Mga Apostoles sa tibuok Kalibutan
Si Elder Uchtdorf Mibisita sa Russia
Ang mga Apostoles mobiyahe sa tibuok kalibutan aron sa pagpangalagad sa katawhan ug sa pagtudlo kanila mahitungod ni Jesukristo.
Si Elder Dieter F. Uchtdorf ug si Sister Harriet Uchtdorf miadto sa Russia aron sa pagtabang sa mga miyembro sa Simbahan didto. Sa wala pa siya mahimong Apostol, si Elder Uchtdorf sa kasagaran moadto sa Russia isip usa ka kapitan sa eroplano.
Ang Russia usa ka dako nga nasud, ug wala pa gayuy templo sukad. Sa miaging tuig si Presidente Nelson mipahibalo nga ang usa ka templo pagatukuron didto. Ang tanan nalipay kaayo!
Una si Elder Uchtdorf miadto sa Moscow, ang ulohan nga siyudad sa Russia. Ang mga tawo didto ganahan nga makigmiting niya ug maminaw niya nga motudlo. Miingon siya nga kita makatabang sa uban nga makaila ni Jesus pinaagi sa pag-alagad kanila.
Sunod miadto siya ngadto sa dako nga siyudad nga gitawag og St. Petersburg. Sa Russia, ang mga misyonaryo gitawag nga mga “bolunter,” ug sila mangita og mga tawo nga katabangan matag adlaw. Makatudlo lamang sila sa mga tawo mahitungod sa ebanghelyo samtang sila anaa sa sulod sa gambalay sa Simbahan. Si Elder Uchtdorf nanihapon uban sa mga bolunter kinsa mahuman sa ilang mga misyon ug mopauli.
Bisan og kita wala pa makahibalo asa o kanus-a ang bag-ong templo tukuron, si Elder Uchtdorf miawhag sa tanan sa Russia sa pag-andam sa ilang kinabuhi alang sa adlaw nga ang templo anaa na didto.
“Ang atong mga kasingkasing kinahanglan nga andam alang sa templo.” —Elder Uchtdorf
Pagpangandam alang sa Templo
Unsa ang pipila ka mga paagi nga kamo makaandam sa pag-adto sa templo sa umaabut?
Pagbutang og usa ka litrato sa templo sa inyong kwarto.
Pangita og usa ka tawo sa inyong pamilya kinsa wala pa mabunyagi.
Pakigsulti mahitungod sa templo uban sa usa ka tawo kinsa nakasulod.