Pagpangita og mga Milagro sa Matag Adlaw nga Kinabuhi
Kon kita motan-aw sa kinabuhi gamit ang lente sa hugot nga pagtuo diha ni Jesukristo, ang atong mga mata mabukas ngadto sa daghang mga milagro sa atong palibut.
Unsa ang Usa ka Milagro?
Nasayud kitang tanan unsa ang usa ka milagro, di ba? Si Moises mibahin sa Pula nga Dagat. Ang Manluluwas miayo sa tawo nga buta. Usa ka babaye nga naayo gikan sa grabe nga sakit. Usa sa labing talagsaong mga milagro mao ang Pag-ula ni Jesukristo—walay milagro nga malungtaron sukad o gamhanan. Apan mao ba lamang kadtong mga matang sa mga kasinatian nga gikonsiderar nga mga milagro?
Si Presidente Dallin H. Oaks, Unang Magtatambag sa Unang Kapangulohan, miingon, “Daghang milagro nahitabo matag adlaw sa buhat sa atong Simbahan ug sa kinabuhi sa atong mga miyembro.”1 Apan kanus-a ang katapusang higayon nga kamo nakabalhin og bukid o nakakita og pipila ka isda ug pipila ka piraso sa pan nga liboan ang nakakaon? Kadaghanan kanato tingali wala makakita og bisan unsa sama niana. Sa unsa nga paagi nga ang pamahayag ni Presidente Oaks tinuod?
Sumala sa Bible Dictionary, ang mga milagro mao ang “mga pagpakita sa balaan o espirituhanon nga gahum.”2 Uban niana nga kahulugan, atong bukhon ang atong mga mata ngadto sa daghang mga milagro nga naglibut kanato—mga milagro nga tingali wala nato mamatikdi.
Makita gayud nato ang kamot sa Dios sa mga kinabuhi sa Iyang katawhan pinaagi sa mga milagro diha sa mga kasulatan. Apan makita usab nato ang Iyang espirituhanong gahum kon kita makadawat og tubag sa usa ka pag-ampo, makalig-on sa atong mga pagpamatuod, o makaangkon og kausaban sa kasingkasing.
Sa gihapon, adunay ubang mga milagro nga ingon og atong nalimtan: Ang adlaw misubang ug misalop matag adlaw; gagmay nga mga liso nga motubo ngadto sa dagko nga mga kahoy; ang daghang mga bahin sa atong lawas nga nagkahiusa sa paglihok, nakapahimo nato sa pagginhawa, pagdagan, pagdamgo, ug pagkaon. Dinasig nga paglambo sa tambal ug teknolohiya nanghitabo matag adlaw, ug kita karon makaistorya hapit ni bisan kinsa bisan asa. Ang gahum sa Dios makita sa matag detalye sa atong kinabuhi.
Ngano nga ang Dios Mopahigayon og mga Milagro?
Ang mga milagro moabut sa daghang mga matang, apan ang Dios mopahigayon niini alang sa samang kinatibuk-ang mga katuyoan. Usahay ang mga milagro moayo, mohupay, o pisikal nga manalipod sa mga anak sa Dios, apan kining dayag nga mga epekto dili lamang mao ang rason sa mga milagro. Sa kasagaran, ang usa ka milagro dili gayud makapugong sa pag-antus o trahedya. Ang Dios mopahigayon og mga milagro tungod sa duha ka sukaranang mga rason: sa pagpalig-on sa pagtuo ug sa pagbuhat sa maayo.
Sa kasagaran, ang mga milagro nagpakita sa gahum sa Dios ngadto sa Iyang mga anak o sa pagtudlo og espirituhanong baruganan. Ang Bible Dictionary nag-ingon nga ang mga milagro ni Jesukristo “gitumong nga usa ka ebidensya ngadto sa mga Judeo nga si Jesus mao ang Kristo” ug sa pagtudlo sa mga baruganan sama sa pagkamaytulubagon, paghinulsol, hugot nga pagtuo, ug gugma.3
Sa ubang higayon, ang mga milagro makakumpirmar sa miaging pagpadayag, sama sa mga timailhan sa pagkatawo ni Kristo sa Amerika. Ang Dios makagamit usab og mga milagro aron sa pagpadayon sa Iyang buhat—buhat sa family history, misyonaryo nga buhat, ug daghan pa.
Apan kon kita magtinguha og mga milagro tungod sa sayop nga mga rason, mahimong magkaproblema kita. Ang labing komon nga problema moabut kon kita magtinguha og mga timailhan isip ebidensya sa pagkaanaa sa Dios. Kon kita dili modugang og hugot nga pagtuo, kini nga mga timailhan dili moresulta ngadto sa tinuod, malungtarong pagkakabig. Tan-awa lang unsay nahitabo sa Basahon ni Mormon: daghang mga tawo nakakita og mga timailhan ug mga milagro, apan kon walay hugot nga pagtuo, ang ilang pagkamasulundon mubo ra.
Sayop usab nga mangita og mga milagro para mahimong inila o makakwarta, sa pagpanimalos, o sa pagsulay sa pag-usab sa kabubut-on sa Dios.
Si Presidente Brigham Young (1801–77)mitudlo, “Ang mga milagro … dili alang sa dili tumutuo; kini mohupay sa mga Santos, ug molig-on ug mopamatuod sa hugot nga pagtuo niadtong kinsa nahigugma, nagtahud ug nagserbisyo sa Dios.”4 Ang pagsabut ngano nga ang Dios mopahigayon og mga milagro makatabang nato nga makaila niini sa atong kaugalingong kinabuhi.
Unsaon Nako Pag-ila sa usa ka Milagro?
Ang mga milagro mahitabo lamang sumala sa kabubut-on sa Dios ug sa atong hugot nga pagtuo Kaniya. Si propeta Moroni misulat, “Ug sa bisan unsa nga panahon adunay nakahimo og mga milagro hangtud human sa ilang hugot nga pagtuo; busa sila mituo una diha sa Anak sa Dios” (Ether 12:18). Ang pagbaton og hugot nga pagtuo makapahimo nato sa pagkakita sa maayong mga butang nga nahitabo sa atong kinabuhi isip buhat sa Dios imbis kay sa mga sulagma o swerte. Ang pag-ila og usa ka milagro mao ang kabahin sa milagro mismo! Kon kita motan-aw sa kinabuhi gamit ang lente sa hugot nga pagtuo diha ni Jesukristo, ang atong mga mata mabukas ngadto sa daghang mga milagro sa atong palibut.
Hinoon, ang gidak-on, tayming, ug resulta sa usa ka milagro dili sukod sa atong hugot nga pagtuo. Ingnon ta nga duha ka pamilya ang matag usa nakadawat og balita nga usa sa ilang mga anak adunay kanser. Ang duha ka pamilya nag-ampo alang sa minahal nga maayo og dali. Ang duha ka pamilya nagpakita og hugot nga pagtuo sa makaayo nga gahum ni Jesukristo.
Ang anak sa unang pamilya hingpit nga naayo, misupak sa panagna sa doktor nga siya aduna na lay pipila ka bulan nga mabuhi. Ang anak sa ikaduhang pamilya nag-antus sa daghang mga pagtambal ug sa katapusan namatay, apan ang tibuok pamilya gibati og tumang kalinaw ug kahupayan kay sa kasubo.
Ang unang pamilya wala magpasabut nga mas matinud-anon kay sa ikaduha. Ang duha ka pamilya nakadawat og mga milagro sa ilang kaugalingong paagi, ang duha ka milagro kabahin sa sundanan sa padayon nga kasiguroan nga ang Dios adunay plano alang sa matag usa sa Iyang mga anak.
Ang Ginoo mipahigayon sa ingon og ordinaryo ug dili ordinaryo nga mga milagro sa atong panahon. Ang matinud-anong mga sumusunod ni Jesukristo sa matag dispensasyon nakasinati ug tulukibon nga mga pagkaayo ug dili mapasabut nga mga kalampusan. Hinoon, kinahanglan nga dili nato ibaliwala ang matag adlaw nga mga panghitabo nga kana nga buhat isip tigpahinumdom sa kamot sa Dios sa atong kinabuhi. Usahay kinahanglan lang gayud nga ilhon nato kini!