nei te heheuraʼa ʼāpī ia tātou ē e rave rahi te parauhia, ʼāre’a rā ʼaita reʼa te māʼitihia. ʼAita rātou e māʼitihia « ʼua faʼatumuhia atu tō rātou mau ʼāʼau… i niʼa i te mau mea nō teie nei ao, ʼe te tītau nei rātou i te mau faʼaturaraʼa o te taʼata » (Te Parau Haʼapiʼiraʼa ’e te mau Parau Fafau 121:35 ; hi’o ato’a ’īrava 34). E hōroʼa mai te hiʼopoʼaraʼa i tō tātou oraraʼa i te hōʼē rāveʼa ’ia fa’aātea ʼē ia tātou i te mau mea nō te ao nei, ʼia feruri i hea tātou i te tiʼaraʼa i niʼa i te ʼēʼa nō te fafauraʼa, ʼe, mai te mea e tītauhia, ’ia rave i te mau faʼatitiʼaifaroraʼa nō te haʼapāpū i te hōʼē tāpeʼaraʼa pāpū ʼe te hiʼoraʼa i mua.
ʼAita i maoro aʼenei, i roto i te hōʼē pureraʼa nā te feiā ʼāpī nā te ao atoʼa nei, ʼua ani te peresideni Russell M. Nelson i te feiā ʼāpī ’ia fa’aātea ʼē ia rātou i te mau mea nō te ao nei, ’ia vaiiho i te mau rāve’a sōtiare, nā roto i te raveraʼa i te hōʼē haʼapaeraʼa i te reira e hitu mahana te maoro. I nā pō ra, ’ua ani ’oia hō’ē ā tītaura’a i te mau tuahine i roto i te putuputura’a a te mau vahine. ʼUa ani ʼoia i muri iho ia rātou ʼia hiʼo i te mau taʼa-ʼē-ra’a i roto i tō rātou huru, te mea tā rātou e feruri, ʼaore rā nāhea rātou ’ia feruri. ʼUa ani ʼoia ia rātou i muri iho « īa rave i te hōʼē hiʼopoʼaraʼa hōhonu i tō rātou oraraʼa ’e te Fatu… nō te haʼapāpū ē ʼua tanu-māite-hia tō rātou ʼāvae i niʼa i te ʼēʼa nō te fafauraʼa ». ʼUa faʼaitoito ʼoia ia rātou ē mai te mea tē vai ra te mau mea i roto i tō rātou oraraʼa e tiʼa ’ia tauihia, « teie ïa te mahana te taime maitaʼi roa nō te taui ».1
Nā roto i te hiʼopoʼaraʼa i te mau mea i roto i tō tātou oraraʼa e tiʼa ’ia tauihia, e ui paha tātou ia tātou iho i te hōʼē uiraʼa taʼa ʼē : Nāhea tātou e tiʼa ai i niʼa atu i te mau faʼahahi-ʼē-raʼa o teie nei ao ʼe ’ia vai faʼatumu noa i niʼa i te ʼōrama nō te ora mure ʼore i mua ia tātou ?
I roto i te hōʼē ʼaoraʼa i roto i te ʼāmuiraʼa i te matahiti 2007 tei topahia « Maitaʼi, maitaʼi aʼe, e maitaʼi roa aʼe », ʼua haʼapiʼi mai te peresideni Dallin H. Oaks nāhea i te tuʼu i mua roa te mau tītauraʼa e rave rahi a tō te ao nei. ʼUa aʼo mai ʼoia, « e mea ti’a ia tātou ʼia haʼapae i te tahi mau mea maitaʼi, ’ia nehenehe tātou ʼia mā‘iti i te tahi atu mea maitaʼi a’e, ’aore rā maitaʼi roa a’e, nō te mea, e faʼahotu te reira i te faʼaroʼo i te Fatu ia Iesu Mesia, ʼe e haʼapūai te reira i tō tātou mau ʼutuāfare ».2
Tē parau atu nei au ē te mau mea maitaʼi roa aʼe i roto i teie nei oraraʼa ʼua haʼamauhia ïa i niʼa ia Iesu Mesia ʼe te ʼiteraʼa i te mau parau mau mure ʼore nō niʼa iāna ʼe o vai tātou i roto i tō tātou auraʼa iāna.
’Imi i te Parau mau
ʼA ’imi ai tātou i te ʼite i te Faʼaora, ’eiaha tātou e haʼapae i te parau mau tumu ’o vai rā tātou ʼe nō te aha tātou i haere mai ai i ’ō nei. Tē faʼahaʼamanaʼo mai nei Amuleka ia tātou ē « tei teie nei oraraʼa te taime … ʼia faʼaineine ʼia fārerei i te Atua », te taime « tei hōroʼahia mai ʼia faʼaineine nō te tau mure ʼore ra » (Alama 34:32-33). Mai tā te parau paʼari mātau-maitaʼi-hia i faʼahaʼamanaʼo mai ia tātou, « e ʼere tātou i te mau taʼata i te tino nei e ʼite ra i te hōʼē ʼohipa vārua. E mau taʼata vārua tātou e ’ite ra i te hōʼē ʼohipa i te tino nei ».3
E mea faufaʼa te taʼaraʼa i tō tātou mau tupuraʼa hanahana nō tō tātou haereraʼa mure ʼore i mua ʼe e nehenehe te reira e faʼatiʼamā ia tātou i te mau hahi-ʼēʼ-raʼa nō teie nei oraraʼa. ʼUa haʼapiʼi te Faʼaora:
« I mau māite ʼoutou i tāʼu parau, e pipi ïa ʼoutou nāʼu i reira ;
« E ʼite ïa ʼoutou i te parau mau, ʼe nā te parau mau ʼoutou e faʼati‘amā » (Ioane 8:31-32).
ʼUa parau te peresideni Joseph F. Smith, « te faʼaotiraʼa rahi roa a’e tā te taʼata e nehenehe e rave i roto i teie nei ao, o te haʼamātau-pāpū-maitaʼi-raʼa ïa i te parau mo’a, ’ia ʼore te hi’ora’a ʼaore rā, te huru o te tahi noa atu mea ora i te ao nei e haʼafāriu ʼē ia rātou i te ʼite i roaʼa ia rātou ra ».4
I roto i te ao i teie nei mahana, ʼua raʼehia te ʼaimārōraʼa nō niʼa i te parau mau i te fāito fiva, tē parau nei nā te mau pae atoʼa i te parau mau mai te mea ra e manaʼo te reira tei matara i te tātararaʼa a te taʼata tātaʼitahi. ʼUa ʼite Iosepha Semita te tamaiti ʼāpī « i taua taime ’āhuehu rahi ra » i roto i tōna iho oraraʼa « … e mea fifi roa ʼia ʼite pāpū o vai tei tiʼa ʼe o vai tei hape » (Iosepha Semita—ʼĀʼamu 1:8). « I roto i taua mau ’aroraʼa parau ra ʼe te māniania nō te faʼaʼiteraʼa i te manaʼo » i tītau ai ʼoia i te arataʼiraʼa nō te raʼi i te ʼimiraʼa i te parau mau (Iosepha Semita—ʼĀʼamu 1:10).
I te ʼāmuiraʼa rahi nō ʼĒperēra, ʼua haʼapiʼi te peresideni Nelson, « mai te peu tē vai ra te ti’aturi e tīti’a i teie naho’a reo ’e te mana’o hōhonu o te ta’ata e ’aro ra i te parau mau, e tītauhia ’ia ha’api’i tātou nāhea i te fāri’i i te heheura’a ».5 E tiʼa ia tātou ʼia haʼapiʼi i te tiʼaturi i te Vārua nō te Parau Mau, « o te ʼore e fāriʼihia mai e te ao nei ra, nō te mea ʼaore i hiʼo iāna, ʼaore hoʼi i ʼite iāna » (Ioane 14:17).
ʼA nuʼu vitiviti ai teie nei ao nō te mau ʼohipa ta’a ʼē, e tiʼa ia tātou ʼia haʼamanaʼo i te mau parau a Iakoba « e parau mai te Vārua i te parau mau, ’eiaha i te parau haʼavare. E nō reira, i parau ai ïa i te huru mau o te mau mea e vai nei, ʼe te huru mau hoʼi o te mau mea e vai i muri nei ; ʼe nō te ora o tō tātou mau vārua i faʼaʼite-pāpū-hia ai teie nei mau mea ia tātou nei » (Iakoba 4:13).
ʼIa faʼaātea ʼē tātou ia tātou i te mau mea o te ao nei ’e ʼia hiʼopoʼa tātou i tō tātou oraraʼa, teie ïa te taime nō te feruri e aha te mau tauiraʼa e tiʼa ia tātou ʼia rave. E nehenehe tā tātou e tiʼaturi rahi i te ʼiteraʼa ē ʼua ’īriti fa’ahou tō tātou Hiʼoraʼa Maita’i ’o Iesu Mesia i te hōʼē taime i te ʼēʼa. Hou tōna poheraʼa ’e te tiʼafaʼahouraʼa, ’a haʼa ai ʼoia nō te tauturu i te mau taʼata nā pīha’i iho iāna ʼia māramarama i tāna ʼohipa hanahana, ʼua faʼahaʼamanaʼo ʼoia ia rātou ē « ’ia hauhia tō ʼoutou iāʼu nei. E pohe tō ’outou i teie nei ao. E fa’aitoito rā, ’ua riro te rē o teie nei ao iā’u » (Ioane 16:33). Tē fa’a’ite pāpū nei au nōna nā roto i te i‘oa o Iesu Mesia ra, ’āmene