“Kinoloran nga Bildo nga Dunay Densinyo,” Liahona, Marso 2019
Sa Digital Lamang
Ang Kinoloran nga Bildo nga Dunay Desinyo diha sa Visitors’ Center sa Rome
Ang bintana nga kinoloran nga bildo nga dunay desinyo diha sa Visitors’ Center sa Roma Italy dili lang maanindot apan usa usab kini ka gamhanan nga pagpamatuod.
Ang naggilak-gilak nga katahum sa kinoloran nga bildo nag-iwag sa mga templo sa tibuok kalibutan. Adunay usa ka butang nga espesyal mahitungod sa gidayan-dayan nga mga desinyo ug sa mga hulagway nga anaa niining mga obra maestra nga makatandog sa mga kasingkasing ug makalig-on og pagpamatuod sa talagsaong paagi.
Sama katalagsaon sa mga bintana mismo mao ang gidugayon sa panahon, trabaho, ug pailob sa pagbuhat niini bisan sa labing yanong desinyo. Tungod kay walay duha ka pligo sa bildo nga pareha, ang mga artist mahunahunaon nga mipili unsa nga bildo ang trabahoon. Ang tanang bildo giampingan sa pagtabas ug gipahamis ngadto sa piho nga porma. Ang mga detalye gipinta ngadto sa bildo ug gisilyohan sa init. Ang mga piraso dayon giayo sa pagpahimutang ngadto sa sakto nga posisyon ug gilinyahan og nipis nga gilis sa tingga. Gisumpay kini gamit ang solda (metal nga molanay gamit ang hinay nga kainit ug dali nga mogahi). Dayon ang trabaho sementuhon aron masiguro ang bildo sulod sa tingga ug aron kini dili mahumod.
Sa pagkonsiderar sa makuti nga proseso, hunahunaa ang trabaho sa paghimo og dako nga kinoloran nga bildo nga dunay desinyo nga naghulagway sa mortal nga pangalagad ni Kristo, tungod kay mao gayud kana ang gihimo nila ni Tom ug Gayle Holdman sa Provo, Utah, USA, ug sa grupo sa mga artist, mga tigdesinyo, ug mga modelo nga milagrosong nakahuman nga wala kaabut og usa ka tuig. Ang nahuman nga produkto gipasundayag sa Temple Visitors’ Center sa Rome Italy ug hilabihan kanindot.
Pagsugod sa Proyekto
Sa sinugdanan, ang mga plano alang sa Visitors’ Center sa Rome Temple naglakip sa usa ka video wall, apan ang ideya gikansila, nga maoy nakahatag og kahigayunan sa kinoloran nga bildo nga dunay desinyo nga bintana nga ibutang didto. Usa ka talan-awon ang gihimo alang sa bintana; dayon ang mga aktor nga nagsul-ob og mga costume gidala ug miposing niini, nagtugot sa mga artist sa paghimo og konsepto nga art alang sa bintana.
“Nagpadayon ang among pagbati nga nadani sa paghimo og piho nga konsepto sa desinyo,” miingon si Brother Holdman. “Nakahukom mi sa paghimo og makuti nga plano sa tibuok hulagway aron among makuha ang emosyon sa mga aktor.” Human mahimo ang katapusang plano, si Tom nakahimo na sa pasugod sa pagtrabaho sa bildo.
Ang bintana naghulagway sa Manluluwas ug sa Iyang Napulog Duha ka mga Apostoles panahon sa Iyang yutan-ong pangalagad. Gibutang kini diha gayud sa taliwala sa visitors’ center aron kini mao ang unang makita sa mga bisita sa ilang pagsulod sa gambalay. Dayon samtang ang mga bisita molakaw libut sa pikas bahin sa bintana, ilang makita ang mga estatuwa nga marmol sa Christus ug ang orihinal nga Napulog Duha ka mga Apostoles.
Mga Sambingay human sa laing mga Sambingay
Usa sa daghang maanindot nga anaa niining kinoloran nga bildo nga bintana nga dunay desinyo mao nga kini wala lamang magpakita og usa ka talan-awon gikan sa yutan-ong pangalagad sa Ginoo. Sa unsay makita nga usa lang ka talan-awon sa unang pagtan-aw, si Jesukristo ug ang Napulog Duha ka mga Apostoles anaa sa tunga sa mga karakter ug mga simbolo nga nagrepresentar sa mga panghitabo ug mga katawhan gikan sa yutan-ong pangalagad sa Ginoo ingon man usab sa matag sambingay nga Iyang gitudlo. Ang mga Holdman naghinam-hinam sa mga bisita nga makakita sa trabaho ug sa pagpangita ug pagtudlo sa ilang paborito nga mga istorya mahitungod ni Kristo.
Ang hulagway sa babaye sa tabay makuti usab kaayo. Siya nagrepresentar og mas daghang mga istorya kay sa babaye lamang diha sa tabay; siya nanghangyo ngadto sa Manluluwas sama sa babaye nga gitalinug-an [issue of blood], ug ang mga bato sa iyang tupad nagsimbolo sa babaye nga giakusar nga nakahimo og pagpanapaw kinsa gidala aron batoon.
“Ang babaye diha sa tabay mao ang usa sa akong paborito nga bahin niini nga bintana tungod kay siya nagrepresentar sa daghan kaayo nga babaye gikan sa Bag-ong Tugon,” miingon si Sister Holdman. “Ang matag usa niadto nga mga babaye adunay lahi nga panginahanglan sa kaugalingon, apan sa katapusan silang tanan nagkinahanglan lang nga mamaayo. Ang ilang mga istorya ug hugot nga pagtuo sa pagkatinuod nagpamatuod kanako, ug hinaut ngadto sa daghang mga bisita, sa makaayo nga gahum sa Manluluwas.”
Usa ka Mahayag nga Himan sa Misyonaryo
Usa sa labing dako nga mga paglaum sa mga Holdman mao nga ang ilang kinoloran nga bildo nga dunay desinyo mahimong mapuslanon nga himan sa misyonaryo sa visitors’ center. “Kining tibuok trabaho sa arte gihimo aron mahimong usa ka biswal nga pagpamatuod ni Kristo,” mipasabut si Sister Holdman. Ang artwork naglakip sa mga simbolo ug mga elemento sa pagkatawo ni Kristo, Paglansang sa Krus, Pag-ula, Pagkabanhaw, ug daghan pa nga mga simbolo mahitungod Kaniya.
“Giapil namo ang imahe nga anaa sa ubang relihiyon nga Kristiyano sama sa krus ug sa korona sa mga tunok aron adunay butang nga pamilyar nila ug nailhan ug magtugot sa mga investigator ug mga misyonaryo sa paglig-on sa komon nga mga pagtuo,” miingon si Brother Holdman. “Kining tibuok bintana nagpakita nga unsay importante ngadto kanila importante diri kanato. Nagpakita kini nga Ang Simbahan ni Jesukristo sa mga Santos sa Ulahing mga Adlaw usa ka Kristiyano nga simbahan. Manghinaut ko nga kini makatabang sa mga tawo nga hingpit nga makasabut niana.”
Ang Pagkaporma
Human sa walay puas nga pagtrabaho aron makompleto kining milagroso nga proyekto nga wala kaabti og usa ka tuig, sila si Brother ug Sister Holdman nagmapaubsanon ug nalipay pag-ayo sa pagkakita niining maanindot nga artwork nga naporma. “Ang artwork nakahatag og kahigayunan kaninyo nga makakita sa unsa nga paagi nga ang mga istorya sa pangalagad ni Kristo may kalabutan sa usag usa ug usab may kalabutan nato karon,” miingon si Sister Holdman. “Dili kaayo kita lahi niadtong kinsa nagpakabuhi sa panahon ni Kristo tungod kay nagkinahanglan kita Kaniya ug sa Iyang mga pagtulun-an sama nga sila nagkinahanglan usab.”
“Giayo namo sa paghimo ug pagdesinyo kini nga artwork aron nga ang tanang mga han-ay sa bildo nagpunting ngadto sa kasingkasing sa Manluluwas sa sentro sa artwork,” miingon si Brother Holdman. “Gikan sa mga gambalay ngadto sa gitas-on sa mga tawo, ang tanan niini nga artwork nagpunting balik ngadto Kaniya.”