Gahum sa Pag-ampo
Kinsa ang inyong iampo karon?
“Pag-ampo alang sa usa ug usa” (Santiago 5:16).
Si Papa mitawag sa tanan nga moduol sa computer. Nabuhian ni Lucy ang stuffed giraffe nga iyang gidulaan ug nagdali. Unsay nahitabo? Oras na ba nga motawag ni Lola sa online?
Mitudlo si Papa sa computer screen. “Gusto kong mopakita ninyo bahin sa usa ka pakigpulong gikan sa kinatibuk-ang komperensya”
Misuliyaw si Lucy. Dili si Lola. Si Presidente Eyring! Anaa siya sa Unang Kapangulohan.
Gipislit ni Papa ang play. Si Presidente Eyring mitudlo sa pagsuporta sa inyong mga lider sa Simbahan. Gipasabut niya kon sa unsa nga paagi nga ang mga lider sa Simbahan kinahanglan sa atong pag-ampo alang kanila.
“Mao kana ngano nga kita mag-ampo alang sa propeta, sakto, Papa?” pangutana sa iyang manghud nga lalaki, nga si David. Si Papa ug Mama miyango.
“Oo, buhaton nato,” miingon si Papa. “Apan naghunahuna usab ako mahitungod sa atong kapangulohan sa branch. Nagtuo ko nga si Presidente Alvarez ug ang iyang mga magtatambag nagkinahanglan usab sa atong mga pag-ampo.”
Si Lucy ganahan ni Presidente Alvarez ug sa iyang mga magtatambag. Buotan kaayo sila kaniya kanunay. Gusto siya nga motabang kanila!
“Mag-ampo ko alang kanila,” miingon si Lucy. “Ug kita makaampo usab alang kanila sa atong mga pag-ampo sa pamilya!”
“Nagtuo ako nga kana nindot kaayo nga ideya,” miingon si Mama. “Buhaton nato kini.”
Sa misunod nga pipila ka adlaw, si Lucy naningkamot pag-ayo sa paghinumdom sa pag-ampo alang sa kapangulohan sa branch sa panahon nga siya mag-ampo. Molungtad lang kini og dugang nga pipila ka segundo matag higayon. Sayon ra!
Sa misunod nga Dominggo sa sakrament miting, si Presidente Alvarez mibarug human sa himno. Dayon miingon siya og butang nga nakapadako sa mga mata ni Lucy.
“Isip kapangulohan sa branch, gusto kaming magpasalamat kaninyo sa pag-ampo alang kanamo,” miingon siya. “Gibati namo ang tinuod nga kusog gikan niadto nga mga pag-ampo. Nagkinahanglan gayud kami sa inyong hugot nga pagtuo ug mga pag-ampo sa pagbuhat sa among mga calling. Salamat kaninyo!”
Mipahiyom si Lucy. Mitan-aw siya ni David. Nagpahiyom usab siya. Dili siya makatuo niini! Nadasig kaayo siya nga dili siya makatarung og lingkod. Midip-ig siya ug gibira ang sinina ni Mama.
“Ma!” mihunghong siya. “Nakadungog ka ba unsay gisulti ni Presidente Alvarez?!” Gusto siya molukso-lukso. “Misalir kini! Ang atong mga pag-ampo misalir!”
Human sa pagsimba, si Lucy ug ang iyang pamilya nanglakaw pauli.
“Ang Dios maminaw gayud sa atong mga pag-ampo,” miingon si Mama. “Ug dili ba talagsaon nga makakita kon unsa ka gamhanan alang sa usa ka grupo nga mag-ampo alang sa usa ka tawo?”
Gibati ni Lucy ang kainit ug kalipay sa kaugalingon. Siya ug si David naglukso-lukso sa daplin sa dalan samtang si Mama ug Papa nagsunod kanila. Nasayud siya nga ang Langitnong Amahan nakadungog sa pag-ampo sa iyang pamilya. Nakahimo gayud kini og kalainan. Pinaagi sa pag-ampo lang!
Nianang gabhiona, si Lucy andam nga mag-ampo. Naghunahuna siya sa iyang magtutudlo sa Primary ug sa ubang mga lider sa Simbahan kinsa makagamit sa pipila ka dugang nga mga panalangin. Tingali siya makaampo usab alang kanila! Gikyugpos ni Lucy ang iyang mga bukton ug miduko sa iyang ulo. Nasayud siya unsay isulti.