Daghan Kaayo Ko og Angay nga Makat-unan mahitungod sa Pagkapari [Priesthood]
Isip usa ka batan-ong babaye ug dayon usa ka misyonaryo, nahinumdom ko nga naghunahuna kon ang piho nga mga bersikulo sa mga kasulatan magamit ba nako isip usa ka babaye, ilabi na niadtong nagpasabut sa misyonaryo nga buhat ug sa pagkapari. Karon sa akong nagkalain-laing mga tawag sa Simbahan ug isip usa ka magtutudlo sa relihiyon, ang uban nangutana kanako og susama nga mga pangutana mahitungod kon sa unsa nga paagi ilang magamit ang pagkapari.
Sama sa akong gisulat sa akong artikulo sa pahina 34, ang mga lider sa Simbahan sa miaging pipila ka tuig mihangyo sa mga miyembro sa pagsabut og maayo sa pagkapari. Si Presidente Russell M. Nelson misulti sa iyang kabalaka nga “daghan ra kaayo sa atong mga kaigsoonan ang wala kaayo makasabut sa konsepto sa gahum ug katungod sa pagkapari [priesthood].”1
Ang panultihon tinuod nga ang “impormasyon makadasig og inspirasyon.” Samtang ako nagtuon sa pagkapari ug mitudlo sa mga estudyante sa unibersidad mahitungod niini, wala lang ako makaamgo kon unsa ka gamay ang akong nahibaloan apan ang akong hunahuna ug kasingkasing naabli usab ngadto sa mahangturong mga kamatuoran kabahin sa pagkapari.
Manghinaut ko nga samtang kamo makat-on og dugang mahitungod sa pagkapari niini nga isyu, makasabut kamo nga ang atong Langitnong mga Ginikanan nagtinguha sa pagpanalangin kanato uban sa pagkapari ug nga ang mga propeta sa ulahing mga adlaw nanghangyo kanato sa pagpahimulos niini nga mga pribilehiyo—tingali ilabi na niadtong gihatag ngadto sa takus nga mga lalaki ug mga babaye sa templo.
Matinuoron,
Barbara Morgan Gardner