Mga Hulagway sa Hugot nga Pagtuo
Jason ug Jackie Wong
Hong Kong, China
Sila si Jason ug Jackie nasayud sa kaimportante nga magkaduol isip magtiayon. Nasayud usab sila nga importante nga makaduol sila sa Dios. Kanunay nga pag-ampo nakapalig-on ug nakapanalangin sa ilang kaminyoon.
Bisan sa nagkapuliki nila nga mga iskedyul, sila si Jason ug Jackie misiguro nga sila makagahin og panahon sa gabii sa pagbasa sa mga kasulatan.
Human sa iyang misyon, si Jason nahimong dili na kaayo aktibo sulod sa duha ka tuig. Sa pagbalik ngadto sa kalihokan sa Simbahan, iyang nahimamat si Jackie, usa ka bag-ong kinabig, sa komperensya sa young single adult. “Siya nakapausab sa akong kinabuhi,” miingon si Jason, “tungod kay akong gibati nga ako kinahanglang mahimong mas maayo nga ehemplo.”
Ang mga opinyon bahin sa managlahi nga mga tahas sa mga lalaki ug mga babaye nagkalahi kaayo sa lain-laing kultura, apan ang mga hagit nga magkahiusa isip bag-ong kinasal ingon og pareha ra. Sila si Jason ug Jackie nakat-on og pipila ka importante nga mga leksyon samtang sila nagtambayayong.
Leslie Nilsson, litratista
Jason:
Miyembro ko sa akong tibuok kinabuhi, apan human sa akong misyon, dihay mga duha ka tuig nga dili ko kaayo aktibo. Gisugdan nako sa pagpaaktibo ang akong kaugalingon duha ka tuig na ang milabay. Atol niining panahona, akong nahimamat ang akong asawa, si Jackie, sa komperensya sa young single adult usa ka bulan human siya mabunyagi. Nausab niya ang akong kinabuhi tungod kay akong gibati nga ako kinahanglang mahimong mas maayo nga ehemplo.
Sa dihang naminyo na mi, akong nahibaloan nga bisan sa usa ka gamay nga panimalay sama sa amoa, adunay daghang mga butang nga buhaton. Dili ninyo mahunahuna unsa kadaghan ang buluhaton! Sa sinugdanan, wala kaayo ko motabang. Ginagmay nga mga butang ang akong gihimo, apan si Jackie maoy naghimo sa kadaghanan sa trabaho. Mapinanggaon ug manggihatagon kaayo siya. Usa ka adlaw siya gihasulan, ug ako miingon, “Unsay problema?”
Nagtubo ko nga naghunahuna nga ang mga babaye mao ang mobuhat sa tanang buluhaton sa balay. Dali akong nakat-on nga kana dili mahimo. Si Jackie nagkapuliki ug adunay daghang buluhaton sa iyang trabaho. Samtang ako usab adunay daghang problema, nakaamgo ko nga ako kinahanglan nga mosugod sa pagtabang.
Nagsugod ko sa pagpanilhig sa salog ug paghugas sa mga plato. Dayon nakat-on ko unsaon sa paggamit sa washing machine. Nagbutang ko og mubo nga mga sulat aron ko makahinumdom. Seryoso ko! Duna koy sticker aron makahibalo ko kon unsa nga sabon ang gamiton. Kining mga butanga karon nahimo na nakong naandan.
Nindot na sukad nagsugod ko sa pagbuhat niining mga butanga sa balay. Nakapalipay kini ni Jackie.
Jackie:
Ang pagkabag-ong kinasal usa ka kausaban. Sa tinuoray lang, ang Dios importante gayud kaayo sa among relasyon. Kon wala ang Dios, tingali nagbulag na mi!
Jason:
Sa sinugdanan sa among kaminyoon, pirme kong motan-aw sa social media gamit ang akong telepono o magsusi sa akong email. Dali kaayo kong makagamit sa telepono o computer.
Nakaamgo mi nga kinahanglan nga mogahin mi og panahon sa usag usa. Mao nga karon kaming duha ang mohimo sa buluhaton sa panimalay. Nakatabang kini kanamo nga mahuman, ug kami magkauban sa usag usa.
Jackie:
Naningkamot mi nga maggahin og panahon sa buntag nga magkauban, apan ang mga buntag busy kaayo.
Naningkamot usab kami sa paggahin og panahon sa gabii sa pagpakigsulti mahitungod sa among adlaw; dayon mag-ampo mi ug magbasa sa mga kasulatan sa dili pa matulog. Ang pagsunod sa ebanghelyo nakapanalangin sa among kaminyoon.