Unsay Tinuod ug Unsay Dili?

Ni Elder Carl B. Cook

Sa Kapangulohan sa Seventy

Naghunahuna ba kamo unsaon sa pagkahibalo unsa gayud ang tinuod?

Bag-o lang ko nakaila og talagsaong batan-ong babaye, 17 anyos nga si Caylee, samtang gipakigbahin niya ang iyang kinasingkasing nga mga pagbati sa usa ka komperensya sa stake. Gipahayag niya nga ang Dios tinuod, ang Simbahan tinuod, ug si Presidente Russell M. Nelson propeta sa Dios. Mipamatuod usab siya og lig-on nga saksi nga ang negatibo nga mga butang nga gisulti sa uban mahitungod sa Simbahan ug sa ebanghelyo ni Jesukristo mga bakak.

Nadasig ko sa pagkakabig ni Caylee ug sa iyang abilidad sa pag-ila unsa ang tinuod ug unsa ang dili.

Apan mas nadasig pa ko pag-ayo sa dihang nakigsulti ko ni Caylee human sa miting ug nakadiskbore nga iyang panabut ug kombiksyon wala moabut sa sayon nga paagi. Gani, milahutay siya og seryoso nga hagit sa iyang pagtuo.

Ania ang unsay iyang gipakigbahin.

Nakigbisog sa Pagpangita og Tubag

Si Caylee aktibo kanunay sa Simbahan. Bisan pa niana, samtang nagsugod siya sa paghunahuna og maayo mahitungod sa ebanghelyo ug sa Simbahan, pipila ka seryoso nga mga pangutana misulod sa iyang hunahuna. Dili maayo ang iyang gibati sa pagpangutana ug nagsugod sa pagpangita og mga tubag.

“Ang akong problema,” miingon si Caylee, “nagsiksik ko sa tanang sayop nga mga lugar. Imbis nga magsiksik sa mga kasulatan o sa mga pakigpulong sa komperensya ug pagpakigsulti sa akong mga ginikanan, nangita ko og lahi nga mga artikulo sa online nga nangangkon nga sila adunay mga tubag sa akong mga pangutana.”

Sa sinugdanan, si Caylee naghunahuna nga ang mga artikulo sa online nagdan-ag og kahayag sa iyang mga pangutana. Hinoon, miingon siya, “Samtang nagpadayon ko sa pag-imbestigar sa akong mga pangutana, ang tanan nga akong nabasa nakahatag nako og dugang pa hinoon nga mga pangutana ug dugang pa nga pagduha-duha.”

Si Caylee nagsugod nga nawad-an sa pagtuo ug paglaum. “Ang kahayag gikan sa akong pagpamatuod nagkawala,” nahinumdom siya, “ug sa hinay-hinay mihunong sa pagbuhat sa mga butang nga gitudlo kanako—pagbasa sa mga kasulatan, pag-ampo, ug pagtambong sa seminary.”

Sa katapusan nabuntog siya sa kangitngit ug sa kalibug nga iyang gibati. Miingon siya, “Dili ko makatino kon unsa ang gikan sa Dios ug unsa ang dili maayo nga ideya nga gituis ug gihimo sa usa ka tawo sa paglibug kanako. Dili na ko makaila kon unsa ang kamatuoran ug unsa ang pagpanglimbong. Miguba kini kanako.”

Gitandi ni Caylee ang iyang sitwasyon ngadto ni Joseph Smith sa dihang siya miingon “Sa kadugayan ako miabut sa paghukom nga ako kinahanglan nga magpabilin sa kangitngit ug sa kalibug, o ako kinahanglan mobuhat ingon sa gisugo ni Santiago, nga mao, ang pagpangutana sa Dios. Ako sa kadugayan miabut sa hugot nga tinguha sa “pagpangutana sa Dios’ [Santiago 1:5], sa pagtuo nga kon siya mohatag og kaalam ngadto kanila nga nagkulang og kaalam, ug mohatag sa walay pagdumili, ug dili masuko, ako tingali mosulay” (Joseph Smith—Kasaysayan 1:13).

Ang Pagpakigsulti sa mga Tawo nga Iyang Gisaligan

Niing kritikal nga higayon, si Caylee miduol sa iyang magtutudlo sa seminary, sa iyang lola, ug sa iyang inahan. Ang iyang magtutudlo sa seminary mihatag niya og kasiguroan nga ang iyang mga pagbati dili sayop ug nga siya dili lang mao ang tawo nga adunay mga pangutana. Ang iyang magtutudlo mipakigbahin sa iyang pagpamatuod ug mirekomendar sa pagbasa sa mga materyal nga makatabang ni Caylee sa iyang pagsiksik.

Ang lola ni Caylee wala mosangyaw. Yano ra siyang miawhag niya sa pagkonsiderar unsa nga mga tinubdan sa impormasyon ang makabayaw kaniya—ang impormasyon ba sa online o ang doktrina sa Simbahan? Si Caylee nagsugod sa pagtandi: “Hain ang nakabayaw nako? Hain niini ang nakahatag nako og kalipay ug kalinaw sa akong kalag? Hain ang nagtudlo nako nga ako mahimong makauban sa akong pamilya sa kahangturan sa kahimtang nga walay katapusan nga kalipay kon ako mosunod sa mga sugo sa Dios? Hain ang naghatag og makasamok nga tingog sa akong ulo?”

Pagpangita sa Dios pinaagi sa Pag-ampo ug sa mga Kasulatan

Giawhag si Caylee sa iyang inahan sa pag-ampo. Sa katapusan, si Caylee miadto sa iyang kwarto ug mibu-bu sa iyang kalag ngadto sa Dios. Mipasabut siya: “Walay nahitabo. Walay anghel nga mikanaog. Ang akong kasingkasing wala mobati og kalinaw ug pasalamat. Mibalik ko ngadto sa akong mama. Nag-ampo ming duha, ug siya miawhag nako sa pagbasa sa Basahon ni Mormon sulod sa 10 ka minuto. Samtang nagbasa ko, gibati nako ang saad sa akong kasingkasing nga kon ako mopadayon sa paghimo niini, makakita ko og mga panalangin. Klaro nakong makita ug mahibaloan hain nga mga pagtulun-an ang gikan sa Dios ug hain ang dili.”

Si Caylee nagsugod sa pag-ampo kada adlaw ug nagbasa sa Basahon ni Mormon. Nagpalayo siya sa Twitter ug sa mga website nga maoy nakapasugod sa iyang mga pagduha-duha. Miadto siya sa seminary uban sa tuyo nga makat-on pa, dili mangita sa negatibo nga mga butang mahitungod sa Simbahan.

Pag-ila Unsa ang Tinuod

Human sa mga duha ka semana sa kanunay nga paningkamot, gibati niya nga ang negatibo nga mga tingog nagkahilom. Ang pag-eskwela mas namaayo. Ang trabaho mas makalingaw, ug siya adunay mas maayo nga relasyon sa iyang mga ginikanan. Mas malipayon na siya.

Tungod niana nga kalipay, miingon siya, “Sa katapusan nakita nako ang akong tubag. Nakahimo ko sa pag-ila unsa ang gikan sa Dios ug unsa ang dili tungod kay nakita nako ang unsay Iyang gibuhat alang nako sa dihang gibuhat nako unsay Iyang gisugo.”

“Kana,” siya nagtapos sa pag-ingon, “mao ang bugtong paagi nga ikaw sa tinuod makaila unsa ang kamatuoran gikan sa Dios ug unsa ang dili. Makatuon ug makapamalandong kita ug makapangutana kutob sa atong gusto, apan hangtud nga buhaton nato unsa ang gisugo ni Santiago ug unsa ang gibuhat ni Joseph Smith—pangutana ug pagbuhat—diha lamang kita sa tinuod makahibalo unsa ang tinuod ug unsa ang dili.”

Mao nga unsay atong nakat-unan gikan sa kasinatian ni Caylee? Ania ang pipila ka mga ideya:

Dili kinahanglang mobati kita og dili maayo kon kita dunay mga pangutana.
Kinahanglan nga dili kita mohunong sa pag-ampo samtang magsiksik kita sa mga tubag.
Kinahanglan natong tun-an ug palandungon ang Basahon ni Mormon.
Pinaagi sa mabinantayong pagpili unsay atong basahon ug paminawon kita makapalong sa kusog nga tingog sa teknolohiya ug media nga mipahilayo nato gikan sa kamatuoran ug sa tumong sa paglaglag.
Kinahanglan nga magpakitambag kita sa mga tawo nga atong nailhan, gimahal, ug gitahud—kay sa pagpangita og tabang gikan sa mga estranghero.
Ang Dios sa katapusan motubag sa atong mga pangutana sa Iyang kaugalingong paagi ug sa Iyang kaugalingong panahon. Nahigugma Siya kanato.
Ang mga tubag moabut samtang kita mobuhat unsa ang gisugo sa Langitnong Amahan kanato—dili kon kita mobuhat unsay gisugyot sa kalibutan.

Nadasig ko ni Caylee ug kamo batan-ong mga babaye ug batan-ong mga lalaki ang Dios miandam kaninyo niining higayuna. Siya, sama sa kadaghanan kaninyo, nagpakita sa matang sa pagkatawo nga gipanglantawan ni Presidente Russell M. Nelson: “Kita nagkinahanglan og mga babaye nga adunay gasa sa pag-ila kinsa makatan-aw sa mga uso sa kalibutan ug makamatikod niadtong, bisan unsa ka sikat, mga mabaw o kuyaw.”¹

Kamo ang tigpangita sa kamatuoran, tighupot sa pakigsaad, ug tigtukod sa gingharian. Uban sa tabang sa Dios ug pinaagi sa gahum ni Jesukristo ug sa Iyang Pag-ula, kamo makadawat og gasa sa pag-ila ug makahibalo, makapuyo ug makapaambit unsay tinuod.