Nakasiguro Pag-usab sa Akong Bili
Ang pagkaila sa akong katigulangan nakahatag nako og kaisug sa pagpakigbatok sa akong espirituhanong mga gubat.
Paghulagway ni Alex Nabaum
Sa dihang nag-edad ko og 11 anyos, nalambigit ko sa pornograpiya. Kadtong usa ka higayon milambo ngadto sa mas dako nga problema nga nahimong labing dakong pakigbisog sa akong pagkatin-edyer. Sa dihang nagsugod na ko sa high school, mihunong na ko sa pornograpiya ug mipaingon sa Pag-ula ni Jesukristo. Bisan og nakasinati ko og milagro nga napapas ang kahugaw sa akong hunahuna, gibati gihapon nako ang dakong sala sa akong kasingkasing.
Niining higayuna, ang akong lola mipahulam nako sa sinulat nga autobiography sa inahan sa akong apohan nga si Thea. Sulod lang sa pipila ka adlaw gibati nako nga nakonektar ni Thea Martina Waagen (1883–1967). Ang amahan ni Thea subo nga namatay pipila ka bulan sa wala pa siya matawo, mao nga siya gipadako sa iyang biyuda nga inahan nga taga-Norway. Nagdako siya sa malisud nga pagkabutang, apan nalingaw siya sa pagpamupo og mga strawberry ug sa pagpatukar sa organ sa iyang lokal nga simbahan nga Lutheran. Ang inahan ni Thea naminyo pag-usab, ug sa tabang sa iyang ama-ama, mieskwela siya sa kolehiyo. Sa ulahing bahin sa kinabuhi, si Thea ug ang iyang pamilya nakabig ngadto sa Simbahan ug mibalhin ngadto sa Utah, USA. Dili sayon alang ni Thea ang sitwasyon. Siya ug ang iyang bana nagdiborsyo. Nakasinati siya og grabing kaguol ug malisud nga depresyon, apan siya nagpabilin—nga matinud-anon sa iyang pagpamatuod.
Samtang nailhan nako si Thea ug ang iyang pagpili nga mopadayon bisan sa kalisud, nahibulong ako sa tumang gugma nga nakahatag nako og kasiguroan sa akong bili ug nakatabang nako sa pagbuntog sa makaparalisar nga sala. Nakaamgo ko nga kon nakahimo siya sa malisud nga mga butang, mahimo usab nako.
Miadto ko sa LDS.org ug nangayo sa patriyarkal nga panalangin ni Thea. Natandog pa gayud ako sa dihang nabasa nako, “Ang binhi sa imong sabakan mobarug ug motawag kanimo nga bulahan uban sa mga babaye sa Zion.” Nakaamgo ko nga ang akong dakong pagtahud alang kaniya mao ang katumanan nianang yano nga kapahayag [sentence]. Ang gugma ni Thea nakatabang nga mamaayo ang sala sa akong kasingkasing ug mobati ang akong kasingkasing ngadto sa akong katigulangan. Mao kini ang akong unang saksi sa saad ni Elder David A. Bednar nga pinaagi sa pag-apil sa buhat sa family history, ako “panalipdan batok sa grabe nga impluwensya sa yawa” (“Ang mga Kasingkasing sa mga Anak Mobati,” Liahona, Nob. 2011, 27).
Gibati nako nga nadugangan ang akong kusog ug kaklaro sa akong kinabuhi samtang ako magpadayon sa pagpangita sa akong pamilya ug magkat-on sa ilang mga istorya. Pinaagi sa kanunay nga pag-apil sa mga kalihokan sa family history, gibati nako nga adunay daghang mga tawo nga mitabang nako sa akong pagpakig-away sa akong espirituhanong mga gubat. Makapuyo ko nga walay kahadlok tungod kay “sila nga uban kanato [atong katigulangan], labing daghan kay kanila nga anaa kanila [mga sumusunod ni Satanas]” (2 Mga Hari 6:16).
Bisan og wala nako makit-i ang liboan sa mga ngalan sa pamilya nga dad-on ngadto sa templo, akong nahibaloan ang mga istorya sa akong katigulangan ug nangita sa ilang mga pamilya pinaagi sa mabinantayong pagsiksik. Naggahin na ako og panahon sa paghinumdom sa ilang kinabuhi ug pagtahud sa ilang mga kabilin. Nasayud ko nga ako nalig-on ug napanalipdan batok ni Satanas sa dihang akong gipuno ang akong kinabuhi uban sa kahayag sa akong pamilya.